Ua Kalonikali 13:1-22
13 ʻI he taʻu hono 18 ʻo e pule ʻa Tuʻi Selopoamé, naʻe hoko ai ʻa ʻĀpaia ko e tuʻi ki Siuta.+
2 Naʻá ne pule ʻi he taʻu ʻe tolu ʻi Selusalema. Ko e hingoa ʻo ʻene faʻeé ko Maikaia+ ko e ʻofefine ʻo ʻUlieli ʻo Kīpeá.+ Pea naʻe fai ha tau ʻi he vahaʻa ʻo ʻĀpaia mo Selopoamé.+
3 Ko ia naʻe ʻalu atu ai ʻa ʻĀpaia ki he taú mo ha kau tau ko e kau tangata pāteʻi tau kuo ʻosi akoʻi*+ ʻe toko 400,000. Pea naʻe fakatē tau ʻa Selopoame ke tauʻi ia fakataha mo ha kau pāteʻi tau kuo ʻosi akoʻi* ʻe toko 800,000.
4 Pea naʻe tuʻu ʻa ʻĀpaia ʻi he Moʻunga Simalaimí, ʻa ia ʻoku ʻi he feituʻu moʻungaʻia ʻo ʻIfalemí, ʻo ne pehē: “Fanongo mai, ʻe Selopoame pea mo ʻIsileli kotoa.
5 Kuo ʻikai koā ke mou ʻilo naʻe foaki ʻe Sihova ko e ʻOtuá kia Tēvita ʻa e puleʻanga ʻo ʻIsilelí ʻo taʻengata,+ kiate ia mo hono ngaahi fohá,+ ʻi ha fuakava māsima?*+
6 Ka ko Selopoame+ ko e foha ʻo Nīpatí, ʻa e sevāniti ʻa e foha ʻo Tēvita ko Solomoné, naʻá ne tuʻu hake ʻo ne angatuʻu ki hono ʻeikí.+
7 Pea naʻe hanganaki fakatahataha kiate ia ha kau tangata fakapikopiko pea ko e kau koto taʻeʻaonga. Pea naʻa nau lavameʻa ʻi he angatuʻu kia Lehopoame ko e foha ʻo Solomoné lolotonga ia ko Lehopoamé naʻe kei siʻi mo loto-siʻi, pea naʻe ʻikai faʻa lava ke ne matuʻuaki kinautolu.
8 “Pea ko eni ʻoku mou fakakaukau ʻe lava ke mou matuʻuaki ʻa e puleʻanga ʻo Sihova ʻoku ʻi he nima ʻo e ngaahi foha ʻo Tēvitá koeʻuhí ko hoʻomou fuʻu tokolahí pea mo hoʻomou maʻu ʻa e ongo kiʻi pulu koula naʻe ngaohi ʻe Selopoame ko e ongo ʻotua maʻamoutolú.+
9 ʻIkai kuo mou kapusi ʻa e kau taulaʻeiki ʻa Sihová,+ ʻa e hako ʻo ʻĒloné, pea mo e kau Līvaí, pea ʻikai kuo mou fakanofo haʻamou kau taulaʻeiki pē ʻamoutolu ʻo hangē ko e ngaahi kakai ʻo e ngaahi fonua kehé?+ Ko ha taha pē naʻe haʻu mo ha* kiʻi pulu tangata ʻe taha mo ha sipi tangata ʻe fitu naʻe lava ke ne hoko ko ha taulaʻeiki ʻo e ngaahi meʻa ʻoku ʻikai ko ha ngaahi ʻotua.
10 Ka ko kimautolú, ko Sihova ʻa homau ʻOtuá,+ pea kuo ʻikai te mau liʻaki ia; ko ʻemau kau taulaʻeikí, ʻa e hako ʻo ʻĒloné, ʻoku nau faifatongia kia Sihova, pea ʻoku tokoni ʻa e kau Līvaí ki he ngāué.
11 ʻOku nau tutu ke kohu ʻa e ngaahi feilaulau tutú kia Sihova ʻi he pongipongi taki taha mo e efiafi taki taha+ fakataha mo e ʻinisēnisi namu-kakalá,+ pea ko e fokotuʻunga maá*+ ʻoku ʻi he tēpile koula haohaoá ia, pea ʻoku nau tutu ʻa e tuʻunga-maama koulá+ mo hono ngaahi māmá ʻi he efiafi taki taha,+ koeʻuhí he ʻoku mau tokanga ki homau fatongia kia Sihova ko homau ʻOtuá; ka kuo mou liʻaki Ia.
