Ua Kalonikali 12:1-16
12 ʻI he hili pē hono fokotuʻu maʻu+ ʻa e tuʻunga-tuʻi ʻo Lehopoamé peá ne hoko ʻo mālohí, naʻá ne liʻaki ʻa e Lao ʻa Sihová,+ pea pehē foki ki he kotoa ʻo ʻIsileli naʻe ʻiate iá.
2 ʻI he taʻu hono nima ʻo e pule ʻa Tuʻi Lehopoamé, naʻe ʻalu hake ʻa Tuʻi Sīsake+ ʻo ʻIsipité ke tauʻi ʻa Selusalema, he naʻa nau taʻefaitōnunga kia Sihova.
3 Naʻe ʻi ai ʻene saliote ʻe 1,200, mo e kau tangata heka hoosi ʻe toko 60,000, mo e kau tau taʻefaʻalaua ʻa ia naʻa nau omi mo ia mei ʻIsipite—ko e kau Līpia, kau Sūkimi, pea mo e kau ʻItiopea.+
4 Naʻá ne hamu ʻa e ngaahi kolo fakakolotau ʻo Siutá pea faifai pē ʻo ne aʻu ki Selusalema.
5 Naʻe haʻu ʻa Semaia+ ko e palōfitá kia Lehopoame mo e houʻeiki ʻo Siuta ʻa ia naʻa nau fakatahataha ʻi Selusalema koeʻuhi ko Sīsaké, pea naʻá ne pehē ange kiate kinautolu: “Ko e folofola eni ʻa Sihová, ‘Kuo mou liʻaki au, ko ia kuó u liʻaki atu foki kimoutolu+ ki he nima ʻo Sīsaké.’”
6 Ko ia naʻe fakatōkilaloʻi ʻe he houʻeiki ʻo ʻIsilelí mo e tuʻí kinautolu+ pea nau pehē: “ʻOku māʻoniʻoni ʻa Sihova.”
7 ʻI he vakai ʻa Sihova kuo nau fakatōkilaloʻi kinautolú, naʻe hoko mai ʻa e folofola ʻa Sihová kia Semaia, ʻo pehē: “Kuo nau fakatōkilaloʻi kinautolu. ʻE ʻikai te u fakaʻauha kinautolu,+ pea kuo vavé ni ke u fakahaofi kinautolu. ʻE ʻikai te u huaʻi atu ʻeku houhaú ki Selusalema fakafou ʻia Sīsake.
8 Ka te nau hoko ko ʻene kau sevāniti, koeʻuhi ke nau ʻiloʻi ai ʻa e faikehekehe ʻo e ngāue kiate aú mo e ngāue ki he ngaahi tuʻi* ʻo e ngaahi fonua kehé.”
9 Ko ia naʻe ʻalu hake ai ʻa Tuʻi Sīsake ʻo ʻIsipité ʻo tauʻi ʻa Selusalema. Naʻá ne ʻave ʻa e ngaahi koloa ʻi he fale ʻo Sihová+ mo e ngaahi koloa ʻi he fale* ʻo e tuʻí. Naʻá ne ʻave ʻa e meʻa kotoa pē, ʻo kau ai ʻa e ngaahi fuʻu pā koula ʻa ia naʻe ngaohi ʻe Solomoné.+
10 Ko ia naʻe ngaohi ʻe Tuʻi Lehopoame ʻa e ngaahi fuʻu pā kopa ke fetongiʻaki ia, pea naʻá ne tuku ia ki he kau pule kaʻaté,* ʻa ia naʻa nau leʻohi ʻa e hūʻanga ki he fale ʻo e tuʻí.
11 ʻI he taimi pē naʻe haʻu ai ʻa e tuʻí ki he fale ʻo Sihová, naʻe faʻa hū ʻa e kau kaʻaté ʻo toʻo ia, pea naʻa nau fakafoki leva ia ki he loki kaʻaté.
12 Koeʻuhí naʻe fakatōkilaloʻi ʻe he tuʻí ʻa ia tonu, naʻe tafoki ʻa Sihova mei heʻene houhau kiate iá,+ pea naʻe ʻikai te ne fakaʻauha fakaʻaufuli kinautolu.+ ʻIkai ngata aí, naʻe ʻi ai ha ngaahi lelei naʻe ʻilo ʻi Siuta.+
13 Naʻe ʻai ʻe Tuʻi Lehopoame ke mālohi ʻa hono tuʻungá ʻi Selusalema pea naʻe hokohoko atu ʻa ʻene pulé; naʻe taʻu 41 ʻa Lehopoame ʻi heʻene hoko ko e tuʻí, pea naʻá ne pule ʻi he taʻu ʻe 17 ʻi Selusalema, ʻa e kolo naʻe fili ʻe Sihova mei he ngaahi matakali kotoa pē ʻo ʻIsilelí ke hoko ko e feituʻu ia ke ʻai ki ai hono huafá. Ko e hingoa ʻo e faʻē ʻa e tuʻí ko Naama ko e fefine ʻĀmoni.+
14 Ka naʻe fai ʻe he tuʻí ʻa e meʻa naʻe kovi, he naʻe ʻikai ke ne fakapapauʻi ʻi hono lotó ke kumi kia Sihova.+
15 Ko e meʻa ki he hisitōlia ʻo Lehopoamé, mei he kamataʻangá ki he ngataʻangá, ʻikai kuo hiki ia ʻi he ngaahi lea ʻa Semaia+ ko e palōfitá pea mo ʻIto+ ko e tokotaha-vīsoné ʻi he lēkooti ʻo e tohi hohokó? Pea naʻe fai maʻu pē ha tau ʻi he vahaʻa ʻo Lehopoame mo Selopoamé.+
16 Pea naʻe toka ʻa Lehopoame ʻo mālōlō fakataha mo ʻene fanga kuí pea naʻe tanu ia ʻi he Kolo-ʻo-Tēvitá;+ pea naʻe hoko ʻa hono foha ko ʻĀpaiá+ ko e tuʻi ʻo fetongi ia.
Fakamatala ‘i Lalo
^ Fakafoʻilea, “ngaahi puleʻanga.”
^ Pe “palasi.”
^ Fakafoʻilea, “kau pule ʻo e kau lelé.”
