Palōveepi 11:1-31
11 Ko e meʻafua taʻefaitotonú* ʻoku fakalielia ia kia Sihova,Ka ko ha meʻa fakamamafa totonu* ʻoku ʻoatu ai ʻa e fiefia kiate ia.+
2 ʻI he hoko mai ʻa e ʻafungí, ʻe muimui mai ai ʻa e fakamā,+Ka ko e potó ʻoku ʻi he faʻahinga ia ʻoku anga-fakanānaá.+
3 Ko e anga-tonu ʻa e faitotonú ʻokú ne tataki kinautolu,+Ka ko e mioʻi ʻa e kau kākaá ʻe fakaʻauha ai kinautolu.+
4 Ko e koloá* ʻe ʻikai hano ʻaonga ʻi he ʻaho ʻo e houhaú,+Ka ko e māʻoniʻoní te ne fai ʻa e fakahaofi mei he maté.+
5 Ko e māʻoniʻoni ʻa e tokotaha taʻemelé ʻokú ne ʻai ke hangatonu ʻa hono halá,Ka ko e tokotaha fulikivanú ʻe tō koeʻuhi ko ʻene fulikivanu pē ʻaʻaná.+
6 Ko e māʻoniʻoni ʻa e faitotonú te ne fakahaofi kinautolu,+Ka ko e kau kākaá te nau fihia ʻi he ngaahi holi pē ʻanautolú.+
7 ʻI he mate ha tangata fulikivanu, ʻoku ʻauha ai ʻa ʻene ʻamanakí;Pea ko e ngaahi fakatuʻamelie makatuʻunga ʻi hono mālohí ʻe ʻauha mo ia foki.+
8 Ko e tokotaha māʻoniʻoní ʻoku fakahaofi ia mei he mamahí,Pea ʻoku fetongi ia ʻe he tokotaha fulikivanú.+
9 Ko e ngutu ʻo e tokotaha tafoki ʻo fakafepaki ki he moʻoní* ʻokú ne ʻomi ʻa e ʻauha ki hono kaungāʻapí,Ka ʻi he ʻiló ʻoku fakahaofi ai ʻa e māʻoniʻoní.+
10 Ko e lelei ʻa e kau māʻoniʻoní ʻoku ʻai ai ke fiefia ha kolo,Pea ʻi he ʻauha ʻa e kau fulikivanú, ʻoku ʻi ai ha kalanga fiefia.+
11 ʻOku hakeakiʻi ha kolo koeʻuhi ko e tāpuaki ʻo e kau faitotonú,+Ka ko e ngutu ʻo e kau fulikivanú ʻoku nau holoki hifo ia.+
12 ʻIlonga ʻa ia ʻoku ʻikai ke fakakaukau leleí* ʻokú ne fakahāhā ʻa e taʻetokaʻi* ki hono kaungāʻapí,Ka ko e tangata ʻiloʻilo moʻoní ʻokú ne hanganaki fakalongolongo.+
13 Ko ha tokotaha laukovi loi ʻokú ne ʻalu takai holo ʻo fakaeʻa ha talanoa fakapulipuli,+Ka ko e tokotaha falalaʻangá* ʻokú ne tauhi ha meʻa fakapulipuli.*
14 ʻI he ʻikai fai ha fakahinohino pōtoʻí,* ʻoku tō ʻa e kakaí,Ka ʻoku ʻi ai ʻa e lavameʻa* ʻi he tokolahi ʻa e kau faleʻí.*+
15 ʻIlonga ʻa ia ʻokú ne maluʻi ha nō* maʻa ha sola kuo pau ke hoko kiate ia ha kovi,+Kae ʻilonga ʻa ia ʻoku fakaʻehiʻehi mei he* lulululu ʻi ha tukupaá te ne malu.
16 Ko ha fefine anga-ʻofa* ʻokú ne maʻu ʻa e lāngilangi,+Ka ko e kau tangata anga-koví ʻoku nau puke ʻa e koloá.
17 Ko ha tangata anga-lelei* ʻokú ne maʻu ʻaonga mei ai,+Ka ko e tokotaha fakamamahí ʻokú ne ʻomi ai ʻa e faingataʻa* kiate ia.+
18 Ko e tokotaha fulikivanú ʻokú ne maʻu ʻa e totongi kākā,+Ka ko e tokotaha ʻokú ne tūtuuʻi ʻa e māʻoniʻoní ʻokú ne maʻu ha pale moʻoni.+
19 Ko e tokotaha ʻoku tuʻu mālohi maʻá e māʻoniʻoní ʻokú ne ʻi he hala ki he moʻuí,+Ka ko e tokotaha ʻoku tuli ki he koví ʻokú ne ʻi he hala ki he maté.
