Ua Sāmiuela 2:1-32
2 ʻI he hili iá, naʻe fehuʻi ʻa Tēvita kia Sihova,+ ʻo pehē: “Te u ʻalu hake ki ha taha ʻo e ngaahi kolo ʻo Siutá?” Naʻe folofola ange ʻa Sihova kiate ia: “ʻAlu hake.” Naʻe ʻeke ange leva ʻe Tēvita: “Ko fē te u ʻalu ki aí?” Naʻá ne tali mai: “Ki Hepeloni.”+
2 Ko ia naʻe ʻalu hake ki ai ʻa Tēvita mo hono ongo uaifí, ʻa ʻAhinoami+ mei Sisililí pea mo ʻApikale+ ʻa ia naʻe hoko ko e uaifi ʻo Nāpale ko e tangata Kāmelí.
3 Naʻe ʻohake foki ʻe Tēvita mo e kau tangata naʻe ʻiate iá,+ ko e tokotaha taki taha mo hono fāmili, pea naʻa nau nofo ʻi he ngaahi kolo takatakai ʻo Hepeloní.
4 Pea naʻe aʻu mai ʻa e kau tangata ʻo Siutá, pea naʻa nau pani ai ʻa Tēvita ke hoko ko e tuʻi ki he fale ʻo Siutá.+
Naʻa nau tala ange kia Tēvita: “Ko e kau tangata ʻo Siepesi-kiliatí ʻa e faʻahinga naʻa nau tanu ʻa Saulá.”
5 Ko ia naʻe fekauʻi atu ʻe Tēvita ha kau talafekau ki he kau tangata ʻo Siepesi-kiliatí ke pehē kiate kinautolu: “ʻOfa ke faitāpuekina kimoutolu ʻe Sihova, koeʻuhi ko hoʻomou fakahāhā ʻa e ʻofa mateaki ki homou ʻeiki ko Saulá ʻi hoʻomou tanu iá.+
6 ʻOfa ke fakahaaʻi atu ʻe Sihova ʻa e ʻofa mateaki mo e faitōnunga kiate kimoutolu. Te u anga-ʻofa atu foki mo au kiate kimoutolu koeʻuhi ko hoʻomou fai ʻa e meʻá ni.+
7 Pea ko eni, mou ʻai homou nimá ke mālohi pea mou hoko ko ha kau tangata loto-toʻa, he ko homou ʻeiki ko Saulá kuo mate, pea kuo pani au ʻe he fale ʻo Siutá ke u hoko ko ha tuʻi kiate kinautolu.”
8 Ka ko ʻĀpina+ ko e foha ʻo Naá, ko e ʻeiki ʻo e kau tau ʻa Saulá, naʻá ne ʻave ʻa e foha ʻo Saula ko ʻIsi-pōsetí,+ ʻo ne kolosi mo ia ki Mehanemi+
9 pea naʻá ne fakanofo ia ko e tuʻi ki Kiliati,+ ki he kau ʻAsulí, Sisilili,+ ʻIfalemi,+ Penisimani, pea ki he kotoa ʻo ʻIsilelí.
10 Ko ʻIsi-pōseti, foha ʻo Saulá, naʻe taʻu 40 ʻi he taimi naʻá ne hoko ai ko e tuʻi ki ʻIsilelí, pea naʻá ne pule ʻi he taʻu ʻe ua. Kae kehe, naʻe poupou ʻa e fale ʻo Siutá ia kia Tēvita.+
11 Ko e taimi* naʻe tuʻi ai ʻa Tēvita ʻi Hepeloni ki he fale ʻo Siutá ko e taʻu ʻe fitu mo e māhina ʻe ono.+
12 ʻI he faai mai ʻa e taimí, naʻe ʻalu atu ʻa ʻĀpina ko e foha ʻo Naá pea mo e kau sevāniti ʻa ʻIsi-pōseti, ko e foha ʻo Saulá, mei Mehanemi+ ki Kipione.+
13 Naʻe ʻalu atu foki mo Sioape+ ko e tama ʻa Seluvaiá+ pea mo e kau sevāniti ʻa Tēvitá ʻo fakafetaulaki kiate kinautolu ʻi he vai ʻo Kipioné; pea naʻe tangutu ʻa e kulupu ʻe taha ʻi he tafaʻaki ʻe taha ʻo e vaí, pea tangutu mai ʻa e kulupu ko ē ʻi he tafaʻaki ʻe taha ʻo e vaí.
14 Naʻe faifai pē pea pehē ʻe ʻĀpina kia Sioape: “Tuku ke tuʻu hake ʻa e kau talavoú ʻo faitau* ʻi hota ʻaó.” ʻI he meʻá ni naʻe pehē ai ʻe Sioape: “Tuku ke nau tuʻu hake.”
15 Ko ia naʻa nau tuʻu hake ʻo nau laka atu ʻi ha tokolahi pau, ko e toko 12 maʻa Penisimani mo e foha ʻo Saula ko ʻIsi-pōsetí pea toko 12 mei he kau sevāniti ʻa Tēvitá.
16 Naʻa nau puke taki taha ʻa e ʻulu ʻo hono fili pea nau taki taha fetuiaki ʻenau heletaá ʻi he tapaʻikete ʻo hono fili, pea nau tō fakataha kotoa hifo ki lalo. Ko ia ko e feituʻu ko iá, ʻa ia ʻoku ʻi Kipioné, naʻe ui ko Helekati-hasulimi.
