Teutalōnome 32:1-52
32 “Fokotuʻu telinga mai, ʻa e langí, ka u lea atu,Pea tuku ki he māmaní ke ne fanongoa ʻa e ngaahi lea ʻa hoku ngutú.
2 ʻE tō hifo ʻeku fakahinohinó hangē ko e ʻuhá;ʻE tulutā hangē ko e hahaú ʻa ʻeku ngaahi leá,Hangē ko e taumosi ki he musié naPea hangē ko e ʻuha lahi ki he ʻakaú na.
3 He te u talaki ʻa e huafa ʻo Sihová.+
ʻO tala ʻa e lahi ʻa hotau ʻOtuá!+
4 Ko e Makatuʻu, ʻoku haohaoa ʻa ʻene ngāué,+He ko e fakamaau totonu+ ʻa ʻene founga fulipē.
Ko ha ʻOtua faitōnunga+ ʻoku ʻikai ʻaupito taʻefaitotonu;+Ko iá ʻoku māʻoniʻoni mo anga-tonu.+
5 Ko kinautolu ia kuo faikākaá.+
ʻOku ʻikai ko ʻene fānau, ko e melé ko honau foʻui pē ia.+
Ko ha toʻutangata+ pikopiko mo mioʻi ʻa kinautolú na!
6 ʻOku peheni koā hoʻomou tōʻongafai kia Sihová,+ʻA e kakai vale mo taʻepotó na?+
ʻIkai ko hoʻo Tamai ia naʻá ne fakatupu koé,+Ko e Tokotaha ia naʻá ne ngaohi koe mo fokotuʻu maʻu koé?
7 Manatu ki he ngaahi ʻaho he kuohilí;Fakakaukau ki he ngaahi taʻu ʻo e toʻutangata kuo mahili atú.
ʻEke ki hoʻo tamaí, pea ʻe lava ke ne tala atu kiate koe;+Ki hoʻo kau mātuʻá, pea te nau fakahaaʻi atu kiate koe.
8 ʻI hono ʻoange ʻe he Fungani Māʻolungá ki he ngaahi puleʻangá honau tofiʻá,+ʻI heʻene vahevahe+ ʻa e ngaahi foha ʻo ʻĀtamá,*Naʻá ne fokotuʻu ʻa e kauʻā ʻo e ngaahi kakaí+ʻO fakatatau ki he tokolahi ʻo e kau ʻIsilelí.+
9 He ko e ʻinasi+ ʻo Sihová ʻa hono kakaí na;Ko Sēkope ʻa hono tofiʻá.+
10 Naʻá ne maʻu ia ʻi ha fonua toafa+Pea ʻi ha toafa+ maomaonganoa, mo ʻuʻulu longoaʻa.
Naʻá ne takatakaiʻi ʻo maluʻi ia, mo tokangaʻi ia,+Pea leʻohi ia ʻo hangē ko hono tamaʻi-matá.+
11 Hangē tofu pē ko ha ʻīkale ʻokú ne ueʻi hono punungá,ʻOkú ne kapakapatā ʻi ʻolunga ʻi hono fāngangá,ʻO ne folahi atu hono kapakaú, ʻo ne ʻave kinautolu,ʻO ne fua kinautolu ʻi hono kapakaú,+
12 Ko Sihova pē taha naʻá ne hanganaki tataki iá;*+Ne ʻikai ha ʻotua muli naʻe ʻiate ia.+
13 Naʻá ne ʻai ia ke ne heka ʻi he ngaahi potu māʻolunga ʻo e māmaní,+Ko ia ko e fua ʻo e ngoué+ naʻá ne kai mei aí.
Naʻá ne fafanga ia ʻaki ʻa e hone mei he makáMo e lolo mei ha maka fefeka,
14 Ko e pata mei he fanga pulú mo e huʻakau mei he fanga sipí,Fakataha mo e sipi lelei taha aí,Mo e fanga sipi tangata ʻo Pēsaní, mo e kosi tangatá,Fakataha mo e uite lelei tahá;+Pea naʻá ke inu uaine mei he huhuʻa* ʻo e kālepí na.
