Ua Sāmiuela 17:1-29
17 Naʻe pehē leva ʻe ʻAhitofeli kia ʻApisalome: “Tuku muʻa ke u fili ha kau tangata ʻe toko 12,000 pea te u tuʻu hake ʻo tulimui kia Tēvita ʻi he poó ni.
2 Te u ʻalu atu kiate ia ʻi heʻene ongosia mo ʻikai hano mālohí,*+ pea te u fakamanavaheeʻi ia; pea ko e kakai kotoa ʻoku ʻiate iá te nau hola, pea te u taaʻi ʻe au ʻa e tuʻí pē.+
3 Pea te u fakafoki mai ʻa e kakaí kotoa kiate koe. Ko e foki mai ʻa e kakaí kotoa ʻe makatuʻunga ia ʻi he meʻa ʻe hoko ki he tangata ʻokú ke kumi ki aí. Pea ko e kakaí kotoa te nau melino.”
4 Ko e fokotuʻú ni naʻe tonu ʻaupito ia ki he vakai ʻa ʻApisalomé mo e kau mātuʻa kotoa ʻo ʻIsilelí.
5 Kae kehe, naʻe pehē ʻe ʻApisalome: “Ui mai muʻa mo Hūsai+ ko e tangata mei he haʻa ʻĀlekí, pea ke tau fanongo ki he meʻa te ne leaʻakí.”
6 Ko ia naʻe haʻu ʻa Hūsai kia ʻApisalome. Pea pehē ange ʻe ʻApisalome kiate ia: “Ko e faleʻi ʻeni naʻe fai ʻe ʻAhitofelí. ʻOku totonu ke tau fai ki heʻene faleʻí? Kapau ʻe ʻikai, peá ke tala mai kiate kimautolu.”
7 Naʻe pehē ange ai ʻe Hūsai kia ʻApisalome: “Ko e faleʻi naʻe fai ʻe ʻAhitofelí ʻoku ʻikai lelei ia ʻi he meʻá ni!”+
8 Naʻe hoko atu ʻa Hūsai: “ʻOkú ke ʻilo moʻoni ko hoʻo tamaí mo ʻene kau tangatá ko e kau toʻa,+ pea ʻoku nau tōtōlili ʻo hangē ha pea kuo mole hono ʻuhikí ʻi he vaó.+ ʻIkai ngata aí, ko hoʻo tamaí ko e pāteʻi tau,+ pea heʻikai te ne nofo mo e kakaí ʻi he poʻulí.
9 ʻI he lolotongá ni ʻokú ne toi ʻi ha taha ʻo e ngaahi ʻaná* pe ʻi ha feituʻu kehe;+ pea kapau te ne ʻuluaki fai ʻa e ʻohofí, ʻe pehē ʻe he faʻahinga ʻe fanongo aí, ‘Kuo foʻi ʻa e kakai ʻoku muimui ʻia ʻApisalomé!’
10 Pea naʻa mo e tangata loto-lahi ʻoku hangē hono lotó ko e loto ʻo ha laioné+ ʻe vaivai ʻaupito ʻi he manavahē, he ko ʻIsileli kotoa ʻoku nau ʻilo ko hoʻo tamaí ko e tangata toʻa+ pea ko e kau tangata loto-lahi ʻoku ʻiate iá.
11 ʻOku ou ʻoatu ʻa e faleʻi ko ʻení: Tuku ke fakatahatahaʻi mai kiate koe ʻa ʻIsileli kotoa, mei Tani ki Pea-sipa,+ ke hangē honau tokolahí ko e ʻoneʻone ʻo e matātahí,+ pea te ke taki atu kinautolu ki he taú.
12 Te tau ʻalu atu kiate ia ki ha feituʻu pē ʻe maʻu ia ki aí, pea te tau ʻalu atu kiate ia ʻo hangē ko e tō ʻa e hahaú ki he kelekelé; pea ʻe ʻikai hao ha taha ʻo kinautolu, naʻa mo ia, pe ko ha taha pē ʻi he kau tangata ʻoku ʻiate iá.
13 Kapau te ne holomui ki ha kolo, ʻe ʻave ʻe ʻIsileli kotoa ha ngaahi maea ki he kolo ko iá, pea te tau toho hifo ia ki he teleʻá kae ʻoua ke ʻikai toe naʻa mo ha kiʻi foʻi maka.”
14 Naʻe pehē leva ʻe ʻApisalome mo e kau tangata kotoa ʻo ʻIsilelí: “ʻOku lelei ange ʻa e faleʻi ʻa Hūsai ko e tangata mei he haʻa ʻĀlekí+ ʻi he faleʻi ʻa ʻAhitofelí!” He kuo fakapapauʻi* ʻe Sihova ke veuveuki ʻa e faleʻi lelei ʻa ʻAhitofelí,+ koeʻuhí ke fakahoko mai ai ʻe Sihova ha fakatamaki kia ʻApisalome.+
15 Ki mui aí, naʻe pehē ʻe Hūsai kia Sātoki mo ʻĀpaiata+ ko e ongo taulaʻeikí: “Naʻe peheni hono faleʻi ʻe ʻAhitofeli ʻa ʻApisalome mo e kau mātuʻa ʻo ʻIsilelí, pea naʻe peheni ʻa ʻeku faleʻí.
