Fakamaau 21:1-25
-
Fakahaofi ʻa e matakali Penisimaní (1-25)
21 Pea ko e kau tangata ʻo ʻIsilelí naʻa nau fakapapauʻaki ʻa e fuakava ko ení ʻi Misipā:+ “ʻE ʻikai ha taha ʻo kitautolu te ne ʻoatu ʻa hono ʻofefiné ki ha tangata mei Penisimani ke hoko ko hono uaifi.”+
2 Ko ia naʻe haʻu ʻa e kakaí ki Pēteli+ ʻo nau tangutu ai ʻi he ʻao ʻo e ʻOtua moʻoní ʻo aʻu ki he efiafi, ʻo nau fākafoa mo tangi mamahi.
3 Pea naʻa nau pehē: “ʻE Sihova ko e ʻOtua ʻo ʻIsilelí, ko e hā kuo hoko ai ʻa e meʻá ni ʻi ʻIsilelí? Ko e hā ke mole ai he ʻahó ni ha matakali ʻe taha mei ʻIsileli?”
4 Pea ʻi he ʻaho hono hokó naʻe tuʻu pongipongia hake ʻa e kakaí ʻo nau fokotuʻu ʻi ai ha ʻōlita ke ʻohake ai ha ngaahi feilaulau tutu mo ha ngaahi feilaulau feʻinasiʻaki.+
5 Pea naʻe pehē ʻe he kakai ʻo ʻIsilelí: “Ko hai ʻi he ngaahi matakali kotoa ʻo ʻIsilelí naʻe ʻikai ke haʻu ke fakatahataha ʻi he ʻao ʻo Sihová?” he naʻa nau mātuʻaki fuakava, ʻilonga ha taha naʻe ʻikai ke haʻu kia Sihova ʻi Misipā kuo pau ke tāmateʻi.
6 Ko ia naʻe ongoʻi loto-mamahi ʻa e kakai ʻo ʻIsilelí ʻi he meʻa naʻe hoko kia Penisimani ko honau tokouá. Naʻa nau pehē: “ʻI he ʻaho ní kuo tuʻusi ai mei ʻIsileli ʻa e matakali ʻe taha.
7 Ko e hā te tau fai ke ʻoange ai ha uaifi maʻá e faʻahinga ʻoku toé, he kuo tau fai ha fakapapau ʻia Sihova+ ke ʻoua ʻe ʻoange ha taha ʻo hotau ngaahi ʻofefiné kiate kinautolu ke hoko ko honau uaifi?”+
8 Naʻa nau ʻeke: “Ko hai ʻi he ngaahi matakali ʻo ʻIsilelí naʻe ʻikai ke haʻu kia Sihova ʻi Misipaá?”+ Pea naʻe hoko ʻo pehē, ko Siepesi-kiliati naʻe ʻikai haʻu ha taha mei ai ki he ʻapitanga naʻe ʻi ai ʻa e fakatahaʻangá.
9 ʻI hono lau ʻa e kakaí, naʻa nau ʻilo ai naʻe ʻikai ke ʻi ai ha taha mei he kakai ʻo Siepesi-kiliatí.
10 Ko ia naʻe fekau atu ki ai ʻe he fuʻu fakatahá ha toko 12,000 ʻo e kau tangata toʻa tahá. Naʻa nau tuʻutuʻuni kiate kinautolu: “Mou ō ʻo taaʻi ʻa e kakai ʻo Siepesi-kiliatí ʻaki ʻa e heletaá, ʻo aʻu ki he kakai fefine mo e fānau.+
11 Ko e meʻa eni te mou faí: Ko e tangata kotoa pē pea pehē ki he fefine kotoa pē kuo mohe* mo ha tangata, te mou tuku atu ia ki he fakaʻauha.”
12 ʻI he lotolotonga ʻo e kakai ʻo Siepesi-kiliatí, naʻa nau maʻu ai ʻa e kau finemui kei nofo anga-maʻa ʻe toko 400, ʻa ia naʻe ʻikai te nau mohe mo ha tangata. Ko ia naʻa nau ʻomi kinautolu ki he ʻapitanga ʻi Sailó,+ ʻa ia ʻoku ʻi he fonua ko Kēnaní.
13 Naʻe ʻave leva ʻe he fuʻu fakatahá kotoa ha pōpoaki ki he haʻa Penisimaní ʻi he fuʻu maka ko Līmoní+ pea fai ha tala melino kiate kinautolu.
