ʻUluaki Kalonikali 17:1-27
17 ʻI he taimi pē naʻe nofo ai ʻa Tēvita ʻi hono fale* ʻoʻoná, naʻá ne pehē ange kia Nētane+ ko e palōfitá: “Ko au eni ʻoku ou nofo ʻi ha fale sita+ lolotonga ia ko e ʻaʻake ʻo e fuakava ʻa Sihová ʻoku ʻi ha tēniti.”+
2 Naʻe tali ange ʻe Nētane kia Tēvita: “Fai ha meʻa pē ʻoku ʻi ho lotó, he ʻoku kau ʻa e ʻOtua moʻoní mo koe.”
3 ʻI he pō pē ko iá, naʻe hoko ai ʻa e folofola ʻa e ʻOtuá kia Nētane, ʻo pehē:
4 “ʻAlu peá ke pehē ki heʻeku sevāniti ko Tēvitá, ‘Ko e meʻa eni ʻoku leaʻaki ʻe Sihová: “ʻOku ʻikai ko koe ʻa e tokotaha te ke langa ʻa e fale moʻoku ke u nofo aí.+
5 He kuo teʻeki ai ke u nofo ʻi ha fale talu mei he ʻaho naʻá ku ʻomai ai ʻa ʻIsilelí ʻo aʻu mai ki he ʻahó ni, ka naʻe hokohoko atu ʻeku ʻalu mei he tēniti ki he tēniti pea mei he tāpanekale ʻe taha ki he taha.*+
6 ʻI he lolotonga ʻa e taimi kotoa naʻá ku ʻalu ai mo e kotoa ʻo ʻIsilelí, naʻe faifai ange peá u leaʻaki ha foʻi lea ʻe taha ki ha taha ʻo e kau fakamaau ʻo ʻIsileli ʻa ia naʻá ku fakanofo ke nau tauhi ʻa hoku kakaí, ʻo pehē, ‘Ko e hā naʻe ʻikai te mou langa ai moʻoku ha fale sitá?’”’
7 “Ko ia ke ke leaʻaki eni ki heʻeku sevāniti ko Tēvitá, ‘Ko e meʻa eni ʻoku leaʻaki ʻe Sihova ʻo e ngaahi kau taú: “Naʻá ku toʻo mai koe mei he ngaahi kaikaiʻangá, mei he muimui ʻi he tākangá, ke ke hoko ko ha taki ki hoku kakai ko ʻIsilelí.+
8 Pea te u ʻiate koe ʻi ha feituʻu pē te ke ʻalu ki ai,+ pea te u fakaʻauha* ʻa e kotoa ʻo ho ngaahi filí mei ho ʻaó;+ pea te u ʻai ke ongoongoa ho hingoá ʻo hangē ko e hingoa ʻo e kau tangata ongoongoa ʻo e māmaní.+
9 Te u vaheʻi ha feituʻu maʻa hoku kakai ko ʻIsilelí pea fakanofonofo kinautolu, pea te nau nofo ai ʻo ʻikai ke toe fakahohaʻasi; pea ʻe ʻikai ke toe fakafeʻātungiaʻi kinautolu* ʻe ha kau tangata fulikivanu ʻo hangē ko ia naʻa nau fai ʻi he kuohilí,+
10 talu mei he ʻaho naʻá ku fakanofo ai ʻa e kau fakamaau ki hoku kakai ko ʻIsilelí.+ Pea te u fakavaivaiʻi ho ngaahi filí kotoa.+ ʻIkai ngata aí, ʻoku ou tala atu, ‘ʻE langa ʻe Sihova ha fale* moʻou.’
11 “‘“ʻI he taimi ʻe ngata ai ho ngaahi ʻahó peá ke ʻalu ke fakataha mo hoʻo fanga kuí, te u fokotuʻu ho hakó ʻi he hili koé, ʻa e taha ʻo ho ngaahi fohá,+ pea te u fokotuʻu maʻu ʻa hono tuʻunga-tuʻí.+
12 Ko e tokotaha ia te ne langa ha fale moʻoku,+ pea te u fokotuʻu maʻu ʻa hono taloní ʻo taʻengata.+
13 Te u hoko ko ʻene tamai, pea te ne hoko ko hoku foha.+ ʻE ʻikai te u toʻo ʻa ʻeku ʻofa mateakí meiate ia+ ʻo hangē ko ʻeku toʻo ia mei he tokotaha naʻe ʻi muʻa ʻiate koé.+
14 Te u ʻai ia ke ne tuʻu ʻi hoku falé pea ʻi hoku tuʻunga-tuʻí ʻo taʻengata,+ pea ko hono taloní ʻe tolonga ʻo taʻengata.”’”+
15 Naʻe fakahā ʻe Nētane kia Tēvita ʻa e ngaahi leá ni kotoa pea mo e vīsone ko ení kotoa.
16 Ko ia naʻe haʻu ai ʻa Tuʻi Tēvita ʻo tangutu hifo ʻi he ʻao ʻo Sihová peá ne pehē: “Ko hai au, ʻe Sihova ko e ʻOtua? Pea ko e hā ai hoku falé kuó ke ʻomi ai au ʻo aʻu mai ki he tuʻungá ni?+
17 He hangē kuo ʻikai feʻunga ʻa e meʻá ni, ʻe ʻOtua, kuó ke toe folofola ai fekauʻaki mo e fale ʻo hoʻo sevānití ʻo aʻu atu ki he kahaʻu mamaʻó,+ pea kuó ke hanga mai kiate au ʻo hangē ko ha tangata au ke hakeakiʻi lahi angé,* ʻe Sihova ko e ʻOtuá.
