Palōveepi 22:1-29
22 ʻOku lelei ange ke fili ki ha hingoa lelei* ʻi he fili ki ha koloa lahi;+ʻOku lelei ange ke tokaʻi* kita ʻi he silivá mo e koulá.
2 ʻOku tatau* ʻa e koloaʻiá mo e masivá ʻi he meʻá ni:
Naʻe ngaohi fakatouʻosi kinaua ʻe Sihova.+
3 Ko e tokotaha fakapotopotó ʻokú ne sio ki he fakatuʻutāmakí peá ne toi,Ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.*
4 Ko e ola ʻo e anga-fakatōkilaló mo e manavahē kia SihováKo e koloa mo e lāngilangi pea mo e moʻui.+
5 ʻOku ʻi he hala ʻo e tangata anga-pikopikó ʻa e ʻakau talatala mo e ngaahi tauhele,Kae ʻilonga ʻa ia ʻokú ne fakamahuʻingaʻi ʻene moʻuí ʻokú ne hanganaki fakamamaʻo mei ai.+
6 Akoʻi ha tamasiʻi* ʻi he hala ʻoku totonu ke ne ʻalu aí;+Naʻa mo e taimi te ne tupu hake ai ʻo motuʻá ʻe ʻikai te ne mavahe mei ai.+
7 Ko e tokotaha koloaʻiá ʻokú ne pule ki he tokotaha masivá,Pea ko e tokotaha noó ko ha tamaioʻeiki ia ki he tokotaha tali noó.+
8 ʻIlonga ʻa ia ʻokú ne tūtuuʻi ʻa e taʻemāʻoniʻoní te ne utu ʻa e fakatamaki,+Pea ko e tokotoko ʻo ʻene ʻitá ʻe motuhi.+
9 Ko e tokotaha nima-homó* ʻe faitāpuekina,He ʻokú ne vahevahe ʻene meʻakaí ki he masivá.+
10 Kapusi ʻa e tangata manukí,Pea ʻe mole ai ʻa e māvahevahé;ʻE ngata ai ʻa e fakakikihí* mo e laukoví.
11 Ko e tokotaha ʻoku ʻofa ʻi he loto-maʻá pea ʻoku anga-ʻofa ʻene leáTe ne kaumeʻa mo e tuʻí.+
12 Ko e fofonga ʻo Sihová ʻokú ne maluʻi ʻa e ʻiló,Ka ʻokú Ne fulihi ʻa e ngaahi lea ʻa e tokotaha lavakí.+
13 ʻOku pehē ʻe he tokotaha fakapikopikó: “ʻOku ʻi ai ha laione ʻi tuʻa!
ʻE tāmateʻi au ʻi he loto malaʻe fakakoló!”*+
14 Ko e ngutu ʻo e kau fefine tōʻonga fakalieliá* ko ha luo loloto.+
Ko e tokotaha kuo fakahalaiaʻi ʻe Sihová te ne tō ai.
15 ʻOku tāvani ʻa e valé ʻi he loto ʻo ha tamasiʻi,*+Ka ko e vaʻakau ʻo e akonakí te ne toʻo ia ke mamaʻo meiate ia.+
16 Ko e tokotaha ʻokú ne kākaaʻi ʻa e masivá ke fakalahi ʻene koloá+Pea mo e tokotaha ʻoku foaki meʻaʻofa ki he koloaʻiáTe na iku ki he masiva ʻangoʻango.
17 Fokotuʻu telinga mai ʻo fanongo ki he ngaahi lea ʻa e potó,+Koeʻuhí ke tali ʻe ho lotó kotoa ʻa ʻeku ʻiló,+
18 He ʻoku lelei ke tauhi ia ʻi loto ʻiate koe,+Koeʻuhí ke hoko kotoa ia ʻo ʻi ho loungutú maʻu ai pē.+
19 Koeʻuhi ke tuʻu hoʻo falalá ʻia Sihova,ʻOku ou ʻoatu kiate koe he ʻahó ni ʻa e ʻiló.
20 ʻIkai kuó u ʻosi tohi atu kiate koe,ʻO ʻoatu ʻa e faleʻi mo e ʻilo,
21 Ke akoʻi koe ki he ngaahi lea ʻoku moʻoni mo falalaʻangá,Koeʻuhí ke ke lava ai ʻo foki mo ha fakamatala totonu ki he tokotaha naʻá ne fekauʻi mai koé?
22 ʻOua naʻá ke kaihaʻa mei he tangata masivá koeʻuhí ko ʻene masivá,+Pea ʻoua naʻá ke laiki ʻa e tangata māʻulaló ʻi he matapā ʻo e koló,+
23 He ko Sihova tonu te ne taukapoʻi kinautolú+Pea te ne toʻo ʻa e moʻui ʻa e faʻahinga ʻoku nau kākaaʻi kinautolú.
24 ʻOua te ke feohi mo e tangata ʻita vavéPe ʻi ai hao kaunga ki he tokotaha ʻoku hehema ke tōlilí,
25 Koeʻuhí ke ʻoua ʻaupito naʻá ke ako ʻa hono ngaahi ʻalungáPea fakataueleʻi ai koe.+
26 ʻOua naʻá ke kau ʻi he faʻahinga ʻoku nau lulululu ʻi ha tukupaá,ʻA ia ʻoku nau fai ha maluʻi ki ha ngaahi noó.+
27 Kapau ʻoku ʻikai ʻi ai haʻo meʻa ke totongiʻaki,ʻE toʻo mai ho mohengá meiate koe!
28 ʻOua naʻá ke ʻunuaki ʻa e fakaʻilonga ʻo e kauʻā ʻi he kuohilíʻA ia naʻe fokotuʻu ʻe hoʻo fanga kuí.+
29 Kuó ke mamata ki ha tangata ʻoku pōtoʻi ʻi heʻene ngāué?
Te ne tuʻu ʻi he ʻao ʻo e ngaahi tuʻí;+ʻE ʻikai te ne tuʻu ʻi he ʻao ʻo e kakai lāuvalé.
Fakamatala ‘i Lalo
^ Fakafoʻilea, “ʻofeina.”
^ Pe “ki ha ongoongo ʻoku lelei.” Fakafoʻilea, “ki ha hingoa.”
^ Fakafoʻilea, “fetaulaki fakataha.”
^ Pe “tauteá.”
^ Pe “kiʻi tama; talavou.”
^ Fakafoʻilea, “Ko ia ʻoku lelei hono matá.”
^ Pe “hopó.”
^ ʻA ia, ko ha feituʻu faiʻanga meʻa tefito ia ʻo e koló ki he kakaí.
^ Pe “kiʻi tama; talavou.”