16 Ko ia ʻoatu fakavave ha fekau kia Tēvita ʻo fakatokanga kiate ia: ‘ʻOua te ke nofo ʻi he ngaahi ʻāhanga* ofi ki he toafá he poó ni, ka ke kolosi leva, telia naʻa tafiʻi atu*+ ʻa e tuʻí mo e kakai kotoa ʻoku ʻiate iá.’”
17 Ko Sionatane+ mo ʻAhimaasi+ naʻá na nofo kinaua ʻi ʻEni-lokeli;+ ko ia naʻe ʻalu atu ha kaunanga ʻo fakahā kiate kinaua pea naʻá na ʻalu ke fakahā kia Tuʻi Tēvita, he naʻe ʻikai te na maʻu ha loto-toʻa ke fai ha vakai mai ʻokú na hū atu ki he koló.
18 Kae kehe, naʻe sio ha talavou kiate kinaua peá ne tala kia ʻApisalome. Ko ia naʻá na ʻalu fakavave atu kinaua ʻo aʻu ki he fale ʻo ha tangata ʻi Pahulimi+ ʻa ia naʻe ʻi ai ha vaikeli ʻi hono lotoʻaá. Naʻá na ʻalu hifo ki ai,
19 pea naʻe ʻufiʻufi ʻe he uaifi ʻo e tangatá ʻa e funga vaikelí pea fola ai ʻa e momomomoʻi uite; naʻe ʻikai ʻilo ha taha ki ai.
20 Naʻe aʻu atu ʻa e kau sevāniti ʻa ʻApisalomé ki he fefiné ki hono falé ʻo nau ʻeke: “Ko fē ʻa ʻAhimaasi mo Sionatane?” Naʻe tali ange ʻe he fefiné: “Naʻá na fakalaka hake ʻo ʻalu ki he vaí.”+ Pea naʻe kumi kinaua ʻe he kau tangatá ka naʻe ʻikai te nau ʻilo kinaua, ko ia naʻa nau foki ki Selusalema.
21 ʻI he hili ʻa e mavahe ʻa e kau tangatá, naʻá na ʻalu hake ki tuʻa mei he vaikelí ʻo na ʻalu ʻo fakahā kia Tuʻi Tēvita. Naʻá na pehē kiate ia: “Mou tuʻu ʻo kolosi fakavave ʻi he vaí, he ko e meʻa eni naʻe faleʻi ʻe ʻAhitofeli ke fai kiate kimoutolú.”+
22 Naʻe tuʻu hake ʻi he taimi pē ko iá ʻa Tēvita mo e kakai kotoa naʻe ʻiate iá ʻo nau kolosi ʻi Sioatani. ʻI he maʻa hake ʻa e ʻahó, naʻe ʻikai ha taha ʻe toe ke kolosi ʻi Sioatani.
23 ʻI he sio ʻa ʻAhitofeli kuo ʻikai fai ki heʻene faleʻí, naʻá ne teuteu ha ʻasi peá ne ʻalu atu ki hono falé ʻi hono koló.+ ʻI he hili ʻene ʻoatu ha ngaahi fakahinohino ki hono fāmilí,+ naʻá ne tautau* ia.+ Ko ia naʻá ne mate pea naʻe tanu ia ʻi he tanuʻanga ʻo ʻene fanga kuí.
24 Lolotonga iá, naʻe ʻalu ʻa Tēvita ki Mehanemi,+ pea ko ʻApisalome naʻe kolosi ia ʻi Sioatani mo e kau tangata kotoa ʻo ʻIsilelí.
25 Naʻe fokotuʻu ʻe ʻApisalome ʻa ʻĀmasa+ ke pule ki he kau taú ʻo fetongi ʻa Sioape;+ ko ʻĀmasá ko e foha ia ʻo ha tangata ko hono hingoá ko ʻĪtila ko e tangata ʻIsileli, ʻa ia naʻe mohe* mo ʻApikale+ ko e ʻofefine ʻo Naasi, ko e tokoua ʻo Seluvaia, ko e faʻē ʻa Sioapé.
26 Naʻe ʻapitanga ʻa ʻIsileli mo ʻApisalome ʻi he fonua ko Kiliatí.+
27 ʻI he aʻu pē ʻa Tēvita ki Mehanemí, ko Sopi ko e foha ʻo Naasi mei Lapa+ ʻo e kau ʻĀmoní, mo Mākili+ ko e foha ʻo ʻAmieli mei Lō-tipalé, pea mo Pāsiliai+ ko e tangata Kiliati mei Lokelimí
28 naʻa nau ʻomi ʻa e ngaahi mohenga, ngaahi pēsoni, ngaahi kulo ʻumea, uite, paʻale, mahoaʻa, uite tunu, piini, piini lenitile, uite mōmoa,
29 hone, pata, sipi, pea mo e siisi.* Naʻa nau ʻomi ʻa e ngaahi meʻá ni kotoa maʻa Tēvita mo e kakai naʻe ʻiate iá ke nau kai,+ he naʻa nau pehē: “ʻOku fiekaia ʻa e kakaí mo ongosia pea mo fieinua ʻi he toafá.”+
Fakamatala ‘i Lalo
^ Pe “mo vaivai hono ongo nimá.”
^ Pe “ngaahi luo; ngaahi teleʻa loloto mo fāsiʻi.”
^ Pe “fekau.”
^ Fakafoʻilea, “folofua.”
^ Pe ngalingali, “ngaahi toafa tokalelei.”
^ Pe “noʻouʻa.”
^ Pe “fehokotaki fakasino.”
^ Fakafoʻilea, “huʻakau fatu ʻo e pulú.”
