Sēnesi 44:1-34
44 Ki mui ai, naʻá ne fai ha tuʻutuʻuni ki he tangata naʻá ne tokangaʻi hono falé: “Fakafonu ʻa e ngaahi tangai ʻa e kau tangatá ʻaki ʻa e lahi ʻo e meʻakai ʻe lava ke nau ʻavé, pea faʻo ʻa e paʻanga ʻa e tokotaha taki taha ʻi heʻene ngutuʻi tangaí.+
2 Ka kuo pau ke ke faʻo ʻa ʻeku ipú, ʻa e ipu silivá, ʻi he ngutuʻi tangai ʻa e siʻisiʻi tahá, fakataha mo e paʻanga ki heʻene uité.” Ko ia naʻá ne fai ʻo hangē pē ko ia ko e fakahinohino ʻa Siosifá.
3 ʻI he pongipongí ʻi heʻene maama haké, naʻe fekauʻi atu ʻa e kau tangatá ke nau ō mo ʻenau fanga ʻasí.
4 Naʻe teʻeki ai ke nau mamaʻo atu mei he koló kuo pehē ʻe Siosifa ki he tangata naʻá ne tokangaʻi ʻa hono falé: “Tuʻu hake! Tulimui atu ki he kau tangatá! ʻI hoʻo maʻu atu kinautolú, te ke pehē kiate kinautolu, ‘Ko e hā kuo mou totongi ai ʻa e leleí ʻaki ʻa e koví?
5 ʻIkai ko e meʻa eni ʻoku inu mei ai ʻa hoku ʻeikí mo ngāueʻaki ki hono tala totonu ʻa e ngaahi fakaʻilongá? Ko ha meʻa fulikivanu eni kuo mou faí.’”
6 Ko ia naʻá ne maʻu atu kinautolu peá ne leaʻaki ʻa e ngaahi leá ni kiate kinautolu.
7 Ka naʻa nau pehē kiate ia: “Ko e hā ʻoku lea pehē ai ʻa homau ʻeikí? Mole ke mamaʻo ha fakakaukau atu ʻe fai ʻe hoʻo kau sevānití ha meʻa peheni.
8 Ko ē, ko e paʻanga naʻa mau maʻu ʻi heʻemau ngaahi ngutuʻi tangaí naʻa mau fakafoki mai ia kiate koe mei he fonua ko Kēnaní.+ ʻE lava fēfē leva ke mau kaihaʻasi ha siliva pe koula mei he fale ʻa ho ʻeikí?
9 Kapau ʻe maʻu ia ʻi ha taha ʻo hoʻo kau tamaioʻeikí, tuku ke ne mate, pea ko e toenga ʻo kimautolú te mau hoko foki ko e kau tamaioʻeiki ki homau ʻeikí.”
10 Ko ia naʻá ne pehē: “Tuku ke hoko ʻo hangē ko hoʻomou leá: Ko e tokotaha ʻe maʻu aí ʻe hoko ia ko ʻeku tamaioʻeiki, ka ko e toenga ʻo kimoutolú ʻe tonuhia.”
11 ʻI he meʻa ko iá naʻe tuku hifo fakavave ʻe he tokotaha taki taha ʻa ʻene tangaí ki he kelekelé pea fakaava ia.
12 Naʻá ne kumi fakalelei, ʻo kamata ʻi he lahi tahá pea fakaʻosi ki he siʻisiʻi tahá. Faifai atu pē naʻe maʻu ʻa e ipú ʻi he tangai+ ʻa Penisimaní.
13 Naʻa nau haehae leva honau ngaahi kofú, pea naʻa nau taki taha hiki hake ʻene uta ʻo fakafoki ki heʻene ʻasí pea nau toe foki ki he koló.
14 ʻI he hū ʻa Siuta+ mo hono fanga tokouá ki he fale ʻo Siosifá, naʻá ne kei ʻi ai pē; pea naʻa nau tō hifo ki he kelekelé ʻi hono ʻaó.+
15 Naʻe pehē ange ʻe Siosifa kiate kinautolu: “Ko e hā ʻa e tōʻonga ko eni kuo mou faí? ʻOku ʻikai koā ke mou ʻilo ko ha tangata hangē ko aú ʻoku lava ke u tala totonu ʻa e ngaahi fakaʻilongá?”+
16 ʻI he meʻá ni naʻe tali ange ʻe Siuta: “Ko e hā ʻe lava ke mau fakahaaʻi ki homau ʻeikí? Ko e hā ʻe lava ke mau leaʻakí? Pea ʻe lava fēfē ke mau fakatonuhiaʻi kimautolu? Kuo ʻafioʻi ʻe he ʻOtua moʻoní ʻa e fehālaaki ʻa hoʻo kau tamaioʻeikí.+ Kuo mau hoko he taimí ni ko e kau tamaioʻeiki ʻa homau ʻeikí, fakatouʻosi ʻa kimautolu pea mo e tokotaha ʻa ia naʻe ʻilo ʻa e ipú ʻi hono nimá!”
17 Kae kehe, naʻá ne pehē: “Mole ke mamaʻo ha fakakaukau atu te u fai ha meʻa peheni! Ko e tangata ʻa ia naʻe ʻilo ʻa e ipú ʻi hono nimá ko e tokotaha ia ʻe hoko ko e tamaioʻeiki kiate aú.+ Ko e meʻa ki he toenga ʻo kimoutolú, mou ʻalu atu ʻi he fiemālie ki hoʻomou tamaí.”
