Ua Kalonikali 9:1-31
9 Pea naʻe fanongo ʻa e kuini ʻo Sipá+ ʻi he ongoongo ʻo fekauʻaki mo Solomoné, ko ia naʻá ne haʻu ai ki Selusalema ke siviʻi ʻa Solomone ʻaki ʻa e ngaahi fehuʻi fihi.* Naʻá ne haʻu fakataha mo ha fuʻu kau fakafeʻao* tokolahi, mo e fanga kāmeli naʻe uta ai ʻa e lolo paʻame* mo e koula lahi ʻaupito+ pea mo e ngaahi maka mahuʻinga. Naʻá ne hū kia Solomone ʻo ne lea kiate ia ʻo fekauʻaki mo e meʻa kotoa naʻe ʻi hono lotó.+
2 Ko ia naʻe tali ʻe Solomone ʻa ʻene ngaahi fehuʻí kotoa. Naʻe ʻikai ha meʻa ʻe fuʻu faingataʻa kia* Solomone ke ne fakamatalaʻi kiate ia.
3 ʻI he mamata ʻa e kuini ʻo Sipá ki he poto ʻo Solomoné,+ mo e fale naʻá ne langá,+
4 mo e meʻakai ʻi heʻene tēpilé,+ ko e fakanofonofo ʻo ʻene kau sevānití, ko e ngāue ʻa ʻene kau tali-tēpilé mo honau teungá, ko ʻene kau tauhi-inú mo honau teungá, mo ʻene ngaahi feilaulau tutu naʻá ne ʻohake maʻu pē ʻi he fale ʻo Sihová,+ naʻe ʻikai mei tau ʻa ʻene mānavá.*
5 Ko ia naʻá ne pehē ange ki he tuʻí: “Ko e ongoongo naʻá ku fanongo ai ʻi hoku fonuá ʻo fekauʻaki mo hoʻo ngaahi lavameʻá* pea fekauʻaki mo ho potó naʻe moʻoni.
6 Ka naʻe ʻikai te u tui ki he ngaahi ongoongó kae ʻoua kuó u aʻu mai ʻo sio tonu ki ai.+ Pea vakai, kuo ʻikai ke tala mai kiate au naʻa mo hano vaeua ʻo ho fuʻu potó.+ Kuó ke fakalaka mamaʻo atu koe ʻi he ongoongo naʻá ku fanongo aí.+
7 Fiefia ē ka ko hoʻo kau tangatá, pea fiefia ē ka ko hoʻo kau sevāniti ʻa ia ʻoku nau tuʻu ʻi ho ʻaó maʻu ai pē, ʻo fanongo ki ho potó!
8 ʻOfa ke fakahīkihikiʻi ʻa Sihova ko ho ʻOtuá, ʻa ia kuó ne leleiʻia ʻiate koe ʻi heʻene fakanofo koe ki hono taloní ko e tuʻi ʻo fakafofongaʻi ʻa Sihova ko ho ʻOtuá. Koeʻuhi ko e ʻofa ʻa ho ʻOtuá ki ʻIsilelí,+ pea ke ʻai ia ke hokohoko atu ʻo taʻengatá, naʻá ne fakanofo ai koe ko e tuʻi ki ai ke fakahoko mai ʻa e fakamaau totonú mo e māʻoniʻoní.”
9 Naʻá ne ʻoange leva ki he tuʻí ʻa e talēniti* koula ʻe 120+ mo ha lolo paʻame lahi ʻaupito mo e ngaahi maka mahuʻinga. Naʻe ʻikai ʻaupito ke toe ʻomi ha lolo paʻame lahi pehē ʻo hangē ko ia naʻe ʻoange ʻe he kuini ʻo Sipá kia Tuʻi Solomoné.+
10 ʻIkai ke ngata aí, ko e kau sevāniti ʻa Hailame mo e kau sevāniti ʻa Solomone ʻa ia naʻa nau ʻomi ʻa e koula mei ʻŌfelí+ naʻa nau toe ʻomi foki ʻa e papa ahi mo e ngaahi maka mahuʻinga.+
11 Naʻe ngaohi ʻe he tuʻí mei he papa ahí ʻa e ngaahi sitepu papa ki he fale ʻo Sihová+ mo e fale*+ ʻo e tuʻí, pea pehē ki he ngaahi haʻape mo e ngaahi meʻalea filo maʻá e kau hivá.+ Naʻe ʻikai faifai ange pea mātā ha ngaahi meʻa lelei hangē ko iá ki muʻa ʻi he fonua ko Siutá.
