Ua Sāmiuela 9:1-13
-
ʻOfa mateaki ʻa Tēvita kia Mefipōsetí (1-13)
9 Naʻe pehē leva ʻe Tēvita: “ʻOku kei toe ha taha ʻi he fale ʻo Saulá ʻa ia ʻe lava ke u fakahāhā ki ai ha ʻofa mateaki koeʻuhí ko Sionatane?”+
2 Pea naʻe ʻi ai ha sevāniti ʻi he fale ʻo Saulá ko hono hingoá ko Sipa.+ Ko ia naʻa nau ui mai ia kia Tēvita, pea naʻe ʻeke ange ʻe he tuʻí kiate ia: “Ko Sipa koā koe?” Naʻá ne tali ange: “Ko au ia ko hoʻo sevānití.”
3 Naʻe hoko atu ʻa e tuʻí: “ʻOku kei toe ha taha ʻi he fale ʻo Saulá ʻa ia ʻe lava ke u fakaaʻu atu ki ai ʻa e ʻofa mateaki ʻa e ʻOtuá?” Naʻe tali mai ʻe Sipa ki he tuʻí: “ʻOku kei ʻi ai ʻa e foha ʻe toko taha ʻo Sionatane; ʻoku mamatea* fakatouʻosi ʻa hono ongo vaʻé.”+
4 Naʻe ʻeke ʻe he tuʻí kiate ia: “ʻOku ʻi fē ia?” Naʻe tali ange ʻe Sipa ki he tuʻí: “ʻOkú ne ʻi he fale ʻo Mākili+ ko e foha ʻo ʻAmielí ʻi Lō-tipale.”
5 Naʻe fai ʻe Tuʻi Tēvita ha fekau ʻi he taimi pē ko iá ke ne haʻu pea naʻe ʻomi ia mei he fale ʻo Mākili ko e foha ʻo ʻAmielí ʻi Lō-tipale.
6 ʻI he aʻu atu ʻa Mefipōseti ko e foha ʻo Sionatane ko e foha ʻo Saulá kia Tēvitá, naʻá ne tō foʻohifo ʻi he taimi pē ko iá ʻo ne fakatōmapeʻe. Naʻe pehē ange leva ʻe Tēvita: “ʻE Mefipōseti,” ʻa ia naʻá ne tali mai: “Ko eni ia ʻa hoʻo sevānití.”
7 Naʻe pehē ange ʻe Tēvita kiate ia: “ʻOua te ke ilifia, he te u fakahāhā moʻoni ʻa e ʻofa mateaki+ kiate koe koeʻuhi ko hoʻo tamai ko Sionatané, pea te u fakafoki atu kiate koe ʻa e kelekele kotoa ʻo Saula ko hoʻo kuí, pea te ke kai* maʻu pē ʻi heʻeku tēpilé.”+
8 Ko ia naʻá ne fakatōmapeʻe ai ʻo ne pehē: “Ko e hā ʻa hoʻo sevānití, kuó ke fakahanga ai ʻa hoʻo tokangá* ki ha kulī mate+ hangē ko aú?”
9 Pea naʻe fekau leva ʻe he tuʻí ke ʻomi ʻa Sipa, ʻa e tamaioʻeiki ʻa Saulá, peá ne pehē kiate ia: “Ko e meʻa kotoa pē naʻe ʻa Saula pea mo hono falé kotoa ʻoku ou foaki ia ki he mokopuna ʻo Saula ko ho ʻeikí.+
10 Te ke ngoueʻi ʻa e kelekelé maʻana—ʻa koe mo ho ngaahi fohá mo hoʻo kau sevānití—pea te ke tānaki ʻa hono fuá ke tokonaki ha meʻakai maʻá e faʻahinga ʻoku nau ʻi he mokopuna ʻo ho ʻeikí ke nau kai. Ka ko Mefipōseti, ʻa e mokopuna ʻo ho ʻeikí, te ne kai maʻu pē ʻi heʻeku tēpilé.”+
Pea ko Sipá naʻe ʻi ai hono ngaahi foha ʻe toko 15 mo ʻene kau sevāniti ʻe toko 20.+
11 Naʻe pehē ange leva ʻe Sipa ki he tuʻí: “ʻE fai ʻe hoʻo sevānití ʻa e meʻa kotoa ʻoku fekau mai ʻe hoku ʻeiki ko e tuʻí ki heʻene sevānití ke ne faí.” Ko ia naʻe kai ai ʻa Mefipōseti ʻi he tēpile ʻa Tēvitá ʻo hangē ko e taha ia ʻo e ngaahi foha ʻo e tuʻí.
12 Pea naʻe ʻi ai foki ha kiʻi foha ʻo Mefipōseti ʻa ia ko hono hingoá ko Mika;+ pea ko e faʻahinga kotoa naʻe nofo ʻi he fale ʻo Sipá naʻa nau hoko ko e kau sevāniti ʻa Mefipōseti.
13 Pea naʻe nofo ʻa Mefipōseti ʻi Selusalema, he naʻá ne kai maʻu pē ʻi he tēpile ʻa e tuʻí;+ pea naʻe mamatea fakatouʻosi ʻa hono ongo vaʻé.+
