Fakatatau kia Mātiu 5:1-48
5 ʻI heʻene sio ki he fuʻu kakaí, naʻá ne ʻalu hake ki he moʻungá; pea ʻi he hili ʻene tangutu hifó, naʻe haʻu ʻene kau ākongá kiate ia.
2 Naʻá ne kamata lea leva ʻo ne faiako kiate kinautolu, ʻo pehē:
3 “Fiefia ē ko kinautolu ʻoku nau lāuʻilo ki heʻenau fiemaʻu fakalaumālié,*+ he ʻoku ʻonautolu ʻa e Puleʻanga ʻo hēvaní.
4 “Fiefia ē ko kinautolu ʻoku mamahí, he ʻe fakafiemālieʻi kinautolu.+
5 “Fiefia ē ko e kau anga-maluú,*+ he te nau maʻu ʻa e māmaní.+
6 “Fiefia ē ko kinautolu ʻoku fiekaia mo fieinua+ ki he māʻoniʻoní, he ʻe fakalato* ʻenau fiemaʻú.+
7 “Fiefia ē ko e kau faimēsí,+ he ʻe faimeesi kiate kinautolu.
8 “Fiefia ē ko kinautolu ʻoku loto-maʻá,+ he te nau mamata ki he ʻOtuá.
9 “Fiefia ē ko kinautolu ʻoku fakamelinó,*+ he ʻe ui kinautolu ko e ngaahi foha ʻo e ʻOtuá.
10 “Fiefia ē ko kinautolu kuo fakatangaʻi koeʻuhi ko e māʻoniʻoní,+ he ʻoku ʻonautolu ʻa e Puleʻanga ʻo hēvaní.
11 “Fiefia ē ko kimoutolu ʻi hono lumaʻi ʻe he kakaí+ mo fakatangaʻi kimoutolu+ mo fai ha ngaahi loi kovi kehekehe fekauʻaki mo kimoutolu koeʻuhí ko au.+
12 Mou fiefia mo tomeʻe,+ he ʻoku lahi hoʻomou totongí+ ʻi hēvani, he naʻe pehē ʻenau fakatangaʻi ʻa e kau palōfita naʻe ʻi muʻa ʻiate kimoutolú.+
13 “Ko kimoutolú ko e māsima+ ʻo e māmaní, ka ʻo ka mole mei he māsimá ʻa hono konokoná, ʻe toe konokona fēfē ia? ʻOku ʻikai ke toe ʻaonga ia ki ha meʻa ka ko hono laku pē ki tuʻa+ ke tāmalaki ʻe he kakaí.
14 “Ko kimoutolú ko e maama ʻo e māmaní.+ Ko ha kolo ʻoku ʻikai lava ke puli ʻi heʻene tuʻu ʻi ha funga moʻunga.
15 ʻOku tutu ʻe he kakaí ʻa e māmá pea fokotuʻu, ʻo ʻikai ʻi ha lalo kato,* ka ʻi he tuʻuʻanga māmá, pea ʻoku ulo atu ia ki he faʻahinga kotoa ʻi he falé.+
16 Pehē foki, mou ʻai hoʻomou māmá ke ulo atu ki he kakaí,+ koeʻuhí ke nau sio ki hoʻomou ngaahi ngāue leleí+ pea nau ʻoatu ai ʻa e lāngilangí ki hoʻomou Tamai ʻoku ʻi hēvaní.+
17 “ʻOua te mou pehē naʻá ku haʻu ke fakataʻeʻaongaʻi ʻa e Laó pe ko e Kau Palōfitá. Naʻá ku haʻú, ʻo ʻikai ko hano fakataʻeʻaongaʻi, ka ke fakahoko ia.+
18 ʻOku ou tala moʻoni atu kiate kimoutolu, ʻe vave ange ha mole ʻa e langí mo māmani, ʻi ha mole atu ha kiʻi mataʻitohi siʻisiʻi pe ko ha foʻi kohi ʻe taha ʻi he Laó kae ʻoua kuo fakahoko hono kotoa.+
19 Ko ia ai, ʻilonga ʻa ia te ne maumauʻi ha taha ʻo e ngaahi fekau siʻisiʻi tahá ni mo akoʻi ʻa e niʻihi kehé ke nau fai peheé, ʻe ui ia ko e siʻi taha* ʻi he fekauʻaki mo e Puleʻanga ʻo hēvaní. Kae ʻilonga ʻa ia ʻokú ne fai ki ai mo faiakoʻaki iá ʻe ui ia ko e lahi ʻi he fekauʻaki mo e Puleʻanga ʻo hēvaní.