15 ʻI he sino leva ʻa Sesuluní,* naʻá ne ʻakafute angatuʻu mai.
Kuó ke sino leva, kuó ke hoko ʻo kaukaua, kuó ke hoko ʻo fatufāʻia.+
Ko ia naʻá ne liʻaki ʻa e ʻOtuá, ʻa ia naʻá ne ngaohi iá,+Pea taʻetokaʻi ʻa e Makatuʻu ko hono fakamoʻuiʻangá.
16 Naʻa nau langaʻi ia ke ne houhau ʻi he ngaahi ʻotua mulí;+ʻA e ngaahi meʻa fakalielia+ naʻa nau fakaʻitaʻi ʻakí.
17 Naʻa nau feilaulau ki he fanga tēmeniō, ʻo ʻikai ki he ʻOtuá,+Ki he ngaahi ʻotua naʻe ʻikai te nau ʻiloá,Ko e faʻahinga foʻou naʻa nau toki haʻú ni,Ki he ngaahi ʻotua naʻe ʻikai ʻiloʻi ʻe hoʻomou fanga kuí.
18 Ne ngalo ʻiate koe ʻa e Makatuʻu+ naʻe tamai kiate koé,Pea naʻe ʻikai te ke manatuʻi ʻa e ʻOtua naʻá ne fanauʻi koé.+
19 ʻI he vakai ki ai ʻa Sihová, naʻá ne siʻaki ʻa kinautolú na+He ko hono ngaahi fohá mo hono ngaahi ʻofefiné naʻa nau fakahouhauʻi ia.
20 Ko ia naʻá ne pehē, ‘Te u fufū hoku matá meiate kinautolu;+Te u sio pe ko e hā ʻe hoko ki honau kahaʻú.
He ko kinautolú ko ha toʻutangata mioʻi,+Ko e ngaahi foha ʻoku ʻikai ha faitōnunga+ ai.
21 Kuo nau langaʻi au ke u houhau* ʻi he meʻa ʻoku ʻikai ko ha ʻotua;+Kuo nau fakaʻitaʻi au ʻaki ʻenau ngaahi ʻaitoli taʻeʻaonga.+
Ko ia te u langaʻi ke nau fuaʻa ʻi he meʻa ʻoku ʻikai ko ha kakai;+Te u fakaʻitaʻi kinautolu ʻaki ha puleʻanga vale.+
22 He kuo tupu ha afi ʻi heʻeku ʻitá+ʻA ia ʻe vela ʻo aʻu ki he ngaahi takele ʻo e Faʻitoká,*+Pea te ne keina ʻa e māmaní mo hono fuáPea te ne tutu ke vela ʻa e tefito ʻo e ngaahi moʻungá.
23 Te u fakalahi ʻenau mamahí;Ko kinautolu te u fana ʻeku ngahaú ki aí.
24 Te nau tāvaivaia ʻi he fiekaia+Pea keina ʻe he mofi lahí na mo e fakaʻauha fakaʻulia.+
Te u tuku atu kiate kinautolu+ ʻa e nifo ʻo e fanga manúMo e kona ʻo e manu ngaolo mo totolo ʻo e efú.
25 ʻI tuʻá, ʻe fakaʻauha ai kinautolu+ ʻe ha heletā;ʻI lotó, ʻoku ʻi ai ha ilifia+Fakatouʻosi ki he talavou mo e finemui kei nofo anga-maʻá,ʻA e valevale fakataha mo e tangata ʻulu hinaá.+
26 Ne u mei pehē: “Te u fakamovete kinautolu;Te u ʻai ke ngata ʻi he lotolotonga ʻo e tangatá ʻa e manatu kiate kinautolú,”
27 Ka ne ʻikai ʻeku ilifia ki he tali ʻa e filí,+Telia naʻa hanga ʻe he ngaahi filí ʻo ʻavehalaʻi.+
Te nau pehē: “Kuo ikuna+ homau iví;Naʻe ʻikai ko Sihova naʻá ne fai kotoa ení.”
