ʻUluaki Tuʻi 4:1-34
4 Naʻe pule ʻa Tuʻi Solomone ʻi ʻIsileli kotoa.+
2 Pea ko ʻene kau tangata māʻolungá eni: Ko ʻAsalaia ko e foha ʻo Sātokí+ naʻe taulaʻeikí;
3 ko ʻEliholefi mo ʻĀhisa ko e ongo foha ʻo Sesá naʻá na sekelitalí;+ ko Sihosafate+ ko e foha ʻo ʻAhilutí ʻa e tokotaha hiki fakamatalá;
4 ko Penaia+ ko e foha ʻo Sihoiatá naʻe pule ki he kau taú; ko Sātoki mo ʻĀpaiata+ naʻá na taulaʻeikí;
5 ko ʻAsalaia ko e foha ʻo Nētané+ naʻe pule ki he kau kōvana fakavahefonuá; ko Sapute ko e foha ʻo Nētané ko e taulaʻeiki pea ko e kaumeʻa+ ia ʻo e tuʻí;
6 ko ʻAhisali naʻe pule ʻi he palasí; pea ko ʻĀtonilami+ ko e foha ʻo ʻApetá naʻe pule ki he faʻahinga naʻe kounaʻi ke nau ngāue+ ki he tuʻí.
7 Naʻe maʻu ʻe Solomone ha kau kōvana fakavahefonua ʻe toko 12 ke nau pule ʻi ʻIsileli kātoa ʻa ia naʻa nau tokonaki ʻa e meʻakai maʻá e tuʻí mo hono falé. Ko e tokotaha taki taha naʻe fakafatongiaʻaki ke ne tokonaki ha meʻakai ʻi he māhina ʻe taha ʻi he taʻu.+
8 Ko honau hingoá eni: Ko e foha ʻo Huá, ki he feituʻu moʻungaʻia ʻo ʻIfalemí;
9 ko e foha ʻo Tekelí, ki Makasi, Salapimi,+ Pete-semesi, mo ʻEiloni-pete-hanani;
10 ko e foha ʻo Hēsetí, ki ʻAlupoti (naʻá ne maʻu ʻa Soko mo e vahefonua kotoa ʻo Hēfelí);
11 ko e foha ʻo ʻApinatapí, ki he ngaahi tahifo kotoa ʻo Toʻá (naʻe hoko ʻa e ʻofefine ʻo Solomone ko Tāfatí ko hono uaifi);
12 ko Paana ko e foha ʻo ʻAhilutí, ki Tanaka, Mekito,+ mo e kotoa ʻo Pete-seaní,+ ʻa ia ʻoku ʻi he tafaʻaki ʻo Saletaní ʻi lalo ʻi Sisilili, mei Pete-seani ki ʻĒpeli-mehola pea ki he feituʻu ʻo Siokemamí;+
13 ko e foha ʻo Kepá, ki Lēmoti-kiliati+ (naʻá ne maʻu ʻa e fanga kiʻi kolo iiki ʻo Saili+ ko e hako ʻo Manasé, ʻa ia ʻoku ʻi Kiliatí;+ naʻá ne maʻu foki mo e feituʻu ʻo ʻĀkopá,+ ʻa ia ʻoku ʻi Pēsaní:+ Ko e ngaahi kolo lalahi ia ʻe 60 mo honau ngaahi ʻā mo honau ngaahi meʻa fakamaʻu kopá);
14 ko ʻAhinatapi ko e foha ʻo ʻItó, ki Mehanemi;+
15 ko ʻAhimaasi, ki Nafitalai (naʻá ne ʻave ʻa Pasimati, ko e ʻofefine ia ʻe taha ʻo Solomone, ke hoko ko hono uaifi);
16 ko Paana ko e foha ʻo Hūsaí, ki ʻĀseli mo Pealoti;
17 ko Sihosafate ko e foha ʻo Paluá, ki ʻĪsaka;
18 ko Simi+ ko e foha ʻo Ilá, ki Penisimani;+
19 ko Kepa ko e foha ʻo ʻUlí, ki he fonua ko Kiliatí,+ ko e fonua ʻo Sīhoni+ ko e tuʻi ʻo e kau ʻĀmolí mo e fonua ʻo ʻOki+ ko e tuʻi ʻo Pēsaní. Naʻe ʻi ai foki mo ha kōvana fakavahefonua ʻe taha naʻá ne pule ki he kau kōvana fakavahefonua kotoa ko eni ʻi he fonuá.
20 Naʻe tokolahi ʻaupito ʻa Siuta mo ʻIsileli ʻo hangē ko e ʻoneʻone ʻi he matātahí;+ naʻa nau kai mo inu pea mo fiefia.+
21 Naʻe pule ʻa Solomone ki he kotoa ʻo e ngaahi puleʻangá mei he Vaitafé*+ ki he fonua ʻo e kau Filisitiá pea ki he kauʻāfonua ʻo ʻIsipité. Naʻa nau ʻomi tukuhau pea tauhi kia Solomone ʻi he ngaahi ʻaho kotoa ʻo ʻene moʻuí.+
22 Ko e meʻakai ʻa Solomone ki he ʻaho taki tahá ko e fua koa* ʻe 30 ʻo e mahoaʻa lelei mo e fua koa ʻe 60 ʻo e mahoaʻa,
23 fanga pulu tauhi ʻe 10, fanga pulu ʻe 20 mei he kaikaiʻangá, mo e fanga sipi ʻe 100, tuku kehe ʻa e kalasi kehekehe ʻo e tiá, pea mo e fanga manupuna tauhi.
