ʻUluaki Tuʻi 21:1-29
21 ʻI he hili ʻa e ngaahi meʻá ni, naʻe ʻi ai ha meʻa naʻe hoko ʻo fekauʻaki mo ha ngoue kālepi ʻa e tangata Sisilili ko Nēpote; naʻe tuʻu ia ʻi Sisilili,+ ʻo hoko atu ki he palasi ʻo ʻĒhapi ko e tuʻi ʻo Samēliá.
2 Naʻe pehē ange ʻe ʻĒhapi kia Nēpote: “ʻOmai maʻaku hoʻo ngoue kālepí ke u ngāueʻaki ki ha ngoue vesitapolo, he ʻoku ofi mai ia ki hoku falé. Pea te u ʻoatu kiate koe ha ngoue kālepi lelei ange ke fetongiʻaki ia. Pe kapau te ke saiʻia ai, te u ʻoatu kiate koe ha paʻanga ki hono mahuʻingá.”
3 Ka naʻe pehē ange ʻe Nēpote kia ʻĒhapi: “ʻOku mole ke mamaʻo ʻi he vakai mai ʻa Sihová haʻaku fakakaukau ke foaki atu kiate koe ʻa e tofiʻa ʻo ʻeku fanga kuí.”+
4 Ko ia naʻe hū ʻa ʻĒhapi ki hono falé, ʻokú ne fakalolongo mo loto-mamahi ʻi he tali naʻe ʻoange kiate ia ʻe Nēpote ko e tangata Sisililí ʻi heʻene pehē: “ʻE ʻikai te u foaki atu kiate koe ʻa e tofiʻa ʻo ʻeku fanga kuí.” Pea naʻá ne tokoto ʻi hono mohengá, ʻo ne hanganaki hanga ki he holisí, pea fakafisi ke kai.
5 Naʻe hū atu ʻa hono uaifi ko Sisipelí+ ʻo pehē ange kiate ia: “Ko e hā ʻokú ke fuʻu loto-mamahi ai* peá ke fakafisi ai ke ke kaí?”
6 Naʻá ne tali ange kiate ia: “Koeʻuhí naʻá ku pehē ange kia Nēpote ko e tangata Sisililí, ‘ʻOmai maʻaku hoʻo ngoue kālepí kae ʻoatu ha paʻanga. Pe kapau te ke saiʻia ai, tuku ke u ʻoatu maʻau ha ngoue kālepi ʻe taha ke fetongiʻaki ia.’ Ka naʻá ne pehē, ‘ʻE ʻikai te u foaki atu kiate koe ʻa ʻeku ngoue kālepí.’”
7 Naʻe pehē ange ʻe Sisipeli ko hono uaifí kiate ia: “ʻIkai ko koe ʻa e tokotaha ʻoku pule ko e tuʻi ki ʻIsilelí? Tuʻu hake ʻo kai ha meʻa, pea tuku ke fiefia ho lotó. Te u foaki atu kiate koe ʻa e ngoue kālepi ʻa Nēpote ko e tangata Sisililí.”+
8 Ko ia naʻá ne fai ai ha ngaahi tohi ʻi he hingoa ʻo ʻĒhapí ʻo silaʻi ʻaki ia ʻene silá+ pea ʻave ʻa e ngaahi tohí ki he kau mātuʻa+ mo e houʻeiki ʻa ia naʻe nofo ʻi he kolo ʻo Nēpoté.
9 Naʻá ne tohi ʻi he ngaahi tohí: “Fanongonongo ha ʻaukai, pea ʻai ʻa Nēpote ke ne tangutu ʻi muʻa ʻi he kakaí.
10 Pea ʻai ha ongo tangata ko e koto taʻeʻaonga ke na tangutu ʻi muʻa ʻiate ia ʻo fai hano talatalaakiʻi,+ ʻo pehē, ‘Kuó ke lauʻikoviʻi ʻa e ʻOtuá pea mo e tuʻí!’+ Pea ʻomi leva ia ki tuʻa ʻo tolomakaʻi ke ne mate.”+
11 Ko ia ko e kau tangata ʻi hono koló, ʻa e kau mātuʻá pea mo e houʻeiki naʻe nofo ʻi hono koló, naʻa nau fai ʻa e meʻa tofu pē naʻe hiki ʻi he ngaahi tohi ʻa ia naʻe ʻave ʻe Sisipeli kiate kinautolú.
12 Naʻa nau fanongonongo ha ʻaukai pea ʻai ʻa Nēpote ke ne tangutu ʻi muʻa ʻi he kakaí.
13 Naʻe hū mai leva ha ongo tangata ko e koto taʻeʻaonga ʻo tangutu ʻi muʻa ʻiate ia pea kamata ke na talatalaakiʻi ʻa Nēpote ʻi muʻa ʻi he kakaí, ʻo pehē: “Kuo lauʻikoviʻi ʻe Nēpote ʻa e ʻOtuá pea mo e tuʻí!”+ ʻI he hili iá, naʻa nau ʻomi ia ki he tuʻa koló ʻo tolomakaʻi ia ʻo ne mate.+
14 Pea naʻa nau ʻoatu ha tala kia Sisipeli, ʻo pehē: “Kuo ʻosi tolomakaʻi ʻa Nēpote ʻo ne mate.”+
15 ʻI he fanongo pē ʻa Sisipeli kuo ʻosi tolomakaʻi ʻa Nēpote ʻo ne maté, naʻá ne pehē ange kia ʻĒhapi: “Tuʻu hake ʻo maʻu ʻa e ngoue kālepi ʻa Nēpote ko e tangata Sisililí,+ ʻa ia naʻá ne fakafisi ke foaki atu kiate koe kae ʻoange ha paʻangá, he kuo ʻikai ke kei moʻui ʻa Nēpote. Kuó ne mate.”