28 He ko kinautolú ko ha puleʻanga taʻefakakaukau ia,*Pea halaʻatā ha mahino ʻi honau lotolotongá.+
29 Taumaiā naʻa nau poto!+ Te nau fai ki he meʻá ni+ ha fakalaulauloto.
Te nau fakakaukau ki honau ikuʻanga ʻe hoko.+
30 ʻE tuli fēfē ha toko 1,000 ʻe ha toko taha,Pea ʻai ke hola+ ha toko 10,000 ʻe ha toko ua?
Ka ne taʻeʻoua hono fakatau atu kinautolu+ ʻe honau MakatuʻúPea ʻai ke nau tukulolo ʻe Sihová.
31 He ko honau maká ʻoku ʻikai hangē ko hotau Makatuʻú,+Naʻa mo hotau ngaahi filí kuo nau mahinoʻi ia.+
32 He ko ʻenau kālepí ʻoku mei he kālepi ʻo SōtomáPea mei he ngaahi ngoue ʻo Komolá.+
Ko ʻenau kālepí ko e kālepi ʻoku kona,Ko ʻenau ngaahi fuhingá ʻoku tamala.+
33 Ko ʻenau uainé ko e kona ʻo e fanga ngatá,ʻA e kona fakamamahi ʻo e fanga ngatá.
34 ʻIkai ʻoku tuku tauhi ʻiate au ia,ʻO silaʻi ʻi hoku fale tukuʻanga koloá?+
35 Ko e sāuní ʻoku ʻaʻaku ia, mo e faitauteá+ʻI he taimi kotofá ʻi he hekea honau vaʻé na,+He ko e ʻaho ʻo ʻenau tuʻutāmakí ʻoku ofí ni,Pea ko e meʻa ʻoku tatali kiate kinautolú ʻe vave maí ni.’
36 He ko Sihova te ne fakamāuʻi hono kakaí,+Pea te ne ongoʻi fakaʻofaʻia* ʻi heʻene kau sevānití+ʻI heʻene vakai kuo hōloa honau mālohí,Pea ko e faʻahinga pē ʻoku ʻikai hanau tokoní mo e vaivaí ʻoku nau kei toe maí.
37 Te ne folofola leva, ‘Ko fē honau ngaahi ʻotuá,+ʻA e makatuʻu naʻe fai ki ai ʻenau kumi hūfangá,
38 Naʻa nau faʻa kai ʻa e ngako ʻo ʻenau feilaulaú,*ʻO inu ʻa e uaine ʻo ʻenau feilaulau inú?+
Tuku ke nau tuʻu hake ʻo tokoni atu.
Tuku ke nau hoko ko e hūfangaʻanga kiate kimoutolu.
39 Vakai mai ko au—ko au ia,+Pea tuku kehe au+ ʻoku ʻikai ha toe ngaahi ʻotua.
ʻOku ou ʻai ke mate, pea ʻoku ou ʻai ke moʻui.+
ʻOku ou fakalaveaʻi,+ pea te u fakamoʻui,+Pea heʻikai ha taha ʻe lava ke faifakahaofi mei hoku nimá ni.+
40 He ʻoku ou hiki hoku nimá ki he langí na,Peá u fakapapau leva: “ʻOku ou fuakava ʻi heʻeku moʻuí ʻo taʻengata,”+
41 Ka u ka fakamata ʻeku heletā uló naPea teu ʻa hoku nimá ki he fakamaau,+Te u faisāuni ki hoku ngaahi filí+Pea ʻomi tautea ki he faʻahinga ʻoku fehiʻa maí.
42 Te u ʻai ʻeku ngahaú ke konā ʻi he toto,Pea ko ʻeku heletaá ʻe kai kakano,ʻI he toto ʻo e kau maté mo e kau pōpulá,ʻI he ngaahi foʻi ʻulu ʻo e kau taki ʻo e filí na.’