17 Ko e faitau naʻe hoko atu aí naʻe mātuʻaki kakaha ia ʻi he ʻaho ko iá, pea naʻe iku foʻi ai ʻa ʻĀpina mo e kau tangata ʻo ʻIsilelí ʻi he ʻao ʻo e kau sevāniti ʻa Tēvitá.
18 Pea naʻe ʻi ai ʻa e fānau tangata ʻe toko tolu ʻa Seluvaiá+—ko Sioape,+ ʻApisai,+ mo ʻAsaeli;+ pea ko ʻAsaelí naʻe veʻe-vave ʻo hangē ha kāseli kaivaó.
19 Naʻe tuli ʻa ʻAsaeli kia ʻĀpina, pea naʻe ʻikai te ne afe ki toʻomataʻu pe ki toʻohema ʻi heʻene tuli kia ʻĀpiná.
20 ʻI he hanga mai ʻa ʻĀpina ki muí, naʻá ne ʻeke, “Ko koe ena, ʻAsaeli?” Naʻá ne tali atu, “ʻIo, ko au ia.”
21 Naʻe pehē ange leva ʻe ʻĀpina kiate ia: “Afe ki ho toʻomataʻú pe ki ho toʻohemá peá ke puke ha taha ʻo e kau talavoú, peá ke toʻo maʻau ha meʻa pē te ke huʻi meiate ia.” Ka naʻe ʻikai ke loto ʻa ʻAsaeli ke taʻofi ʻene tuli kiate iá.
22 Ko ia naʻe toe pehē ʻe ʻĀpina kia ʻAsaeli: “Tuku hoʻo tuli kiate aú. Ko e hā ke u taaʻi ai koé? ʻE fēfē ai haʻaku sio ki he mata ʻo ho tokoua ko Sioapé?”
23 Ka naʻá ne fakafisi ai pē ke tuku ʻene tulí, ko ia naʻe hanga ai ʻe ʻĀpina ʻo hokaʻi ia ʻi hono keté ʻaki ʻa e muiʻi taó,+ pea naʻe ʻasi ʻa e taó ʻi hono tuʻá; pea naʻá ne tō ai ʻo ne mate ʻi he feituʻu ko iá. Ko e tokotaha kotoa pē naʻe aʻu mai ki he feituʻu naʻe tō ai ʻa ʻAsaeli ʻo ne maté naʻá ne tuʻu ʻo kiʻi taimi ai.
24 Naʻe tuli leva ʻa Sioape mo ʻApisai kia ʻĀpina. ʻI he tāitō ʻa e laʻaá, naʻá na aʻu ki he foʻi māʻolunga ko ʻAmá, ʻa ia ʻoku hanga ki Kia ʻi he hala ki he toafa ʻo Kipioné.
25 Pea naʻe fakatahataha ai ʻa e haʻa Penisimaní kia ʻĀpina, pea naʻa nau hoko ai ko ha kongakau ʻe taha pea nau tuʻu ʻi he tumutumu ʻo ha foʻi māʻolunga.
26 Naʻe ui atu leva ʻa ʻĀpina kia Sioape: “ʻE fai ai pē ʻa e keina ʻa e heletaá ʻo taʻengata? ʻIkai ʻokú ke ʻilo ko e olá ko e koto kona pē ʻe hoko aí? Ko e hā leva hono fuoloa pea te ke toki tala ki he kakaí ke nau tafoki mei he tuli ki honau fanga tokouá?”
27 Naʻe pehē ange ai ʻe Sioape: “ʻOku ou fuakava ʻi he ʻOtua moʻoni ʻoku moʻuí, kapau naʻe ʻikai te ke lea mai, ne toki tuku pē ʻa e tuli ʻa e kakaí ki honau fanga tokouá ʻi he aʻu ki he pongipongí.”
28 Naʻe ifi leva ʻe Sioape ʻa e meʻaifí, pea naʻe tuku leva ʻe heʻene kau tangatá ʻenau tuli ki ʻIsilelí, pea tuku ai mo e faitaú.
29 Naʻe ʻalu leva ʻa ʻĀpina mo ʻene kau tangatá ʻo fou ʻi he ʻAlapá+ ʻi he pō kotoa ko iá ʻo nau kolosi ʻi Sioatani pea nau ʻalu atu ʻo fou ʻi he teleʻá fakakātoa* pea nau toki aʻu ai ki Mehanemi.+
30 ʻI he hili ʻa e tafoki ʻa Sioape mei he tuli kia ʻĀpiná, naʻá ne fakatahatahaʻi kotoa ʻa e kakaí. ʻI he kau sevāniti ʻa Tēvitá, naʻe mole mei ai ʻa e toko 19, ʻo tānaki atu ki ai mo ʻAsaeli.
31 Ka naʻe ikunaʻi ʻe he kau sevāniti ʻa Tēvitá ia ʻa e haʻa Penisimaní pea mo e kau tangata ʻa ʻĀpiná, pea ko ʻenau kau tangata ʻe toko 360 naʻe maté.
32 Naʻa nau ʻave ʻa ʻAsaeli+ ʻo tanu ia ʻi he fonualoto ʻo ʻene tamaí, ʻa ia ʻoku ʻi Pētelihema.+ Pea naʻe ʻalu atu leva ʻa Sioape mo ʻene kau tangatá ʻi he poó kotoa, pea nau aʻu ki Hepeloni+ ʻi he maama mai ʻa e ʻahó.
Fakamatala ‘i Lalo
^ Fakafoʻilea, “Ko e lahi ʻo e ngaahi ʻaho.”
^ Pe “fai ha feʻauhi.”
^ Pe ngalingali, “ʻi he kotoa ʻo Pitiloní.”