12 Naʻe ʻoange foki ʻe Tuʻi Solomone ki he kuini ʻo Sipá ha meʻa pē naʻá ne fiemaʻu mo kole ki ai, ʻo lahi ange ia ʻi he* meʻa naʻá ne ʻomi ki he tuʻí. Pea naʻá ne mavahe leva ʻo foki ki hono fonua ʻoʻoná, fakataha mo ʻene kau sevānití.+
13 Pea ko e mamafa ʻo e koula naʻe ʻomi kia Solomone ʻi he taʻu ʻe tahá naʻe feʻunga ia mo e talēniti koula+ ʻe 666,
14 tuku kehe ʻa e meʻa ko ia naʻe ʻomi ʻe he kau mēsianití mo e kau fefakatauʻakí pea mo e ngaahi tuʻi kotoa ʻo e kau ʻAlepeá pea mo e kau kōvana ʻo e fonuá ʻa ia naʻa nau ʻomi ʻa e koula mo e siliva kia Solomoné.+
15 Naʻe ngaohi ʻe Tuʻi Solomone ʻa e ngaahi fuʻu pā ʻe 200 mei he koula tuifio+ (ko e sikeli* ʻe 600 ʻo e koula tuifio naʻe ʻi he pā taki taha)+
16 mo e fanga kiʻi pā* ʻe 300 mei he koula tuifió (ko e mina* koula ʻe tolu naʻe ʻi he kiʻi pā taki taha). Pea naʻe tuku ia ʻe he tuʻí ʻi he Fale ʻo e Vaotā ʻo Lepanoní.+
17 Naʻe toe ngaohi foki ʻe he tuʻí ha fuʻu taloni lei pea kofuʻaki ia ʻa e koula haohaoa.+
18 Naʻe ʻi ai ʻa e sitepu ʻe ono ki he taloní, pea naʻe ʻi ai ha tuʻunga-vaʻe koula naʻe fakapipiki ki he taloní, pea naʻe ʻi ai ʻa e ongo hiliʻanga nima ʻi he ongo tafaʻaki fakatouʻosi ʻo e ʻafioʻangá, mo e ʻīmisi ʻo e ongo laione+ naʻá na tuʻu ʻi he tafaʻaki ʻo e ongo hiliʻanga nimá.
19 Pea naʻe tuʻu ʻa e ngaahi ʻīmisi ʻo e fanga laione ʻe 12+ ʻi he sitepu ʻe onó, ko e taha ʻi he ngataʻanga taki taha ʻo e sitepu ʻe onó. Kuo ʻikai ha toe puleʻanga kuó ne ngaohi ha meʻa ʻe taha ʻo hangē ko iá.
20 Ko e ngaahi ipu inu kotoa ʻa Tuʻi Solomoné naʻe ngaohi mei he koulá, pea ko e ngaahi naunau kotoa ʻo e Fale ʻo e Vaotā ʻo Lepanoní naʻe ngaohi mei he koula haohaoa. Naʻe ʻikai ha meʻa ʻe taha naʻe ngaohi mei he silivá, he ko e silivá naʻe fai ʻa e vakai ki ai ko e meʻa noa pē ʻi he ngaahi ʻaho ʻo Solomoné.+
21 He ko e ngaahi vaka ʻa e tuʻí naʻe faʻa ʻalu ia ki Tāsisi+ mo e kau sevāniti ʻa Hailamé.+ Naʻe uta mai tuʻo taha he taʻu ʻe tolu kotoa pē ʻe he ngaahi vaka Tāsisí ʻa e koula mo e siliva, lei,+ fanga ngeli, pea mo e fanga pīkoka.
22 Ko ia naʻe mahulu atu ai ʻa Tuʻi Solomone ʻi he ngaahi tuʻi kehe kotoa pē ʻo e māmaní ʻi he koloá pea mo e potó.+
23 Pea naʻe feinga ʻa e ngaahi tuʻi ʻo māmaní kotoa ke nau feʻiloaki mo Solomone* ke fanongo ʻi hono poto naʻe ʻai ʻe he ʻOtua moʻoní ki hono lotó.+
24 Naʻa nau taki taha ʻomi ha meʻaʻofa—ko e ngaahi meʻa siliva, ngaahi meʻa koula, ngaahi kofu,+ meʻatau, lolo paʻame, fanga hoosi, pea mo e fanga miuli—pea naʻe hokohoko atu eni ʻi he taʻu ki he taʻu.