20 He ʻoku ou tala atu kiate kimoutolu, kapau heʻikai ke hulu atu hoʻomou māʻoniʻoní ʻi he māʻoniʻoni ʻa e kau sikalaipé mo e kau Fālesí,+ ʻe ʻikai ʻaupito te mou hū ki he Puleʻanga ʻo hēvaní.+
21 “Naʻa mou fanongo naʻe leaʻaki ki he faʻahinga ʻi he kuonga muʻá: ‘Kuo pau ke ʻoua naʻá ke fakapō,+ kae ʻilonga ʻa ia ʻoku fakapoó te ne fai ha tali ki he fakamaauʻangá.’+
22 Kae kehe, ʻoku ou tala atu kiate kimoutolu, ko e tokotaha kotoa pē ʻoku kei ʻita fuoloa+ ki hono tokouá te ne fai ʻe ia ha tali ki he fakamaauʻangá; pea ʻilonga ʻa ia ʻokú ne fai ha lea taʻetokaʻi anga-kakaha ki hono tokouá te ne fai ʻe ia ha tali ki he Fakamaauʻanga Lahí; kae ʻilonga ʻa ia ʻokú ne pehē, ‘Ko ha vale taʻeʻaonga koe!’ ʻE ala lī ia ki he afi ʻo Kihená.*+
23 “Kapau leva ʻokú ke haʻu mo hoʻo meʻaʻofá ki he ʻōlitá+ peá ke manatuʻi hake ai ʻoku ʻi ai ha meʻa ʻoku koviʻia ai ho tokouá ʻiate koe,
24 tuku hoʻo meʻaʻofá ʻi muʻa ʻi he ʻōlitá peá ke ʻalu. ʻUluaki fakamelino mo ho tokouá, peá ke foki mai leva ʻo foaki hoʻo meʻaʻofá.+
25 “Fakavave ke fakaleleiʻi ʻa e ngaahi meʻá mo e tokotaha ʻokú ne fakaʻilo koé, lolotonga hoʻomo fononga ki he fakamaauʻangá, koeʻuhí ke ʻoua naʻa ʻave koe ʻe he tokotaha mamahí ki he fakamāú, pea mei he fakamāú ki he selá, pea lī ai koe ki he pilīsoné.+
26 ʻOku ou tala moʻoni atu kiate koe, heʻikai ʻaupito te ke ʻatā mai mei ai kae ʻoua kuó ke totongi ʻa hoʻo kiʻi foʻi koini fakaʻosí.*
27 “Naʻa mou fanongo naʻe leaʻaki: ‘Kuo pau ke ʻoua naʻá ke tono.’+
28 Ka ʻoku ou tala atu kiate kimoutolu, ko e tokotaha kotoa ʻoku hanganaki sio ki ha fefine+ ke tafunaki ki ai ʻene holí kuó ne ʻosi tonoʻi ia ʻi hono lotó.+
29 Kapau leva ko ho mata toʻomataʻú ʻokú ne ʻai koe ke ke tūkiá, kapeʻi ia ʻo liʻaki.+ He ʻoku lelei ange ke mole hao kupu ʻe taha ʻi hano lī ho sinó kotoa ki Kihena.*+
30 Pehē foki, kapau ko ho nima toʻomataʻú ʻokú ne ʻai koe ke ke tūkiá, tuʻusi ia ʻo liʻaki.+ He ʻoku lelei ange ke mole hao kupu ʻe taha ʻi ha ʻalu ho sinó kotoa ki Kihena.*+
31 “Naʻe toe leaʻaki foki: ‘ʻIlonga ʻa ia ʻokú ne veteʻi hono uaifí, tuku ke ne ʻoange kiate ia ha tohi vete.’+
32 Kae kehe, ʻoku ou tala atu kiate kimoutolu, ko e tokotaha kotoa pē ʻokú ne veteʻi hono uaifí, ʻo ʻikai ʻi he fehokotaki fakasino taʻetāú,* ʻokú ne ʻai ai ʻa e fefiné ke ala tonoʻi, pea ʻilonga ʻa ia te ne mali mo e fefine ko ia kuo veteʻí ʻokú ne tono ai.+
33 “Naʻa mou toe fanongo foki naʻe leaʻaki ki he faʻahinga ʻi he kuonga muʻá: ‘Kuo pau ke ʻoua naʻá ke fai ha fuakava ʻo taʻefai ki ai,+ ka kuo pau ke ke fakahoko hoʻo ngaahi fuakava kia Sihová.’*+
34 Kae kehe, ʻoku ou tala atu kiate kimoutolu: ʻOua naʻa mou teitei fai ha fakapapau+ ki he langí, he ko e taloni ia ʻo e ʻOtuá;
35 pe ki he māmaní, he ko hono tuʻunga-vaʻé ia;+ pe ki Selusalema, he ko e kolo ia ʻo e Tuʻi lahí.+
36 ʻOua naʻá ke fai ha fakapapau ʻaki ho ʻulú,* he ʻoku ʻikai lava ke ke liliu ha tuʻoni louʻulu ke hinā pe ʻuliʻuli.
