Ua Sāmiuela 6:1-23
6 Naʻe toe fakatahatahaʻi ʻe Tēvita ʻa e kotoa ʻo e kau tau lelei taha ʻi ʻIsilelí, ko e kau tangata ʻe toko 30,000.
2 Pea naʻe ʻalu atu ʻa Tēvita mo e kau tangata kotoa naʻe ʻiate iá ki Peale-siuta ke ʻohake mei ai ʻa e ʻAʻake ʻa e ʻOtua moʻoní,+ ʻa ia ʻoku ui ai ʻa e kakaí ʻi hono ʻaó ki he huafa ʻo Sihova ʻo e ngaahi kau taú,+ ʻa e tokotaha ʻokú ne ʻafio ʻi he taloni ʻi ʻolunga ʻi he* ongo selupimí.+
3 Kae kehe, naʻa nau fakaheka ʻa e ʻAʻake ʻa e ʻOtua moʻoní ki ha saliote foʻou+ ke ʻave ai ia mei he fale ʻo ʻApinatapí,+ ʻa ia naʻe tuʻu ʻi he foʻi māʻolungá; pea ko ʻUsa mo ʻAhio, ko e ongo foha ʻo ʻApinatapí, naʻá na takimuʻa mai ʻi he saliote foʻoú.
4 Ko ia, naʻa nau ʻave ʻa e ʻAʻake ʻa e ʻOtua moʻoní mei he fale ʻo ʻApinatapi naʻe ʻi he foʻi māʻolungá, pea naʻe luelue ʻa ʻAhio ʻi muʻa ʻi he ʻAʻaké.
5 Ko Tēvita mo e kotoa ʻo e fale ʻo ʻIsilelí naʻa nau fakafiefia ʻi he ʻao ʻo Sihová ʻaki ʻa e faʻahinga meʻalea kehekehe naʻe ngaohi mei he ʻakau ko e siunipá, mo e ngaahi haʻape, mo e ngaahi meʻalea filo+ kehe, mo e ngaahi nafa,+ mo e ngaahi fāngongo pea mo e ngaahi simipale.+
6 Ka ʻi heʻenau aʻu ki he ʻauʻauʻanga uite ko Nākoní, naʻe ala atu ʻa e nima ʻo ʻUsá ki he ʻAʻake ʻa e ʻOtua moʻoní ʻo ne puke ia,+ he naʻe meimei tō ia ʻi he ngāue ʻa e ongo pulú.
7 Ko ia naʻe hoko hifo ʻa e houhau kakaha ʻa Sihová kia ʻUsa, pea naʻe taaʻi ia+ ai ʻe he ʻOtua moʻoní ʻi heʻene tōʻonga taʻemolumalú,+ pea naʻá ne mate ai ʻi he tafaʻaki ʻo e ʻAʻake ʻa e ʻOtua moʻoní.
8 Ka naʻe ʻita* ʻa Tēvita koeʻuhí ko e hoko hifo ʻa e houhau ʻa Sihová kia ʻUsá; pea kuo ui ʻa e feituʻu ko iá ko Pelesi-usa* ʻo aʻu mai ki he ʻahó ni.
9 Ko ia naʻe manavahē ʻa Tēvita ʻia Sihova+ ʻi he ʻaho ko iá peá ne pehē: “ʻE lava fēfē ke aʻu mai kiate au+ ʻa e ʻAʻake ʻa Sihová?”
10 Naʻe ʻikai loto ʻa Tēvita ke ʻomi ʻa e ʻAʻake ʻa Sihová ki he feituʻu naʻá ne ʻi aí ʻi he Kolo-ʻo-Tēvitá.+ Ka naʻe ʻai ʻe Tēvita ke ʻave ia ki he fale ʻo ʻŌpeti-ʻītomi+ ko e tangata Katí.
11 Naʻe tuku ʻa e ʻAʻake ʻa Sihová ʻi he fale ʻo ʻŌpeti-ʻītomi ko e tangata Katí ʻi he māhina ʻe tolu, pea naʻe faitāpuekina ai pē ʻe Sihova ʻa ʻŌpeti-ʻītomi mo hono falé kotoa.+
12 Naʻe fakahā kia Tuʻi Tēvita: “Kuo faitāpuekina ʻe Sihova ʻa e fale ʻo ʻŌpeti-ʻītomí mo e meʻa kotoa ʻoku ʻaʻaná koeʻuhí ko e ʻAʻake ʻa e ʻOtua moʻoní.” Ko ia naʻe ʻalu atu ʻa Tēvita ke ʻohake ʻa e ʻAʻake ʻa e ʻOtua moʻoní mei he fale ʻo ʻŌpeti-ʻītomí ki he Kolo-ʻo-Tēvitá ʻi he fiefia.+
13 ʻI he taimi naʻe laka atu ai ʻa e faʻahinga naʻa nau fua+ ʻa e ʻAʻake ʻa Sihová ʻi ha foʻi manga ʻe ono, naʻá ne feilaulauʻi ai ha pulu pea mo ha manu sisino.
