Sēnesi 30:1-43
30 ʻI he vakai ʻa Lesieli kuo ʻikai te ne fanau kia Sēkopé, naʻá ne hoko ʻo meheka ki hono tokouá pea kamata ke ne pehē kia Sēkope: “ʻOmai haʻaku fānau he ka ʻikai te u mate.”
2 ʻI he meʻa ko ení naʻe ʻita lahi ʻaupito ʻa Sēkope kia Lesieli, pea naʻá ne pehē: “He ʻoku ou ʻi he tuʻunga ʻo e ʻOtuá, ʻa ia kuó ne taʻofi koe mei hono maʻu ha fānaú?”*
3 Ko ia naʻá ne pehē ange: “Ko ena ʻa ʻeku kaunanga ko Pilaá.+ Mohe* mo ia koeʻuhí ke ne fanauʻi ha fānau maʻaku* pea fakafou ʻiate ia, ko au foki ʻe lava ke u maʻu ai ha fānau.”
4 ʻI he meʻa ko iá naʻá ne ʻoange kiate ia ʻa Pilā ko ʻene kaunangá ke hoko ko hono uaifi, pea naʻe mohe ʻa Sēkope mo ia.+
5 Naʻe hoko ʻa Pilā ʻo feitama pea naʻe faifai pē ʻo ne fanauʻi kia Sēkope ha tama tangata.
6 Naʻe pehē leva ʻe Lesieli: “Kuo ngāue ʻa e ʻOtuá ko hoku fakamaau pea kuó ne fanongo foki ki hoku leʻó, ʻo ne foaki mai ai kiate au ha tama tangata.” Ko e ʻuhinga ia naʻá ne fakahingoa ai ia ko Taní.*+
7 Ko Pilā, ʻa e kaunanga ʻa Lesielí, naʻá ne toe hoko ʻo feitama pea naʻe faifai pē ʻo ne fanauʻi ha tama hono ua kia Sēkope.
8 Naʻe pehē leva ʻe Lesieli: “Ko e fāinga mālohi kuó u fāinga ʻaki mo hoku tokouá. Kuó u toe hoko foki ko e ikuna!” Ko ia naʻá ne fakahingoa ai ia ko Nafitalai.*+
9 ʻI he vakai ʻa Lia kuo taʻofi ʻa ʻene fanaú, naʻá ne toʻo ʻa Silipa ko ʻene kaunangá ʻo ne ʻoange ia kia Sēkope ke hoko ko hono uaifi.+
10 Pea ko Silipa ko e kaunanga ʻa Liá, naʻá ne fanauʻi ha tama tangata kia Sēkope.
11 Naʻe pehē leva ʻe Lia: “Ko ha monūʻia ē!” Ko ia naʻá ne fakahingoa ai ia ko Kata.*+
12 ʻI he hili iá, ko Silipa ʻa e kaunanga ʻa Liá, naʻá ne fanauʻi ha tama hono ua kia Sēkope.
13 Naʻe pehē leva ʻe Lia: “He fiefia ē ko au! He ʻe fakahaaʻi moʻoni ʻe he ngaahi ʻofefiné ʻoku ou fiefia.”+ Ko ia naʻá ne fakahingoa ai ia ko ʻĀseli.*+
14 Pea naʻe luelue atu ʻa Lūpeni+ ʻi he ngaahi ʻaho ʻo e utu-taʻu uité, ʻo ne maʻu ha ʻakau fakafanau* ʻi he vaó. Ko ia naʻá ne ʻomai ia kia Lia ko ʻene faʻeé. Naʻe pehē ange leva ʻe Lesieli kia Lia: “ʻOmai muʻa kiate au ha meʻa mei he ʻakau fakafanau ʻa hoʻo tamasiʻí.”
