Ua Sāmiuela 4:1-12
4 ʻI he fanongo ʻa e foha ʻo Saula ko ʻIsi-pōsetí+ kuo mate ʻa ʻĀpina ʻi Hepeloní,+ naʻe mole ʻene loto-toʻá* pea naʻe moʻutāfuʻua ai mo e kotoa ʻo e kau ʻIsilelí.
2 Naʻe ʻi ai ha ongo tangata naʻá na pule ʻi he kau kaihaʻa fakamālohi ʻa e foha ʻo Saulá: Ko e hingoa ʻo e taha ko Peana pea ko e tokotaha ʻe tahá ko Lēkapi. Ko e ongo foha kinaua ʻo Līmoni ko e tangata Pieloti ʻo e matakali ʻo Penisimaní. (He ko Pielotí+ foki naʻe faʻa lau ia ko e konga ʻo Penisimani.
3 Naʻe hola ʻa e kau Pielotí ki Kitaimi,+ pea ko e kau nofo muli kinautolu ʻi ai ʻo aʻu mai ki he ʻahó ni.)
4 Pea ko e foha ʻo Saula ko Sionatané+ naʻe ʻi ai hono foha naʻe heke hono ongo vaʻé.+ Naʻá ne taʻu nima ʻi he taimi naʻe aʻu mai ai ʻa e fakamatala fekauʻaki mo Saula mo Sionatane mei Sisililí,+ pea naʻe fua ia ʻe hono tauhí peá na hola, ka ʻi he manavahē ʻa e fefiné ni heʻene holá, naʻe tō ai ʻa e kiʻi tamasiʻí ʻo ne heke. Ko hono hingoá ko Mefipōseti.+
5 Ko e ongo foha ʻo Līmoni ko e tangata Pielotí, ʻa Lēkapi mo Peana, naʻá na ʻalu ki he fale ʻo ʻIsi-pōsetí he lolotonga ʻa e taimi vela ʻo e ʻahó, lolotonga ia ʻene mālōlō he hoʻataá.
6 Naʻá na hū ki he falé ʻo hangē nai ko haʻana fetuku uité, pea naʻá na hokaʻi ia ʻi hono keté; hili iá naʻe hola leva ʻa Lēkapi mo hono tokoua ko Peaná.+
7 ʻI he taimi naʻá na hū ai ki he falé, naʻá ne lolotonga tokoto ʻi hono mohengá ʻi hono lokí, pea naʻá na hokaʻi ia ʻo ne mate, ʻi he hili iá naʻá na tuʻusi hono ʻulú. Naʻá na toʻo leva hono ʻulú ʻo na lue mo ia ʻi he poó kotoa ʻi he hala ki he ʻAlapá.
8 Pea naʻá na ʻomi ʻa e ʻulu ʻo ʻIsi-pōsetí+ kia Tēvita ki Hepeloni ʻo na pehē ki he tuʻí: “Ko e ʻulu ʻeni ʻo ʻIsi-pōseti ko e foha ʻo Saula ko ho filí+ ʻa ia naʻá ne kumi ki hoʻo moʻuí.+ ʻI he ʻahó ni kuo tuku ʻe Sihova ki homa ʻeiki ko e tuʻí ʻa e sāuni kia Saula mo hono hakó.”
9 Kae kehe, naʻe tali ange ʻa Tēvita kia Lēkapi mo hono tokoua ko Peaná, ʻa e ongo foha ʻo Līmoni ko e tangata Pielotí, ʻo ne pehē kiate kinaua: “ʻOku ou fuakava ʻia Sihova ko e ʻOtua moʻuí, ʻa e tokotaha naʻá ne fakahaofi au mei he ngaahi faingataʻa kotoa pē,+
10 ʻi he taimi naʻe fakahaaʻi mai ai ʻe ha taha kiate au, ‘Ko Saula ē kuo mate,’+ pea naʻá ne fakakaukau naʻá ne ʻomai kiate au ha ongoongo leleí, naʻá ku puke mai ia+ ʻo u tāmateʻi ʻi Sikilaki. Ko e totongi ia naʻe maʻu ʻe he tokotaha talafekaú meiate aú!
11 Huanoa hake ai ʻa e taimi kuo tāmateʻi ai ʻe ha ongo tangata fulikivanu ha tangata māʻoniʻoni ʻi hono fale ʻoʻoná ʻi hono mohengá! Meʻa ní heʻikai te u ʻeke hono totó mei homo nimá+ pea tafiʻi atu kimoua mei he māmaní?”
12 Naʻe tuʻutuʻuni leva ʻa Tēvita ki he kau talavoú ke nau tāmateʻi kinaua.+ Naʻa nau tuʻusi hona nimá mo e vaʻé pea tautau kinaua+ ʻi he veʻe vai ʻi Hepeloni. Ka naʻa nau ʻave ʻa e ʻulu ʻo ʻIsi-pōsetí ʻo tanu ʻi he feituʻu naʻe tanu ai ʻa ʻĀpina ʻi Hepeloní.
Fakamatala ‘i Lalo
^ Fakafoʻilea, “naʻe hoko ʻo vaivai hono nimá.”