14 Naʻe tauʻolunga takai ʻa Tēvita ʻi he ʻao ʻo Sihová ʻaki hono mālohí kotoa; lolotonga iá naʻe tui* ʻe Tēvita ha ʻēfoti līneni.+
15 Naʻe ʻohake ʻe Tēvita pea mo e fale kotoa ʻo ʻIsilelí ʻa e ʻAʻake+ ʻa Sihová fakataha mo e kaikaila fiefia+ pea mo e leʻo ʻo e meʻaifi.+
16 Ka ʻi he taimi naʻe aʻu mai ai ʻa e ʻAʻake ʻa Sihová ki he Kolo-ʻo-Tēvitá, naʻe sio hifo ʻa e ʻofefine ʻo Saula ko Maikalé+ ʻi he matapā-teké ʻo ne sio kia Tuʻi Tēvita ʻokú ne hopohopo mo tauʻolunga takai ʻi he ʻao ʻo Sihová; pea naʻe kamata ke ne taʻetokaʻi ia ʻi hono lotó.+
17 Ko ia naʻa nau fakahū mai ʻa e ʻAʻake ʻa Sihová ʻo tuku ia ʻi hono tuʻuʻangá ʻi loto ʻi he tēniti naʻe ʻosi fokotuʻu ʻe Tēvita ke tuku aí.+ Hili iá, naʻe ʻoatu ʻe Tēvita ha ngaahi feilaulau tutu+ mo ha ngaahi feilaulau feʻinasiʻaki+ ʻi he ʻao ʻo Sihová.+
18 ʻI he hili hono ʻoatu ʻe Tēvita ʻa e ngaahi feilaulau tutú mo e ngaahi feilaulau feʻinasiʻakí, naʻá ne tāpuakiʻi ʻa e kakaí ʻi he huafa ʻo Sihova ʻo e ngaahi kau taú.
19 ʻIkai ngata aí, naʻá ne tufa atu ki he kakaí kotoa, ki he fuʻu tokolahi kotoa ʻo ʻIsilelí, ki he tangata mo e fefine taki taha, ha foʻi mā fuo hangē ha foʻi mamá, ko ha takaonga teiti,* pea mo ha takaonga fuamelie,* pea ʻi he hili iá naʻe mavahe ʻa e kakaí kotoa, ʻa e tokotaha taki taha ki hono fale ʻoʻona.
20 ʻI he foki mai ʻa Tēvita ke tāpuakiʻi ʻa hono fale ʻoʻoná, naʻe hū ki tuʻa ʻa e ʻofefine ʻo Saula ko Maikalé+ ke fakafetaulaki kiate ia. Naʻá ne pehē: “He taʻelāngilangiʻia ē ko e tuʻi ʻo ʻIsilelí ʻi heʻene fakatelefuaʻi atu ia ʻi he ʻahó ni ʻo vakai ki ai ʻa e kau kaunanga ʻa ʻene kau sevānití, ʻo hangē tofu pē ko ha tangata vale ʻokú ne fakatelefuaʻi fakahāhā atu iá!”+
21 ʻI he meʻá ni naʻe pehē ʻe Tēvita kia Maikale: “Ko ʻeku fakafiefiá naʻe fai ia ʻi he ʻao ʻo Sihová, ʻa ia naʻá ne fili au kae ʻikai ko hoʻo tamaí mo hono falé kotoa pea naʻá ne fakanofo au ke u hoko ko e taki ʻo e kakai ʻa Sihová, ʻa ʻIsileli.+ Ko ia ai, te u fakafiefia ʻi he ʻao ʻo Sihová,
22 pea ʻe toe lahi ange heni ʻeku fakamāʻulaloʻi aú peá u hoko ʻo māʻulalo naʻa mo e ʻi he vakai ʻaʻakú. Ka ʻi he kau kaunanga ʻa ia naʻá ke lave ki aí, ʻi heʻenau vakaí te u fakalāngilangiʻi ai au.”
23 Ko ia naʻe ʻikai ha fānau ʻa e ʻofefine ʻo Saula ko Maikalé+ ʻo aʻu ki he ʻaho naʻe mate aí.
Fakamatala ‘i Lalo
^ Pe ngalingali, “ʻi he vahaʻa ʻo e.”
^ Pe “mamahi.”
^ ʻOku ʻuhingá ko e “Pā Mai ʻa e Houhaú kia ʻUsa.”
^ Fakafoʻilea, “naʻe noʻo.”
^ ʻOku ʻuhinga eni ki he fuaʻi paame tauaki kuo fakafuo ʻo hangē ha keké.
^ ʻOku ʻuhinga eni ki he kālepi tauaki kuo fakafuo ʻo hangē ha keké.