15 ʻI he meʻá ni naʻá ne pehē kiate ia: “Ko ha meʻa siʻisiʻi ia ʻa hoʻo ʻave ʻa hoku husepānití?+ Pea ko eni te ke toe ʻave koā ʻa e ʻakau fakafanau ʻa ʻeku tamasiʻí?” Ko ia naʻe pehē ange ʻe Lesieli: “Lelei ʻaupito. Te ne mohe mo koe he poó ni ke fetongiʻaki ʻa e ʻakau fakafanau ʻa hoʻo tamasiʻí.”
16 ʻI he haʻu ʻa Sēkope mei he feituʻu kaikaiʻangá ʻi he efiafí, naʻe ʻalu atu ʻa Lia ke fakafetaulaki kiate ia ʻo ne pehē: “Te ke mohe mo au, he kuó u totongiʻi moʻoni koe ʻaki ʻa e ʻakau fakafanau ʻa ʻeku tamasiʻí.” Ko ia naʻá ne mohe mo ia ʻi he pō ko iá.
17 Pea naʻe fanongo ʻa e ʻOtuá ʻo ne fai ha tali kia Lia, pea naʻá ne hoko ʻo feitama pea naʻe faifai atu pē ʻo ne fanauʻi kia Sēkope ha tama hono nima.
18 Naʻe pehē leva ʻe Lia: “Kuo ʻomi ʻe he ʻOtuá kiate au ʻa ʻeku totongí* koeʻuhí kuó u foaki ʻa ʻeku kaunangá ki hoku husepānití.” Ko ia naʻá ne fakahingoa ai ia ko ʻĪsaka.*+
19 Pea naʻe hoko ʻa Lia ʻo toe feitama pea naʻe faifai atu pē ʻo ne fanauʻi ha tama hono ono kia Sēkope.+
20 Naʻe pehē leva ʻe Lia: “Kuo fakakoloa au ʻe he ʻOtuá, ʻio, ʻa au, ʻaki ha koloa lelei. Ko eni, ʻe kātakiʻi au+ ʻe hoku husepānití, he kuó u fanauʻi kiate ia ha fānau tangata ʻe toko ono.”+ Ko ia naʻá ne fakahingoa ai ia ko Sepuloni.*+
21 ʻI he hili iá, naʻá ne fanauʻi ha taʻahine pea fakahingoa ia ko Taina.+
22 Faifai atu pē naʻe manatua ʻe he ʻOtuá ʻa Lesieli, pea naʻe fanongo ʻa e ʻOtuá mo ne fai ha tali kiate ia ʻaki ʻene ʻai ia ke malava ʻo ne feitama.*+
23 Pea naʻá ne hoko ʻo feitama ʻo ne fanauʻi ha tama tangata. Naʻá ne pehē leva: “Kuo toʻo ʻe he ʻOtuá ʻa hoku fakamāʻangá!”+
24 Ko ia naʻá ne fakahingoa ia ko Siosifa,*+ ʻo ne pehē: “ʻOku toe tānaki mai ʻe Sihova ha tama ʻe taha kiate au.”
25 ʻI he hili hono fanauʻi ʻe Lesieli ʻa Siosifá, naʻe pehē ange leva ʻe Sēkope kia Lēpani: “Tuku mai au ke u ʻalu ki hoku feituʻú pea ki hoku fonuá.+
26 Tuku mai mo hoku ngaahi uaifí mo ʻeku fānaú, ʻa ia kuó u ngāue ai kiate koé, koeʻuhi ke u ʻalu, he ʻokú ke ʻiloʻi lelei ʻa e anga ʻo ʻeku ngāue kiate koé.”+
27 Naʻe pehē ange leva ʻe Lēpani kiate ia: “Kapau kuó ke leleiʻia ʻiate au,—kuó u mahinoʻi mei he ngaahi fakaʻilongá* ʻoku tāpuakiʻi au ʻe Sihova koeʻuhí ko koe.”