16 ʻI he fanongo pē ʻa ʻĒhapi kuo mate ʻa Nēpoté, naʻe tuʻu hake ʻa ʻĒhapi ke ʻalu hifo ki he ngoue kālepi ʻa Nēpote ko e tangata Sisililí ʻo maʻu ia.
17 Ka naʻe hoko mai ʻa e folofola ʻa Sihová kia ʻIlaisiā+ ko e tangata Tīsipí, ʻo pehē:
18 “Tuʻu hake, pea ʻalu hifo ke fetaulaki mo ʻĒhapi ko e tuʻi ʻo ʻIsilelí, ʻa ia ʻoku ʻi Samēliá.+ ʻOkú ne ʻi he ngoue kālepi ʻa Nēpoté, ʻa ia kuó ne ʻalu atu ke maʻu ia.
19 Kuo pau ke ke tala kiate ia, ‘Ko e folofola eni ʻa Sihová: “Kuó ke fakapoongi koā ha tangata+ pea toe ʻave mo hono konga ʻapí?”’+ Peá ke pehē kiate ia, ‘Ko e folofola eni ʻa Sihová: “ʻI he feituʻu ʻa ia ʻoku ʻemo ai ʻe he fanga kulií ʻa e toto ʻo Nēpoté, ʻe ʻemo ai ʻe he fanga kulií ʻa ho toto ʻoʻoú.”’”+
20 Naʻe pehē ʻe ʻĒhapi kia ʻIlaisiā: “ʻE hoku fili,+ ko eni kuó ke maʻu au!” Naʻá ne tali ange: “Kuó u maʻu koe. ‘Koeʻuhí ʻokú ke fakapapauʻi* ke fai ʻa e meʻa ʻoku kovi ʻi he vakai mai ʻa Sihová,+
21 ko eni ʻoku ou ʻomi ha mala kiate koe, pea ʻi he hili koé te u tafiʻi ke maʻa pea fakaʻauha ʻosi meia ʻĒhapi ʻa e tangata kotoa pē,*+ ʻo kau ai ʻa e tokotaha ʻoku ʻikai hano tokoní pea mo e vaivai ʻi ʻIsilelí.+
22 Pea te u ʻai ho falé ke hangē ko e fale ʻo Selopoame+ ko e foha ʻo Nīpatí pea hangē ko e fale ʻo Paasa+ ko e foha ʻo ʻĀhisá, he kuó ke langaʻi ʻa ʻeku houhaú pea kuó ke fakatupunga ai ʻa ʻIsileli ke faiangahala.’
23 Pehē foki ʻi he fekauʻaki mo Sisipelí, kuo folofola ʻa Sihova: ‘ʻE kai ʻe he fanga kulií ʻa Sisipeli ʻi he konga kelekele ʻo Sisililí.+
24 Ko ha taha pē ʻoku kau kia ʻĒhapi ʻe mate ʻi he koló ʻe kai ia ʻe he fanga kulií, pea ko ha taha pē ʻe mate ʻi he vaó ʻe keina+ ia ʻe he fanga manupuna ʻo e langí.
25 Ko e moʻoni, kuo ʻikai ʻaupito ha taha ʻe hangē ko ʻĒhapí,+ ʻa ia naʻá ne mātuʻaki fakapapauʻi* ke fai ʻa e meʻa naʻe kovi ʻi he vakai mai ʻa Sihová, ʻi hono fakaʻaiʻai ia ʻe hono uaifi ko Sisipelí.+
26 Naʻá ne fai ʻa e tōʻonga mātuʻaki fakalielia ʻi heʻene muimui ʻi he ngaahi ʻaitoli fakalieliá,* ʻo hangē pē ko ia naʻe fai ʻe he kotoa ʻo e kau ʻĀmolí, ʻa ia naʻe kapusi ʻe Sihova mei he ʻao ʻo e kau ʻIsilelí.’”+
27 ʻI he fanongo pē ʻa ʻĒhapi ki he ngaahi leá ni, naʻá ne hae hono ngaahi kofú peá ne ʻai tauangaʻa; pea naʻá ne fai ha ʻaukai peá ne hanganaki tokoto tauangaʻa peá ne ʻalu ʻi he loto-mamahi lahi.
28 Naʻe hoko mai leva ʻa e folofola ʻa Sihová kia ʻIlaisiā ko e tangata Tīsipí:
29 “Kuó ke mamata ki hono fakavaivaiʻi ʻe ʻĒhapi ʻa ia tonu ʻi hoku ʻaó?+ Koeʻuhí kuó ne fakavaivaiʻi ia ʻi hoku ʻaó, ʻe ʻikai te u ʻomi ʻa e malá ʻi he lolotonga ʻene moʻuí. Te u ʻomi ʻa e malá ki hono falé ʻi he ngaahi ʻaho ʻo hono fohá.”+
Fakamatala ‘i Lalo
^ Fakafoʻilea, “ʻoku fuʻu loto-mamahi ai ho laumālié.”
^ Fakafoʻilea, “kuó ke fakatau atu koe.”
^ Fakafoʻilea, “ha taha pē ʻoku tuʻuofi ʻi ha holisi.” Ko ha kupuʻi lea faka-Hepelū ʻo e manuki ʻoku fai ki he kakai tangatá.
^ Fakafoʻilea, “naʻá ne fakatau atu ʻa ia tonu.”
^ Ko e foʻi lea faka-Hepeluú naʻe felāveʻi nai ia mo ha foʻi lea ki he “kinohaʻá” pea ʻoku ngāueʻaki ia ko ha fakahaaʻi ʻo e taʻetokaʻi.
