Fakamaau 14:1-20
14 Pea naʻe ʻalu hifo ʻa Samisoni ki Timinā, pea naʻá ne sio ki ha fefine Filisitia ʻi Timinā.*
2 Ko ia naʻá ne ʻalu hake ʻo ne fakahā ki heʻene tamaí mo ʻene faʻeé: “Naʻá ku sio ʻi Timinā ki ha fefine Filisitia, pea ʻoku ou loto ke mo ʻomai ia ke hoko ko hoku uaifi.”
3 Ka naʻe pehē ange ʻe heʻene tamaí mo ʻene faʻeé kiate ia: “Meʻa ní heʻikai lava ke ke maʻu ha fefine ʻi he lotolotonga ʻo ho ngaahi kāingá pea ʻi he lotolotonga ʻo hotau kakaí kotoa?+ Kuo pau koā ke ke ʻalu ʻo maʻu ha uaifi mei he lotolotonga ʻo e kau Filisitia taʻekamú?” Ka naʻe pehē ʻe Samisoni ki heʻene tamaí: “ʻOmai ia kiate au, koeʻuhí ko e tokotaha totonu ia kiate aú.”*
4 Naʻe ʻikai ke ʻilo ʻe heʻene tamaí mo ʻene faʻeé ko e meʻa eni ia meia Sihova, he naʻá Ne kumi ki ha faingamālie ke tauʻi ai ʻa e kau Filisitiá, he naʻe puleʻi ʻe he kau Filisitiá ʻa ʻIsileli ʻi he taimi ko iá.+
5 Ko ia naʻe ʻalu hifo ʻa Samisoni mo ʻene tamaí mo ʻene faʻeé ki Timinā. ʻI heʻene aʻu ki he ngaahi ngoue kālepi ʻo Timinaá, vakai, naʻe ngungulu mai ha laione kiate ia.
6 Naʻe fakaivia leva ia+ ʻe he laumālie ʻo Sihová, peá ne hae ia, hangē tofu pē ko hano hae ʻe ha taha ha kiʻi kosi ʻaki hono ongo nimá. Ka naʻe ʻikai te ne tala ki heʻene tamaí pe ko ʻene faʻeé ʻa e meʻa kuó ne faí.
7 Pea naʻá ne ʻalu hifo ʻo ne lea ki he fefiné, pea naʻá ne kei hā totonu ai pē ki he vakai ʻa Samisoní.+
8 Ki mui ai, ʻi heʻene foki ke ʻave ʻa e fefiné ki hono ʻapí,+ naʻá ne afe ki he tafaʻakí ke sio ki he sino ʻo e laione kuo maté, pea naʻe ʻi he ʻangaʻanga ʻo e laioné ha taunga hone mo e hone.
9 Ko ia naʻá ne toʻo mai ʻa e honé ʻo ne ʻai ʻi hono nimá ʻo ne kai ia ʻi heʻene ʻalú. ʻI heʻene aʻu atu ki heʻene tamaí mo ʻene faʻeé, naʻá ne ʻoange ha hone kiate kinaua ke na kai. Ka naʻe ʻikai te ne tala kiate kinaua naʻá ne toʻo ʻa e honé mei he ʻangaʻanga ʻo ha laione.
10 Naʻe ʻalu hifo ʻa ʻene tamaí ki he fefiné, pea naʻe fai ʻe Samisoni ha fuʻu kātoanga kai ʻi ai, he ko e meʻa ia naʻe faʻa fai ʻe he kau talavoú.
11 ʻI he sio kiate ia ʻa e kakaí, naʻa nau ʻomai ke fakafeʻao kiate ia ha kau tangata fononga ʻi he malí ʻe toko 30.
12 Naʻe pehē ange leva ʻe Samisoni kiate kinautolu: “Tuku muʻa ke u tala atu ha tupuʻa kiate kimoutolu. Kapau te mou mateʻi mai ia ʻo tala mai kiate au ʻa e talí ʻi he lolotonga ʻa e ʻaho ʻe fitu ʻo e fuʻu kātoanga kaí, kuo pau ke u ʻoatu kiate kimoutolu ha ngaahi kofu līneni ʻe 30 mo e ngaahi teunga ʻe 30.