43 Mou fiefia, ʻa e ngaahi puleʻangá, mo hono kakaí,+He te ne sāuni ʻa e toto ʻo ʻene kau sevānití,+Pea te ne faisāuni ki hono ngaahi filí+Pea te ne fai ha ʻufiʻufi angahala maʻá e* fonua ʻo hono kakaí.”
44 Ko ia naʻe haʻu ʻa Mōsese ʻo ne lau ʻa e ngaahi lea kotoa ʻo e hivá ni ʻo fanongo ki ai ʻa e kakaí,+ ʻa ia mo Hōsia*+ ko e foha ʻo Nuní.
45 ʻI he ʻosi hono leaʻaki ʻe Mōsese ʻa e ngaahi leá ni kotoa ki he kotoa ʻo ʻIsilelí,
46 naʻá ne pehē kiate kinautolu: “ʻAi ki homou lotó ʻa e ngaahi lea kotoa ʻo ʻeku fakatokanga kiate kimoutolu he ʻaho ní,+ koeʻuhí ke mou tuʻutuʻuni ki homou ngaahi fohá ke nau tokanga ke fai ki he ngaahi lea kotoa ʻo e Laó ni.+
47 He ʻoku ʻikai ko ha lea taʻemahuʻinga eni kiate kimoutolu, ka ko hoʻomou moʻuiʻangá+ ia, pea fakafou ʻi he leá ni te mou moʻui fuoloa ai ʻi he fonua ʻoku mou kolosi atu ʻi Sioatani ke maʻú.”
48 Naʻe folofola ʻa Sihova kia Mōsese ʻi he ʻaho tatau ko ení, ʻo pehē:
49 “ʻAlu hake ki he moʻunga ko eni ʻo ʻApalemí,+ ʻa Moʻunga Nipo,+ ʻa ia ʻoku ʻi he fonua ko Mōapé, ʻa ē ʻoku hanga atu ki Sielikoó, pea vakai atu ai ki he fonua ko Kēnaní, ʻa ia ʻoku ou foaki ki he kau ʻIsilelí ke nau maʻú.+
50 Te ke mate leva ʻi he moʻunga ʻoku teu ke ke kaka hake aí, pea ʻe fakatahaʻi koe ki ho kakaí,* ʻo hangē tofu pē ko e mate ho tokoua ko ʻĒloné ʻi Moʻunga Hoa+ pea fakatahaʻi ki hono kakaí,
51 koeʻuhí he ko kimoua fakatouʻosi naʻá mo taʻefaitōnunga kiate au ʻi he lotolotonga ʻo e kau ʻIsilelí ʻi he vai ʻo Mēlipá+ ʻi Kētesi ʻi he toafa Siniá, koeʻuhí naʻe ʻikai te mo fakamāʻoniʻoniʻi au ʻi he ʻao ʻo e kakai ʻo ʻIsilelí.+
52 Te ke sio ki he fonuá mei he mamaʻó, ka ʻe ʻikai te ke hū ki he fonua ʻoku ou foaki ki he kakai ʻo ʻIsilelí.”+
Fakamatala ‘i Lalo
^ Pe ngalingali, “ʻa e matakali ʻo e faʻahinga ʻo e tangatá.”
^ ʻA ia, ko Sēkope.
^ Fakafoʻilea, “toto.”
^ ʻOku ʻuhingá ko e “Tokotaha Anga-Tonu,” ko ha hingoa fakalāngilangi ki ʻIsileli.
^ Pe “fuaʻa.”
^ Pe “ʻo Seolí,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe ngalingali, “fakaongotuli ki he faleʻí.”
^ Pe “ongoʻi fakaʻiseʻisa.”
^ Pe “kai ʻenau ngaahi feilaulau lelei tahá.”
^ Pe “te ne fakamaʻa ʻa e.”
^ Ko e muʻaki hingoa ʻo Siosiuá. Ko e Hōsiá ko e fakanounou ia ʻo e Hōsaiá, ʻa ia ʻoku ʻuhingá “Naʻe Fakahaofi ʻe Iā; Kuo Fakahaofi ʻe Iā.”
^ Ko ha kupuʻi lea fakaemaau eni ki he maté.