28 Pea naʻá ne hoko atu: “Fakahaaʻi pau mai ʻa hoʻo totongí kiate au, pea te u ʻoatu ia.”+
29 Ko ia naʻe pehē ange ʻe Sēkope kiate ia: “ʻOkú ke ʻiloʻi ʻa e anga ʻo ʻeku ngāue kiate koé mo e tuʻunga ne ʻi ai hoʻo tākangá ʻiate aú;+
30 naʻe siʻi ʻa e meʻa naʻá ke maʻu ki muʻa ʻi heʻeku haʻú, ka kuo tupu mo tokolahi hoʻo tākangá, pea kuo tāpuakiʻi koe ʻe Sihova talu mei heʻeku aʻu maí. Ko ia ko ʻafē nai te u fai ai ha meʻa maʻa hoku falé tonu?”+
31 Naʻá ne pehē ange leva: “Ko e hā te u ʻoatu kiate koé?” Pea naʻe pehē ʻe Sēkope: “ʻE ʻikai te ke ʻomai ha meʻa kiate au tatau ai pē pe ko e hā! Kapau te ke fai kiate au ʻa e meʻa pē ko ení ʻe taha, ʻe toe hoko atu ʻeku tauhi ʻa hoʻo tākangá mo leʻohi iá.+
32 Te u fou atu ʻi hoʻo tākangá kotoa he ʻahó ni. Ke ke vaheʻi mei ai ʻa e sipi ʻileʻila mo pulepule kotoa pē, mo e sipi lanu melomelo mālohi kotoa pē ʻi he lotolotonga ʻo e fanga kiʻi sipi tangatá pea mo ha kosi pulepule mo ʻileʻila pē ʻi he lotolotonga ʻo e fanga kosi fefiné. Ke hoko ʻa e ngaahi meʻá ni ko ʻeku totongí+ ia mei he taimí ni ʻo faai atu.
33 Pea kuo pau ke lea maʻaku ʻa ʻeku māʻoniʻoní* ʻi ha ʻaho he kahaʻú te ke haʻu ai ke vakaiʻi ʻa ʻeku totongí; ko ia kotoa pē ʻa ia ʻoku ʻikai ʻileʻila mo pulepule ʻi he lotolotonga ʻo e fanga kosi fefiné mo ʻikai lanu melomelo mālohi ʻi he lotolotonga ʻo e fanga kiʻi sipi tangatá ʻe lau ia kuo kaihaʻasi kapau ʻoku ʻiate au.”
34 ʻI he meʻá ni naʻe pehē ʻe Lēpani: “ʻOku lelei ia! Tuku ke fai ʻo fakatatau ki hoʻo leá.”+
35 ʻI he ʻaho leva ko iá, naʻá ne fakamavaheʻi ʻa e fanga kosi tangata naʻe matohitohi mo pulepulé mo e fanga kosi fefine kotoa pē naʻe ʻileʻila mo pulepulé, ʻa ia kotoa pē naʻe ʻi ai ha lavatea mo ia kotoa pē naʻe lanu melomelo mālohi ʻi he lotolotonga ʻo e fanga kiʻi sipi tangatá, pea naʻá ne ʻoange ia ke tokangaʻi ʻe hono ngaahi fohá.
36 ʻI he hili iá, naʻá ne taki ʻa ʻene tākangá ki ha feituʻu ʻa ia ko hono mamaʻó ko ha fononga ʻaho ʻe tolu meia Sēkope, pea naʻe tauhi ʻe Sēkope ʻa e ngaahi tākanga ʻa Lēpani naʻe toé.
37 Naʻe toʻo leva ʻe Sēkope ʻa e ngaahi vaʻakau ne toki tuʻusi mei he ʻakau ko e sitolaki,* ʻalimoni, mo e paleiní, peá ne fohi ia ʻo ʻasi hake ʻa e fanga kiʻi konga hinehina mei he ngaahi vaʻakaú.