12 Pea vakai! ʻOku kau ʻa e ʻOtua moʻoní mo kimautolu, ʻo ne tataki kimautolu, fakataha mo ʻene kau taulaʻeikí pea mo e ongo talupite fakatokanga ki hono ifiʻi atu ʻa e taimi ʻo e tau mo kimoutolú. ʻE kau tangata ʻo ʻIsileli, ʻoua te mou faitau kia Sihova ko e ʻOtua ʻo hoʻomou fanga kuí, koeʻuhí ʻe ʻikai te mou lavameʻa.”+
13 Ka naʻe tuku atu ʻe Selopoame ha faʻahinga ke nau toi ʻo malumu pea ke nau haʻu mei mui ʻi he kau Siutá, ka nau hoko ai kinautolu ʻo ʻi muʻa ʻi he kau Siutá pea haʻu mei mui ʻiate kinautolu ʻa e kau malumú.
14 ʻI he hanga hake ʻa e kau tangata ʻo Siutá, naʻa nau sio ai naʻe ʻohofi fakatouʻosi kinautolu mei muʻa mo mui. Ko ia naʻe kamata ke nau tangi kia Sihova,+ lolotonga ia hono ifi leʻo-lahi ʻe he kau taulaʻeikí ʻa e talupité.
15 Naʻe kailaʻaki ʻe he kau tangata ʻo Siutá ha kaila ʻo e tau, pea ʻi he taimi naʻe kailaʻaki ai ʻe he kau tangata ʻo Siutá ʻa e kaila ʻo e taú, naʻe ikunaʻi ʻe he ʻOtua moʻoní ʻa Selopoame mo ʻIsileli kotoa ʻi he ʻao ʻo ʻĀpaia pea mo Siutá.
16 Naʻe hola ʻa e kau ʻIsilelí ʻi he ʻao ʻo Siutá, pea naʻe tuku kinautolu ʻe he ʻOtuá ki honau nimá.
17 Ko ha fuʻu tāmate lahi naʻe fai ʻe ʻĀpaia mo ʻene kakaí kiate kinautolú, pea naʻe hanganaki tō tau ʻa ʻIsileli, ko e kau tangata kuo ʻosi akoʻi* ʻe toko 500,000.
18 Ko ia naʻe fakavaivaiʻi ai ʻa e kau tangata ʻo ʻIsilelí ʻi he taimi ko iá, ka naʻe hoko ʻa e kau tangata ʻo Siutá ʻo mālohi koeʻuhí naʻa nau falala kia Sihova ko e ʻOtua ʻo ʻenau fanga kuí.+
19 Naʻe hanganaki tulimui ai pē ʻa ʻĀpaia kia Selopoame ʻo ne hamu ha ngaahi kolo meiate ia, ko Pēteli+ mo hono ngaahi kolo takatakaí,* mo Sesana mo hono ngaahi kolo takatakaí, pea mo ʻEfileini+ mo hono ngaahi kolo takatakaí.
20 Pea naʻe ʻikai ʻaupito toe maʻu ʻe Selopoame ʻa hono mafaí ʻi he lolotonga ʻa e taimi ʻo ʻĀpaiá; pea naʻe taaʻi ia ʻe Sihova ʻo ne mate.+
21 Ka naʻe fakautuutu ai pē ʻa e mālohi ʻo ʻĀpaiá. ʻI he faai atu ʻa e taimí, naʻá ne maʻu ha uaifi ʻe toko 14,+ pea naʻá ne hoko ko e tamai ʻa ha foha ʻe toko 22 mo e ʻofefine ʻe toko 16.
22 Pea ko e toenga ʻo e hisitōlia ʻo ʻĀpaiá, ko ʻene ngaahi ngāué mo ʻene ngaahi leá, kuo hiki ia ʻi he ngaahi tohi* ʻa e palōfita ko ʻItó.+
Fakamatala ‘i Lalo
^ Fakafoʻilea, “kuo fili.”
^ Fakafoʻilea, “kuo fili.”
^ ʻA ia, ko ha fuakava tuʻuloa mo taʻealaliliu.
^ Fakafoʻilea, “naʻe haʻu ʻo fakafonu ʻa hono nimá ʻaki ha.”
^ ʻA ia, ko e mā foakí.
^ Fakafoʻilea, “kuo fili.”
^ Pe “ngaahi kolo fakaongó.”
^ Pe “fakamatala.”