18 Naʻe ʻunuʻunu atu leva ʻa Siuta kiate ia ʻo ne pehē: “ʻOku ou kōlenga atu kiate koe, ʻe hoku ʻeiki, tuku muʻa ke leaʻaki ha meʻa ʻe hoʻo tamaioʻeikí ke fanongo ki ai ʻa hoku ʻeikí, pea ʻoua muʻa te ke ʻita ki hoʻo tamaioʻeikí, he ʻokú ke hangē pē ko Feló tonu.+
19 Naʻe ʻeke mai ʻe homau ʻeikí ki heʻene kau tamaioʻeikí, ‘ʻOku ʻi ai haʻamou tamai pe ko hamou tokoua?’
20 Ko ia naʻa mau pehē ki homau ʻeikí, ‘ʻOku ʻi ai ʻemau tamai kuo toulekeleka mo ha tama ʻi heʻene taʻumotuʻá, ko e siʻisiʻi tahá ia.+ Ka ko hono tokouá ʻoku ʻosi mate,+ ko ia ʻa e tama pē ʻe taha ʻa ʻene faʻeé ʻoku kei toé,+ pea ʻoku ʻofa ʻiate ia ʻa ʻene tamaí.’
21 ʻI he hili iá, naʻá ke pehē ki hoʻo kau tamaioʻeikí, ‘ʻOmi ia kiate au koeʻuhí ke u sio kiate ia.’+
22 Ka naʻa mau pehē ki homau ʻeikí, ‘Ko e tamasiʻí ʻoku ʻikai lava ke mavahe mei heʻene tamaí. Kapau te ne mavahe meiate ia, ko e moʻoni ʻe mate+ ʻa ʻene tamaí.’
23 Naʻá ke pehē leva ki hoʻo kau tamaioʻeikí, ‘Ka ʻikai ke haʻu ʻa homou tokoua siʻisiʻi tahá mo kimoutolu, ʻe ʻikai te mou toe sio ki hoku matá.’+
24 “Ko ia naʻa mau ʻalu atu ki hoʻo sevāniti ko ʻeku tamaí ʻo fakahā kiate ia ʻa e ngaahi lea ʻa homau ʻeikí.
25 Ki mui ai, naʻe pehē ʻe heʻemau tamaí, ‘Mou foki ʻo fakatau mai ha kiʻi meʻakai maʻatautolu.’+
26 Ka naʻa mau pehē, ‘ʻOku ʻikai lava ke mau ʻalu hifo. Kapau ʻe ʻiate kimautolu ʻa homau tokoua siʻisiʻi tahá te mau ʻalu hifo, koeʻuhí heʻikai lava ke mau sio ki he mata ʻo e tangatá kae ʻoua ke mau ō mo homau tokoua siʻisiʻi tahá.’+
27 Naʻe pehē mai leva ʻe hoʻo tamaioʻeiki ko ʻeku tamaí kiate kimautolu, ‘ʻOku mou ʻiloʻi lelei naʻe fanauʻi ʻe hoku uaifí ha foha ʻe toko ua pē kiate au.+
28 Ka naʻe mavahe meiate au ʻa e taha ʻiate kinaua pea naʻá ku pehē: “Kuo pau moʻoni naʻe haehae ia!”+ Pea kuo ʻikai ke u sio kiate ia ʻo aʻu mai ki he taimí ni.
29 Kapau te mou toe ʻave mo e tokotaha ko ení mei hoku ʻaó pea tō kiate ia ha fakatuʻutāmaki ke mate ai, ko e moʻoni te mou ʻohifo ai ʻa hoku ʻulu hinaá ʻi he mamahi+ ki he Faʻitoká.’*+
30 “Pea ko eni kapau te u foki ki hoʻo tamaioʻeiki ko ʻeku tamaí ʻo ʻikai te mau ʻalu fakataha mo e tamasiʻí, he ko ʻene moʻuí ʻoku piki ua ia mo e moʻui ʻa e tokotaha ko ení,
31 pea ʻi heʻene sio pē ʻoku puli ʻa e tamasiʻí te ne mate, pea ko hoʻo kau tamaioʻeikí ko e moʻoni te nau ʻohifo ʻa e ʻulu hinā ʻa hoʻo tamaioʻeiki ko ʻemau tamaí ʻi he mamahi ki he Faʻitoká.*
32 Ko hoʻo tamaioʻeikí naʻá ne fai ha fakapapau ki heʻeku tamaí koeʻuhi ko e tamasiʻí, ʻo pehē, ‘Ka ʻikai ke u fakafoki mai ia kiate koe, tā te u angahala ki heʻeku tamaí ʻo taʻengata.’+
33 Ko ia leva, tuku muʻa ke nofo ʻa hoʻo tamaioʻeikí kae ʻikai ko e tamasiʻí ʻo hoko ko e tamaioʻeiki ʻa hoku ʻeikí, kae lava ʻo foki ʻa e tamasiʻí mo hono fanga tokouá.
34 ʻE lava fēfē ke u foki ki heʻeku tamaí ʻo ʻikai te u ʻalu mo e tamasiʻí? Heʻikai lava ke u makātakiʻi ʻa e sio atu ki he tō ʻa e mamahi ko ení ki heʻeku tamaí!”
Fakamatala ‘i Lalo
^ Pe “ki Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe “ki Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