24 He naʻá ne pule ki he meʻa kotoa pē ʻi he kauvai ki heni ʻo e Vaitafé,*+ mei Tifisa ki Kesa,+ ʻo kau ai ʻa e ngaahi tuʻi kotoa pē ʻi he kauvai ki heni ʻo e Vaitafé; pea naʻá ne fiefia ʻi he melino ʻa e ngaahi feituʻu kotoa naʻe takatakai kiate iá.+
25 Naʻe nofo malu ʻa Siuta mo ʻIsileli, ʻa e tokotaha taki taha ʻi hono lolo kālepi pea ʻi hono lolo fiki, mei Tani ki Pea-sipa, ʻi he ngaahi ʻaho kotoa ʻo Solomoné.
26 Pea naʻe maʻu ʻe Solomone ʻa e loki tauhiʻanga monumanu ʻe 4,000* ki he fanga hoosi ʻo ʻene ngaahi salioté pea mo e fanga hoosi* ʻe 12,000.+
27 Ko e kau kōvana fakavahefonua ko ení naʻa nau tokonaki ʻa e meʻakai kia Tuʻi Solomone pea ki he tokotaha kotoa naʻe kai ʻi he tēpile ʻa Tuʻi Solomoné. Ko e tokotaha taki taha naʻá ne fua ʻa e fatongiá ʻi hono māhina peá ne fakapapauʻi naʻe ʻikai ke nau masiva ʻi ha meʻa.+
28 Naʻa nau ʻomi foki ʻa e paʻale mo e kauʻi uite ki ha feituʻu pē naʻe fiemaʻu ki ai maʻá e fanga hōsí pea ki he ngaahi kulupu ʻo e fanga hōsí, ʻo fakatatau ki he ʻinasi ʻo e tokotaha taki taha.
29 Pea naʻe foaki ʻe he ʻOtuá kia Solomone ʻa e poto mo e ʻiloʻilo lahi ʻaupito pea mo ha loto-fakapotopoto lahi* ʻa ia naʻe hangē ko e lahi ʻo e ʻoneʻone ʻi he matātahí.+
30 Naʻe hulu atu ʻa e poto ʻo Solomoné ʻi he poto ʻo e kakai kotoa ʻi he Hahaké pea mo e poto kotoa ʻo ʻIsipité.+
31 Naʻá ne poto ange ʻi ha toe tangata pē, ʻo ne poto ange ʻia ʻĒtani+ ko e hako ʻo Salá mo Hēmani,+ Kalikoli,+ pea mo Talata, ʻa e ngaahi foha ʻo Maholí; ko hono ongoongó naʻe mafola atu ia ki he lotolotonga ʻo e ngaahi puleʻanga takatakaí kotoa.+
32 Naʻá ne faʻu* ʻa e palōveepi+ ʻe 3,000 pea naʻe 1,005 ʻa ʻene ngaahi hivá.+
33 Naʻá ne lave ʻo fekauʻaki mo e ʻuluʻakaú, mei he sita ʻi Lepanoní ki he ʻīsope+ ʻoku tupu ʻi he ngaahi ʻaá; naʻá ne lave ʻo fekauʻaki mo e fanga manú,+ ko e fanga manupuná,+ ko e fanga manu totolo mo ngaoló,*+ pea mo e iká.
34 Naʻe haʻu ʻa e kakai mei he ngaahi puleʻanga kotoa pē ke fanongo ki he poto ʻo Solomoné, ʻo kau ai ʻa e ngaahi tuʻi mei he kotoa ʻo e māmaní ʻa ia naʻa nau fanongo ʻi hono potó.+
Fakamatala ‘i Lalo
^ ʻA ia, ko e Vaitafe ʻIufaletesí.
^ Ko ha koa naʻe tatau ia mo e lita ʻe 220 (kuata ʻe 200 ʻi he fua mōmoá). Sio ki he Fakamatala Fakalahi E14.
^ ʻA ia, ko e tafaʻaki fakahihifo ʻo e Vaitafe ʻIufaletesí.
^ Ko e fiká ni ʻoku maʻu ia ʻi he ngaahi tatau tohinima ʻe niʻihi pea ʻi he ngaahi fakamatala ʻoku tatau mo iá. ʻOku hā ia ʻi he ngaahi tatau tohinima kehé ko e 40,000.
^ Pe “kau tangata heka hoosi.”
^ Pe “loto-matala.”
^ Pe “leaʻaki.”
^ Ngalingali ʻoku kau ai ʻa e fanga ʻinisēkité.