25 Pea naʻe maʻu ʻe Solomone ʻa e loki tauhiʻanga monumanu ʻe 4,000 ki heʻene fanga hōsí mo e ngaahi saliote pea mo e fanga hoosi* ʻe 12,000,+ pea naʻá ne tauhi ia ʻi he ngaahi kolo tukuʻanga salioté ʻo ofi ki he tuʻí ʻi Selusalema.+
26 Pea naʻá ne pule ki he kotoa ʻo e ngaahi tuʻí mei he Vaitafé* ki he fonua ʻo e kau Filisitiá pea ki he kauʻāfonua ʻo ʻIsipité.+
27 Naʻe ngaohi ʻe he tuʻí ʻa e silivá ʻi Selusalema ʻo hangē hono lahí ko e maká, pea mo e papa sitá ʻo hangē hono lahí ko e ʻulu sukamino ʻi he Sefelaʻá.*+
28 Pea naʻa nau faʻa ʻomi ʻa e fanga hoosi kia Solomone mei ʻIsipite+ pea mei he ngaahi fonua kehé kotoa.
29 Ko e meʻa ki he toenga ʻo e hisitōlia ʻo Solomoné,+ mei he kamataʻangá ki he ngataʻangá, ʻikai kuo hiki ia ʻi he ngaahi lea ʻa Nētane+ ko e palōfitá, ʻi he kikite ʻa ʻĀhisa+ ko e tangata Sailó, pea ʻi he lēkooti ʻo e ngaahi vīsone ʻa ʻIto+ ko e tokotaha-vīsoné ʻo fekauʻaki mo Selopoame+ ko e foha ʻo Nīpatí?
30 Naʻe pule ʻa Solomone ʻi Selusalema ki he kotoa ʻo ʻIsilelí ʻi he taʻu ʻe 40.
31 Pea naʻe toka ʻa Solomone ʻo mālōlō fakataha mo ʻene fanga kuí. Ko ia naʻa nau tanu ia ʻi he Kolo-ʻo-Tēvita ko ʻene tamaí;+ pea ko hono foha ko Lehopoamé naʻá ne hoko ko e tuʻi ʻo fetongi ia.+
Fakamatala ‘i Lalo
^ Pe “ʻaki ʻa e ngaahi tupuʻa.”
^ Pe “kau fononga.”
^ Sio ki he Lea mo Hono ʻUhinga.
^ Fakafoʻilea, “ʻikai ha meʻa ʻe puli meia.”
^ Fakafoʻilea, “naʻe ʻikai kei ʻi ai ha laumālie ʻiate ia.”
^ Pe “ngaahi leá.”
^ Ko ha talēniti naʻe tatau ia mo e kilokalami ʻe 34.2 (ʻaunise ʻe 1,101). Sio ki he Fakamatala Fakalahi E14.
^ Pe “palasi.”
^ Pe ngalingali, “ʻo tānaki atu ki he ngaahi meʻaʻofa naʻe fehoanaki mo e mahuʻinga ʻo e.”
^ Ko ha sikeli naʻe tatau ia mo e kalami ʻe 11.4 (ʻaunise ʻe 0.367). Sio ki he Fakamatala Fakalahi E14.
^ Ko ha kiʻi pā naʻe faʻa toʻo ʻe he kau fana ngahaú.
^ Ko ha mina ʻi he Ngaahi Konga Tohi Tapu Faka-Hepeluú naʻe tatau ia mo e kalami ʻe 570 (ʻaunise ʻe 18.35). Sio ki he Fakamatala Fakalahi E14.
^ Fakafoʻilea, “kumi ki he fofonga ʻo Solomoné.”
^ Pe “kau tangata heka hoosi.”
^ ʻA ia, ko e Vaitafe ʻIufaletesí.
^ Pe “konga fonua māʻulaló,” ʻo ʻuhinga ki he ngaahi moʻunga māʻulalo angé.