13 Ka ʻo ka ʻikai te mou malava ke tala mai kiate au ʻa e talí, kuo pau ke mou ʻomai kiate au ha ngaahi kofu līneni ʻe 30 mo e ngaahi teunga ʻe 30.” Naʻa nau pehē ange: “Tala mai kiate kimautolu ʻa hoʻo tupuʻá; ʻoku mau fie fanongo ki ai.”
14 Ko ia naʻá ne pehē ange kiate kinautolu:
“Naʻe haʻu mei he meʻa ʻokú ne fai ʻa e kaí ha meʻakai,Pea naʻe haʻu mei he meʻa ʻoku mālohí ha meʻa melie.”+
Naʻe ʻikai te nau malava ke mateʻi ʻa e tupuʻá ʻi he ʻaho ʻe tolu.
15 ʻI he ʻaho hono faá, naʻa nau pehē ki he uaifi ʻo Samisoní: “Hanga ʻo kākaaʻi ho husepānití+ koeʻuhi ke ne tala kiate kimautolu ʻa e tali ki he tupuʻá. He ka ʻikai, te mau tutu koe pea mo e fale ʻo hoʻo tamaí ʻaki ʻa e afi. Naʻa mou fakaafeʻi mai koā kimautolu ki hení ke mou ʻave ʻemau koloá?”
16 Ko ia naʻe tangi ʻa e uaifi ʻo Samisoní ʻi hono fatafatá ʻo pehē: “Kuo pau pē ʻokú ke fehiʻa koe ʻiate au; ʻoku ʻikai te ke ʻofa ʻiate au.+ Naʻá ke tala ha tupuʻa ki hoku kakaí, ka kuo ʻikai te ke tala mai ʻe koe ʻa e talí kiate au.” ʻI he meʻá ni naʻá ne pehē ange ai kiate ia: “Sio mai, kuo aʻu ē ki heʻeku tamaí tonu mo ʻeku faʻeé kuo teʻeki ke u tala ia ki ai! Te u tala atu koā ʻe au kiate koe?”
17 Ka naʻá ne hanganaki tangi pē ʻi hono fatafatá ʻi he toenga ʻo e fuʻu kātoanga kai ʻaho ʻe fitú. Naʻe faifai pē peá ne tala ange kiate ia ʻi he ʻaho hono fitú, koeʻuhi naʻá ne fakafiu kiate ia. Pea naʻe tala leva ʻe he fefiné ki hono kakaí ʻa e tali ki he tupuʻá.+
18 Ko ia ʻi he ʻaho hono fitú ʻi he ki muʻa ke tō ʻa e laʻaá,* naʻe pehē ʻe he kau tangata ʻo e koló kiate ia:
“Ko e hā ʻoku melie ange ʻi he honé,Pea ko e hā ʻoku mālohi ange ʻi he laioné?”+
Naʻá ne tali ange kiate kinautolu:
“Ka ne taʻeʻoua hoʻomou toho palau ʻaki ʻeku kiʻi pulú,+Ne ʻikai te mou mei lava ʻo mateʻi mai ʻeku tupuʻá.”
19 Naʻe fakaivia leva ia+ ʻe he laumālie ʻo Sihová, peá ne ʻalu hifo ki ʻAsikeloni+ ʻo ne taaʻi ha toko 30 ʻo ʻenau kau tangatá peá ne toʻo honau valá ʻo ne ʻoange ʻa e ngaahi teungá ki he faʻahinga ko ia naʻa nau tali ʻa e tupuʻá.+ Naʻá ne ʻita tōlili ʻi heʻene foki ki he fale ʻo ʻene tamaí.
20 Pea naʻe foaki ʻa e uaifi ʻo Samisoní+ ki he taha ʻo e kau tangata fononga ʻo ʻene malí ʻa ia naʻe fakafeʻao kiate iá.+
Fakamatala ‘i Lalo
^ Fakafoʻilea, “ko ha fefine ʻi he ngaahi ʻofefine ʻo e kau Filisitiá.”
^ Fakafoʻilea, “ʻoku totonu ia ʻi heʻeku vakaí.”
^ Pe ngalingali, “ki muʻa ke ne hū ki he loki ʻi lotó.”