38 Naʻá ne tuku leva ʻa e ngaahi vaʻakau naʻá ne fohí ʻi muʻa ʻi he tākangá, ʻi he ngaahi meʻa fakatafenga vaí, ʻi he ngaahi ʻaiʻanga inú, ʻa ia ʻe haʻu ʻa e ngaahi tākangá ʻo inu ai, ke nau lava ʻo fakatouʻia ʻi muʻa he ngaahi vaʻakaú ʻi heʻenau haʻu ʻo inú.
39 Ko ia naʻe fakatouʻia ʻa e ngaahi tākangá ʻi muʻa ʻi he ngaahi vaʻakaú, pea naʻe fanauʻi ai ʻe he ngaahi tākangá ʻa e ʻuhiki matohitohi, ʻileʻila, mo pulepule.
40 Naʻe fakamavaheʻi leva ʻe Sēkope ʻa e fanga kiʻi sipi tangatá pea fakahanga ʻa e ngaahi tākangá ki he fanga manu matohitohí mo e fanga manu lanu melomelo mālohi kotoa pē ʻi he lotolotonga ʻo e ngaahi tākanga ʻa Lēpaní. Pea naʻá ne fakamavaheʻi leva ʻa ʻene ngaahi tākanga ʻaʻaná, ʻo ʻikai fio kinautolu mo e ngaahi tākanga ʻa Lēpaní.
41 Pea ko e taimi pē naʻe fakatouʻia ai ʻa e fanga manu mālohí, naʻe tuku ʻe Sēkope ʻa e ngaahi vaʻakaú ʻi he ngaahi meʻa fakatafenga vaí ke sio ki ai ʻa e ngaahi tākangá, ke nau lava ʻo fakatouʻia ofi ki he ngaahi vaʻakaú.
42 Ka ʻi he taimi naʻe vaivai ai ʻa e fanga manú, naʻe ʻikai te ne tuku ai ʻa e ngaahi vaʻakaú. Ko ia naʻe hoko maʻu pē ʻo maʻu ʻe Lēpani ʻa e fanga manu vaivaí, ka ko e fanga manu mālohí naʻe maʻu ia ʻe Sēkope.+
43 Pea naʻe hoko ʻa e tangatá ʻo lakalakaimonū ʻaupito, pea naʻá ne maʻu ʻa e ngaahi tākanga lahi mo e kau tamaioʻeiki mo e kau kaunanga mo e fanga kāmeli mo e fanga ʻasi.+
Fakamatala ‘i Lalo
^ Pe “taʻofi ʻa e fua ʻo e manavá meiate koé?”
^ Pe “Fehokotaki fakasino.”
^ Fakafoʻilea, “fāʻele ʻi hoku funga tuí.”
^ ʻOku ʻuhingá ko e “Fakamaau.”
^ ʻOku ʻuhingá “Ko ʻEku Fāinga.”
^ ʻOku ʻuhingá ko e “Monūʻia.”
^ ʻOku ʻuhingá ko e “Fiefia; Fiefiaʻanga.”
^ ʻOku ʻikai ha fakamoʻoni ia naʻe tokoni moʻoni ʻa e ʻakaú ni ki he fakafanaú.
^ Pe “ʻa e totongi ʻa ha tokotaha ngāue totongi.”
^ ʻOku ʻuhingá “Ko Ia ʻa e Totongí.”
^ ʻOku ʻuhingá ko e “Kātakiʻi.”
^ Fakafoʻilea, “pea naʻe fanongo ʻa e ʻOtuá kiate ia peá ne fakaava hono manavá.”
^ Ko ha fakanounou ʻo e Siosifiá, ʻa ia ʻoku ʻuhingá ko e “ʻOfa ke Tānaki Mai (Fakalahi) ʻe Iā.”
^ Pe “mei he fakamoʻoní.”
^ Pe “faitotonú.”
^ Ko ha fuʻu ʻakau matala fakaʻofoʻofa mo namu-kakala.