18 Ko e hā ha toe meʻa ʻe lava ke leaʻaki ʻe hoʻo sevāniti ko Tēvitá ki he ʻAfiona ʻo fekauʻaki mo e lāngilangi kuó ke ʻomai kiate aú he ʻokú ke ʻafioʻi lelei ʻa hoʻo sevānití?+
19 ʻE Sihova, koeʻuhi ko hoʻo sevānití pea ʻi he fehoanaki mo ho lotó* kuó ke fai ai ʻa e ngaahi fuʻu meʻa kotoa ko ení ʻaki hono fakahaaʻi ho fuʻu lahí.+
20 ʻE Sihova, ʻoku ʻikai ha taha ʻe hangē ko e ʻAfioná,+ pea ʻoku ʻikai ha ʻOtua tuku kehe pē ʻa e ʻAfiona;+ ko e meʻa kotoa pē kuo ongona ʻe homau telingá ʻoku fakapapauʻi ai ʻa e meʻá ni.
21 Pea ko e hā ha toe puleʻanga ʻi he māmaní ʻoku hangē ko ho kakai ko ʻIsilelí?+ Naʻe hāʻele atu ʻa e ʻOtua moʻoní ʻo ne huhuʻi kinautolu ke hoko ko hono kakai.+ Naʻá ke ʻai ai ke ongoongoa ho hingoá ʻaki hoʻo ngaahi fuʻu ngāue lahi mo fakamanavaheé,+ ʻi hono kapusi ʻa e ngaahi puleʻangá mei he ʻao ʻo ho kakaí,+ ʻa ia naʻá ke huhuʻi mei ʻIsipité.
22 Naʻá ke ʻai ho kakai ko ʻIsilelí ke hoko ko ho kakai tonu ʻo taʻengata;+ pea ko koe, ʻe Sihova, kuó ke hoko ko honau ʻOtua.+
23 Pea ko eni, ʻe Sihova, fakatauange ke hoko ʻo falalaʻanga ʻa e talaʻofa kuó ke fai ʻo fekauʻaki mo hoʻo sevānití pea mo hono falé ʻo taʻengata, pea fakatauange ke ke fai ʻo hangē tofu pē ko ia kuó ke talaʻofaʻakí.+
24 Fakatauange ke tuʻuloa* mo hakeakiʻi+ ho huafá ʻo taʻengata, koeʻuhí ke pehē ai ʻe he kakaí, ‘Ko Sihova ʻo e ngaahi kau taú, ʻa e ʻOtua ʻo ʻIsilelí, ko e ʻOtuá ia ki ʻIsileli,’ pea fakatauange ke fokotuʻu maʻu ʻi ho ʻaó ʻa e fale ʻo hoʻo sevāniti ko Tēvitá.+
25 He ko koe, ʻe hoku ʻOtua, kuó ke fakahā ki hoʻo sevānití ʻa hoʻo taumuʻa ke langa moʻona ha fale.* Ko e ʻuhinga ia kuo falala pau ai ʻa hoʻo sevānití ke fai ʻa e lotú ni kiate koé.
26 Pea ko eni, ʻe Sihova, ko koe ʻa e ʻOtua moʻoní, pea kuó ke talaʻofaʻaki ʻa e ngaahi meʻa leleí ni ʻo fekauʻaki mo hoʻo sevānití.
27 Ko ia fakatauange ke ke hōifua ʻo tāpuakiʻi ʻa e fale ʻo hoʻo sevānití, pea fakatauange ke tuʻu ia ʻo taʻengata ʻi ho ʻaó, he ko koe, ʻe Sihova, kuó ke tāpuakiʻí, pea ʻe faitāpuekina ia ʻo taʻengata.”
Fakamatala ‘i Lalo
^ Pe “palasi.”
^ Ngalingali ʻoku ʻuhingá “mei he tuʻuʻanga tēniti ʻe taha ki he taha pea mei he nofoʻanga ʻe taha ki he taha.”
^ Fakafoʻilea, “tuʻusi.”
^ Fakafoʻilea, “fakaongosiaʻi kinautolu.”
^ Pe “haʻa tuʻi.”
^ Pe “ko ha tangata māʻolunga aú.”
^ Pe “ʻi he fehoanaki mo ho finangaló.”
^ Pe “falalaʻanga.”
^ Pe “haʻa tuʻi.”
