Nēhumi 2:1-13
2 Ko e tokotaha te ne fakamovetevete koé kuo ʻalu atu kiate koe.*+
Maluʻi ʻa e ngaahi feituʻu fakakolotaú.
Hanganaki leʻohi ʻa e halá.
ʻAi ke mou mateuteu* pea tānaki homou iví kotoa.
2 He ʻe toe fakafoki mai ʻe Sihova ʻa e pōlepoleʻanga ʻo Sēkopé,Fakataha mo e pōlepoleʻanga ʻo ʻIsilelí,He ko e kau faifakaʻauhá kuo nau fakaʻauha kinautolu;+Pea kuo nau maumauʻi honau ngaahi hulí.
3 Ko e ngaahi pā ʻa e fili ʻo Ninivé kuo fakalanu kulokula,Ko ʻene kau pāteʻi taú ʻoku nau kofu kulokula mālohi.
Ko e ngaahi naunau ukamea ʻo ʻene ngaahi saliote taú ʻoku tapa hangē ha afíʻI he ʻaho ʻokú ne teuteu ai ki he taú,Pea ʻoku puke ʻe he kau tangatá ʻa e ngaahi tao naʻe ngaohi mei he siunipá.
4 ʻOku felovolovai oma ʻaupito atu ʻa e ngaahi saliote taú ʻi he ngaahi halá.
ʻOku nau felēleaki ʻi he ngaahi malaʻe fakakoló.*
ʻOku nau ngingila ʻo hangē ha ngaahi tūhulu ʻoku uló pea tapa ʻo hangē ha ʻuhilá.
5 Te ne* ui mai ʻene kau ʻōfisá.
Te nau humu ʻi heʻenau laka atú.
ʻOku nau fakavave atu ki hono ʻaá;ʻOku nau fokotuʻu hake ʻa e ʻā maluʻí.
6 Ko e ngaahi matapā ʻo e ngaahi vaitafé ʻe fakaava,Pea ʻe movete* ʻa e palasí.
7 Kuo ʻosi fai ʻa e tuʻutuʻuni ki ai:* ʻOku fakaeʻa atu ʻa e koló ni,ʻOku ʻave atu ia, pea ko ʻene kau kaunangá ʻoku nau toʻe;ʻOku ongo mai honau leʻó hangē ha fanga lupé ʻi heʻenau tuki honau fatafatá.*
8 ʻI he kotoa ʻo hono ngaahi ʻahó naʻe hangē ai ʻa Ninive+ ha anovaí,Ka ʻi he taimi ní kuo nau hola.
“Tuʻu maʻu! Tuʻu maʻu!”
Ka ʻoku ʻikai ha taha ʻe tafoki mai.+
9 Faʻao fakamālohi ʻa e silivá, faʻao fakamālohi ʻa e koulá!
ʻOku ʻikai ha ngataʻanga ʻo e koloá.
ʻOku tuku tauhi ia fakataha mo e ngaahi meʻa mahuʻinga kehekehe.
10 ʻOku halaʻatā ha meʻa ʻi he koló, ʻoku lala, ʻoku maomaonganoa!+
Kuo vai honau lotó ʻi he ilifia, kuo mapelu honau ngaahi tuí, ʻoku tete honau alangá;ʻOku tea mate honau matá kotoa.
11 Ko fē ʻa e ʻana ʻo e fanga laioné,+ ʻa ia ʻoku fafanga ai ʻa e fanga laione muí,ʻA ia ʻoku ʻalu atu ki ai ʻa e laioné mo hono ʻuhikí,ʻO ʻikai ha taha te ne ʻai kinautolu ke nau ilifiá?
12 Naʻe hae ʻe he laioné ʻa e monumanu feʻunga maʻa hono ʻuhikíPea sisina mo ha fanga monumanu maʻa ʻene fanga laione fefiné.
Naʻá ne hanganaki fakafonu ʻa hono ngaahi ʻaná ʻaki ʻa e monumanu naʻá ne poó,Mo hono ngaahi toitoiʻangá ʻaki ʻa e fanga manu kuó ne haehaé.
13 “Vakai! ʻOku ou tuʻu kiate koe,” ko e fakahaaʻi ia ʻe Sihova ʻo e ngaahi kau taú,+“Te u tutu ʻene ngaahi saliote taú kae ʻoua kuo ʻauha ʻosi,*+Pea ʻe keina ʻe he heletaá ʻa hoʻo fanga laione muí.
Te u fakangata ʻa hoʻo pō ʻa e fanga manú mei he māmaní,Pea ʻe ʻikai ke toe ongona+ ʻa e leʻo ʻo hoʻo kau talafekaú.”
Fakamatala ‘i Lalo
^ ʻA ia, ko Ninive.
^ Fakafoʻilea, “Fakaivimālohiʻi ʻa e ngaahi kongalotó.”
^ ʻA ia, ko ha feituʻu faiʻanga meʻa tefito ia ʻo e koló ki he kakaí.
^ Ngalingali ʻoku ʻuhinga ki he tuʻi ʻo ʻAsīliá.
^ Pe “ʻe holofa.”
^ Fakafoʻilea, “mafú.”
^ Pe “ʻosi fakapapauʻi ia.”
^ Fakafoʻilea, “ʻi he kohú.”