14 Ko ia naʻe foki mai ʻa Penisimani ʻi he taimi ko iá. Naʻa nau foaki kiate kinautolu ʻa e kakai fefine naʻa nau fakahaofi moʻui mei he kakai fefine ʻo Siepesi-kiliatí,+ ka naʻe ʻikai te nau maʻu ha kakai fefine tokolahi feʻunga kiate kinautolu.
15 Pea naʻe ongoʻi loto-mamahi ʻa e kakaí ʻi he meʻa naʻe hoko ki Penisimaní+ koeʻuhí naʻe ʻai ʻe Sihova ke ʻi ai ha māvahevahe ʻi he lotolotonga ʻo e ngaahi matakali ʻo ʻIsilelí.
16 Naʻe pehē ʻe he kau mātuʻa ʻo e fuʻu fakatahá: “Ko e hā te tau fai ke ʻoange ai ha uaifi maʻá e kau tangata ʻoku toé, he naʻe fakaʻauha ʻosi ʻa e kakai fefine kotoa ʻo Penisimaní?”
17 Naʻa nau tali ange: “ʻOku totonu ke ʻi ai ha tofiʻa ʻo e kau hao moʻui ʻo Penisimaní, koeʻuhí ke ʻoua ʻe mole ʻosi ha matakali ʻo ʻIsileli.
18 Ka ʻoku ʻikai ngofua ke tau ʻoange kiate kinautolu ha uaifi mei hotau ngaahi ʻofefiné, koeʻuhí kuo fai ʻe he kakai ʻo ʻIsilelí ha fakapapau: ‘ʻE malaʻia ʻa e tokotaha te ne ʻoange ha uaifi kia Penisimani.’”+
19 Naʻa nau pehē ange leva: “Vakai! ʻOku ʻi ai ha kātoanga ʻa Sihova ʻi he taʻu ki he taʻu ʻi Sailo,+ ʻa ia ʻoku ʻi he fakatokelau ʻo Pētelí pea ʻi he fakahahake ʻo e hala lahi ʻoku ʻalu hake mei Pēteli ki Sīkemí pea ʻi he fakatonga ʻo Leponá.”
20 Ko ia naʻa nau tuʻutuʻuni ki he kau tangata Penisimaní: “Mou ō ʻo fakatoka ha malumu ʻi he ngaahi ngoue kālepí.
21 Pea ʻi hoʻomou sio ki he kau finemui* ʻo Sailó ʻoku nau haʻu ke fai ʻenau hula takatakaí, ko e tokotaha taki taha ʻo kimoutolu te ne ʻalu atu mei he ngaahi ngoue kālepí ʻo puke mai hano uaifi mei he kau finemui ʻo Sailó, pea te mou foki leva ki he fonua ʻo Penisimaní.
22 Pea ka haʻu ʻenau tamaí pe ko honau fanga tuongaʻané ʻo lāunga mai kiate kimautolu, te mau tala ange leva kiate kinautolu, ‘Mou ʻofa mai koeʻuhí ko ha lelei maʻanautolu, he naʻe ʻikai lava ke mau ʻoange ki he tokotaha taki taha hano uaifi ʻi he tau+ naʻe faí pea heʻikai lava ke mou ʻoange hanau uaifi pea mou taʻehalaia ai.’”+
23 Ko ia naʻe fai ʻe he kau tangata Penisimaní ʻa e meʻa tofu pē ko iá, pea naʻa nau taki taha ʻave hano uaifi mei he kakai fefine naʻe hulá. ʻI he hili iá, naʻa nau foki ki honau tofiʻá ʻo nau toe langa honau ngaahi koló+ pea nau nofo ai.
24 Pea naʻe mātuku ʻa e kau ʻIsilelí mei ai ʻi he taimi ko iá, ko e tokotaha taki taha ki hono matakali mo hono fāmili, pea naʻa nau mavahe mei ai, ko e tokotaha taki taha ki hono tofiʻa.
25 ʻI he ngaahi ʻaho ko iá naʻe ʻikai ha tuʻi ʻi ʻIsileli.+ Naʻe fai ʻe he tokotaha taki taha ʻa e meʻa naʻe totonu ʻi heʻene vakai ʻaʻaná.*
Fakamatala ‘i Lalo
^ Pe “fehokotaki fakasino.”
^ Fakafoʻilea, “ngaahi ʻofefine.”
^ Pe “ʻa e meʻa naʻá ne fakakaukau naʻe totonú.”
