Ngāue ʻa e Kau ʻApositolo 24:1-27
24 ʻI he hili ʻa e ʻaho ʻe nima naʻe ʻalu hifo ʻa e taulaʻeiki lahi ko ʻAnanaiá+ fakataha mo ha kau mātuʻa pea mo ha fakafofonga taukapo,* ko hono hingoá ko Tetulō, pea naʻa nau lāungaʻi ʻa Paula ki he kōvaná.+
2 ʻI hono ui mai iá, naʻe kamata talatalaakiʻi ia ʻe Tetulō, ʻo ne pehē:
“ʻI he sio ʻoku mau maʻu ʻa e melino lahi fakafou ʻiate koe pea ʻi hoʻo ngaahi fakakaukau tokamuʻá kuo hoko ai ʻa e ngaahi fakalelei ʻi he puleʻangá ni,
3 ʻi he taimi kotoa pē pea pehē foki ʻi he ngaahi feituʻu kotoa pē ʻoku mau fakahaaʻi ai ʻa e houngaʻia ʻi he meʻá ni mo e fakafetaʻi lahi moʻoni, ʻe ʻEiki Filike.
4 Ka koeʻuhi ke ʻoua naʻá ku toe fakalōloa, ʻoku ou kōlenga atu kiate koe ke ke anga-lelei muʻa ʻo kiʻi fanongo mai.
5 He kuo mau ʻilo ʻa e tangatá ni ko ha kiʻi manu maumau*+ mo fakatupu angatuʻu+ ʻi he lotolotonga ʻo e kau Siu kotoa ʻi he māmani kuo nofoʻí pea ko ha takimuʻa ia ʻo e kulupu lotu mavahe ʻa e kau Nāsaletí.+
6 Naʻá ne toe feinga foki ke taʻefakatoputapuʻi ʻa e temipalé, ko ia naʻa mau puke ia.+
7 *——
8 ʻI haʻo fakaʻeke iá, te ke ʻilo ai fekauʻaki mo e ngaahi meʻa kotoa ko eni ʻoku mau talatalaakiʻi ai iá.”
9 ʻI he meʻa ko iá naʻe toe kau mai ʻa e kau Siú ʻi he ʻoho atu ʻo fakamatematē ko e moʻoni ʻa e ngaahi meʻá ni.
10 ʻI he kamo atu ʻa e kōvaná kia Paula ke ne leá, naʻá ne tali mai:
“ʻI he ʻiloʻi lelei kuó ke hoko ko e fakamaau ʻi he puleʻangá ni ʻi ha ngaahi taʻu lahí, ʻoku ou loto-lelei ai ke u lea atu ʻo fai hoku taukapo ʻoʻokú.+
11 Kuo teʻeki ke laka hake he ʻaho ʻe 12 talu mei heʻeku ʻalu hake ke lotu ʻi Selusalemá,+ kapau ʻokú ke loto ke ʻilo pe ʻoku moʻoni eni, ʻe lava ke ke ʻeke;
12 pea naʻe ʻikai te nau ʻilo au ʻoku ou fakakikihi mo ha taha ʻi he temipalé pe fakatupunga ha fuʻu kakai fakamoveuveu ʻi he ngaahi sinakoké pe ʻi he kotoa ʻo e koló.
13 Pea ʻe ʻikai lava foki ke nau fakamoʻoniʻi atu kiate koe ʻa e ngaahi meʻa ʻoku nau talatalaakiʻi ʻaki au he taimi ní.
14 Ka ʻoku ou tala moʻoni atu eni kiate koe, fakatatau ki he ʻalunga ko ia ʻoku nau ui ko ha kulupu lotu mavahé, ko ʻeni ia ʻoku ou fai ai ʻa ʻeku ngāue toputapu ki he ʻOtua ʻo ʻeku fanga kuí,+ heʻeku tui ki he ngaahi meʻa kotoa pē ʻoku tohi ʻi he Laó pea ʻi he ngaahi tohi ʻa e Kau Palōfitá.+
15 Pea ʻoku ou maʻu ʻa e ʻamanaki ki he ʻOtuá, ʻa ia ko e ʻamanaki foki ia ʻoku fakatuʻotuʻa atu ki ai ʻa e kau tangatá ni, ʻe ʻi ai ʻa e toetuʻu+ fakatouʻosi ʻa e māʻoniʻoní mo e taʻemāʻoniʻoní.+
16 Koeʻuhi ko e meʻá ni, ʻoku ou feinga maʻu pē ke tauhi maʻu ha konisēnisi ʻataʻatā* ʻi he ʻao ʻo e ʻOtuá mo e tangatá.+
17 Pea ʻi he hili atu ha ngaahi taʻu lahi, naʻá ku aʻu mai ai ke ʻomai ha ngaahi foaki ʻofa+ ki hoku fonuá pea ke fai ha ngaahi feilaulau.