37 ʻAi pē hoʻomou lea ‘ʻIó’ ke ʻuhingá ko e ʻio, mo hoʻomou ‘ʻIkaí’ ke ʻikai,+ he ko hono toe fakalahi ení ko e tupu ia mei he tokotaha fulikivanú.*+
38 “Naʻa mou fanongo naʻe leaʻaki: ‘Mata ki he mata mo e nifo ki he nifo.’+
39 Kae kehe, ʻoku ou tala atu kiate kimoutolu: ʻOua ʻe talitekeʻi ʻa e tokotaha ʻoku fulikivanú, ka ʻilonga ʻa ia ʻokú ne sipiʻi ho kouʻahe toʻomataʻú, fulihi atu foki ki ai mo ho kouʻahe ʻe tahá.+
40 Pea kapau ʻoku loto ha taha ke ʻave koe ki he fakamaauʻangá ke ne maʻu ho kofu ʻi lotó, tuku foki ke ne maʻu mo ho kofu tuʻá;+
41 pea kapau ʻe kounaʻi koe ʻe ha taha maʻu mafai ke mo ʻalu ʻi ha maile* ʻe taha, ʻalu mo ia ʻi ha maile ʻe ua.
42 Foaki kiate ia ʻoku kole atú, pea ʻoua te ke sītuʻa meiate ia ʻoku fie nō* meiate koé.+
43 “Naʻa mou fanongo naʻe leaʻaki: ‘Kuo pau ke ke ʻofa ki ho kaungāʻapí+ pea fehiʻa ki ho filí.’
44 Kae kehe, ʻoku ou tala atu kiate kimoutolu: Hokohoko atu hoʻomou ʻofa ki homou ngaahi filí+ pea lotu maʻanautolu ʻoku nau fakatangaʻi kimoutolú,+
45 koeʻuhí ke mou fakamoʻoniʻi ai ko e fānau kimoutolu ʻa hoʻomou Tamai ʻoku ʻi hēvaní,+ he ʻokú ne ʻai ke hopo ʻene laʻaá ki he fulikivanú mo e kakai leleí pea ʻokú ne ʻomai ʻa e ʻuhá ki he māʻoniʻoní mo e taʻemāʻoniʻoní.+
46 He kapau ʻoku mou ʻofa kiate kinautolu pē ʻoku ʻofa mai kiate kimoutolú, ko e hā ha totongi te mou maʻu ai?+ ʻIkai ʻoku fai pehē pē mo e kau tānaki tukuhaú?
47 Pea kapau ʻoku mou lea fakafeʻiloaki ki homou fanga tokouá pē, ko e hā ai ha meʻa makehe kuo mou fai? ʻIkai ʻoku toe fai pehē pē mo e kakai ʻo e ngaahi puleʻangá?
48 Ko ia ai, kuo pau ke mou haohaoa,* ʻo hangē pē ko e haohaoa ʻa hoʻomou Tamai fakahēvaní.+
Fakamatala ‘i Lalo
^ Pe “kinautolu ʻoku nau kole ki he laumālié.”
^ Pe “kau anga-vaivaí.”
^ Pe “fakafiemālieʻi.”
^ Pe “manako ki he melinó.”
^ Pe “kato fuaʻanga-meʻa.”
^ Pe “ʻoku taʻefeʻunga.”
^ Ko e feituʻu tutuʻanga veve ʻi tuʻa Selusalema. Sio ki he Lea mo Hono ʻUhinga.
^ Fakafoʻilea, “ʻa e kuatalanisi fakaʻosí.” Sio ki he Fakamatala Fakalahi E14.
^ Sio ki he Lea mo Hono ʻUhinga.
^ Sio ki he Lea mo Hono ʻUhinga.
^ Faka-Kalisí, por·neiʹa. Sio ki he Lea mo Hono ʻUhinga.
^ Sio ki he Fakamatala Fakalahi A5.
^ Pe “ʻaki hoʻo moʻuí.”
^ ʻA ia, ko Sētane.
^ Sio ki he Fakamatala Fakalahi E14.
^ ʻA ia, ko e nō ʻo ʻikai hilifaki ha tupu.
^ Pe “hoko ʻo kakato.”