20 Ko kinautolu ʻoku loto pikopikó ʻoku fakalielia ia kia Sihova,+Ka ko kinautolu ʻoku taʻemele honau ʻalungá ʻoku ʻoatu ai ʻa e fiefia kiate ia.+
21 Fakapapauʻi ange* ʻa e meʻá ni: Ko ha tokotaha kovi ʻe ʻikai ke taʻetautea,+Ka ko e fānau ʻa e māʻoniʻoní te nau hao.
22 ʻOku hangē ha mama koula ʻi he ihu ʻo ha puakáʻA e fefine hoihoifua ʻokú ne talitekeʻi ʻa e fakakaukau leleí.
23 Ko e holi ʻa e kau māʻoniʻoní ʻoku iku ki he lelei,+Ka ko e meʻa ʻoku ʻamanaki ki ai ʻa e kau fulikivanú ʻoku iku ki he houhau.
24 ʻOku foaki nima-homo* ha taha pea iku ai ʻo ne maʻu ʻa e meʻa lahi ange;+ʻOku taʻofi ʻe ha tokotaha ia ʻa e meʻa ʻoku totonu ke foakí, ka ʻokú ne hoko ai ʻo masiva ʻangoʻango.+
25 Ko e tokotaha nima-homó ʻe lakalakaimonū,*+Pea ʻilonga ʻa ia ʻokú ne fakaivifoʻou* ʻa e niʻihi kehé ʻe fakaivifoʻou ia.+
26 ʻE talatukiʻi ʻe he kakaí ʻa e tokotaha ʻokú ne taʻofi ʻa e uité,Ka te nau tāpuakiʻi ʻa e tokotaha ʻokú ne fakatau atu iá.
27 Ko e tokotaha ʻoku feinga tōtōivi ke fai ʻa e meʻa ʻoku leleí ʻokú ne feinga ke maʻu ʻa e leleiʻiá,+Ka ko e tokotaha ʻoku kumi ki he koví—ko e meʻa ia ʻe hoko moʻoni mai kiate iá.+
28 Ko e tokotaha ʻoku falala ki heʻene koloá te ne tō,+Ka ko e māʻoniʻoní ʻe maʻuiʻui hangē ha ʻakau lau matá.+
29 Ko ha taha pē ʻokú ne ʻomi ha faingataʻa* ki hono falé ko e koto halaʻatā* pē te ne maʻú,+Pea ko e valé te ne hoko ko ha sevāniti ki he tokotaha loto-potó.
30 Ko e fua ʻo e tokotaha māʻoniʻoní ko ha ʻakau ʻo e moʻuí ia,+Pea ko e tokotaha ʻokú ne ikunaʻi mai ʻa e kakaí ʻokú ne poto.+
31 Ko e moʻoni, kapau ʻoku maʻu ʻe he tokotaha māʻoniʻoni ʻi he māmaní ha totongi,Huanoa hake ai ʻa e tokotaha fulikivanú pea mo e tokotaha angahalá!+
Fakamatala ‘i Lalo
^ Pe “ko ha maka fakamamafa kakato.”
^ Pe “kākaá.”
^ Pe “ngaahi meʻa mahuʻingá.”
^ Pe “tangata fakaʻotuamaté.”
^ Fakafoʻilea, “ʻoku masiva lotó.”
^ Pe “taʻefakaʻapaʻapa.”
^ Fakafoʻilea, “tokotaha laumālie faitōnungá.”
^ Fakafoʻilea, “ʻufiʻufi ha meʻa.”
^ Pe “tataki fakapotopotó.”
^ Pe “fakamoʻui.”
^ Pe “kau faiakonakí.”
^ Fakafoʻilea, “fehiʻa ke.”
^ Pe “talifaki.”
^ Pe “anga-fakamānako.”
^ Pe “Ko ha tangata ʻofa mateaki.”
^ Pe “fakamā.”
^ Fakafoʻilea, “ʻOku fetakinima.”
^ Fakafoʻilea, “tavale.”
^ Fakafoʻilea, “ʻe ʻai ia ke sino.”
^ Fakafoʻilea, “fuʻifuʻi loto-vēkeveke.”
^ Pe “fakamā.”
^ Fakafoʻilea, “matangi.”