18 Lolotonga ʻeku tokanga ki he ngaahi meʻá ni, naʻa nau ʻilo au ʻi he temipalé ʻi hono fai hoku fakamaʻa fakaeouaú,+ ka naʻe ʻikai te u ʻi ai mo ha fuʻu kakai pe ko haʻaku fakatupunga ha moveuveu. Ka naʻe ʻi ai ha kau Siu ʻe niʻihi mei he vahefonua ʻo ʻĒsiá
19 ʻa ia naʻe tonu ke nau ʻi heni ʻi ho ʻaó ke nau talatalaakiʻi au kapau naʻe ʻi ai moʻoni haʻanau meʻa ke tukuakiʻi ʻaki au.+
20 Pe tuku ki he kau tangata ʻoku ʻi hení ke nau lea tonu mai pe ko e hā haʻaku hala kuo nau ʻilo, lolotonga ia ʻeku tuʻu atu ko eni ʻi he ʻao ʻo e Sanetalimí,*
21 tuku kehe ʻa e meʻa ko eni ʻe taha ʻa ia naʻá ku kalangaʻaki lolotonga ʻeku tuʻu ʻi honau lotolotongá: ‘Ko e toetuʻu ʻa e kau maté kuo fakamāuʻi ai au he ʻahó ni ʻi homou ʻaó!’”+
22 Kae kehe, ʻi hono ʻiloʻi lelei ʻe Filike ʻa e ngaahi moʻoniʻi meʻa fekauʻaki mo e ʻAlunga ʻo e ʻEikí,+ naʻe kamata ke ne taʻofi kinautolu ʻo ne pehē: “Ko fē pē taimi ʻe aʻu mai ai ʻa Lisiasi ko e ʻeikitaú, te u toki fai ai ha tuʻutuʻuni ʻi he ngaahi meʻa ko eni ʻoku fekauʻaki mo kimoutolú.”
23 Pea naʻá ne ʻoatu ʻa e tuʻutuʻuni ki he ʻōfisa fakakautaú ke tuku pōpula ʻa Paula kae ʻoange haʻane kiʻi tauʻatāina, pea fakaʻatā ʻa hono kakaí ke nau tokangaʻi ʻa ʻene ngaahi fiemaʻú.
24 ʻI he ʻosi atu ha ngaahi ʻaho naʻe aʻu mai ai ʻa Filike mo Telusila ko hono uaifí, ʻa ia ko ha Siu, pea naʻá ne fekau atu ke ʻomi ʻa Paula peá ne fanongo kiate ia ʻi heʻene lea ʻo fekauʻaki mo e tui kia Kalaisi Sīsuú.+
25 Ka ʻi he talanoa ʻa Paula ʻo fekauʻaki mo e māʻoniʻoní mo e mapuleʻi-kitá pea mo e fakamaau ka hoko maí,+ naʻe tailiili ai ʻa Filike peá ne tali ange: “Ke ke mavahe atu ā he taimí ni, ka ʻi haʻaku maʻu ha faingamālié te u toe fekau atu ke ke haʻu.”
26 ʻI he taimi tatau, naʻá ne ʻamanaki ʻe ʻoange kiate ia ʻe Paula ha paʻanga. ʻI he ʻuhinga ko iá, naʻe toe ʻāsili ange ai ʻene toutou fekau atu kiate ia ke ne haʻú peá ne talanoa mo ia.
27 Ka ʻi he ʻosi atu ha taʻu ʻe ua mei ai, naʻe fetongi ʻa Filike ʻe Pōsio Fesito; pea koeʻuhi naʻe loto ʻa Filike ke ne maʻu ʻa e leleiʻia ʻa e kau Siú,+ naʻá ne kei tuku pōpula pē ʻa Paula.
Fakamatala ‘i Lalo
^ Pe “ha loea.”
^ Pe “fakatupu palopalema.” Fakafoʻilea, “fakatupu ʻauha.”
^ Sio ki he Fakamatala Fakalahi A3.
^ Pe “taʻemele.”
^ Sio ki he Lea mo Hono ʻUhinga.
