Ki he Kau Loma 10:1-21
10 Fanga tokoua, ko e fakaʻamu ʻa hoku lotó pea mo ʻeku hū tōtōaki ki he ʻOtuá maʻá e kau ʻIsilelí, ko hono moʻoní, ʻoku fai iá ke fakamoʻui ai kinautolu.+
2 He ʻoku ou fakamoʻoni ko kinautolú ʻoku ʻi ai haʻanau faivelenga ki he ʻOtuá,+ ka ʻoku ʻikai ke fakatatau ki he ʻilo totonú.
3 He koeʻuhi ko e ʻikai ke nau ʻiloʻi ʻa e tuʻunga māʻoniʻoni ʻa e ʻOtuá+ ka nau feinga ke fokotuʻu pē haʻanautolú,+ naʻe ʻikai te nau fakamoʻulaloaʻi ai kinautolu ki he tuʻunga māʻoniʻoni ʻa e ʻOtuá.+
4 He naʻe ngata ʻa e Laó ʻia Kalaisi,+ koeʻuhi ko ia kotoa pē ʻokú ne ngāueʻi ʻa e tuí ke ne lava ʻo maʻu ʻa e māʻoniʻoní.+
5 He ʻoku tohi ʻa Mōsese ʻo fekauʻaki mo e tuʻunga māʻoniʻoni fakafou ʻi he Laó: “Ko e tangata ʻokú ne fai ʻa e ngaahi meʻá ni te ne moʻui koeʻuhi ko e ngaahi meʻa ko iá.”+
6 Ka ʻoku tohi ʻo fekauʻaki mo e māʻoniʻoni ʻoku maʻu mei he tuí ʻo pehē: “ʻOua te ke pehē ʻi ho lotó,+ ‘Ko hai ia ʻe ʻalu hake ki he langí?’+ ʻA ia, ke ne ʻohifo ʻa Kalaisi,
7 pe, ‘Ko hai ia ʻe ʻalu hifo ki he luó?’+ ʻA ia, ke ne ʻohake ʻa Kalaisi mei he pekiá.”
8 Ka ko e hā ʻoku leaʻaki ʻe he Folofolá? “Ko e leá ni ʻoku ofi ia kiate koe, ʻoku ʻi ho ngutú tonu pea ʻi ho lotó tonu”;+ ʻa ia, ko e “pōpoaki” ia ʻo e tuí, ʻa ē ʻoku tau malangaʻí.
9 He kapau ʻokú ke talaki fakahāhā ʻaki ho ngutú ko Sīsū ʻa e ʻEikí,+ peá ke ngāueʻi ʻa e tui ʻi ho lotó naʻe fokotuʻu hake ia ʻe he ʻOtuá mei he maté, ʻe fakahaofi koe.
10 Ke māʻoniʻoni ha tangata, kuo pau ke ne ngāueʻi ʻa e tuí ʻi hono lotó, pea ke fakahaofi iá, kuo pau ke ne ngāueʻaki hono ngutú ke talaki ʻa e pōpoaki ko iá.+
11 He ʻoku folofolaʻaki ʻo pehē: “ʻE ʻikai ha taha ʻoku tui kiate ia ʻe loto-mamahi ʻi ha siva ʻa e ʻamanakí.”+
12 He ʻoku ʻikai ha faikehekehe ʻi he vahaʻa ʻo e Siú mo e Kalisí.+ Ko e ʻEiki tatau pē ki he tokotaha kotoa, ʻa ia ʻokú ne hoko ko e fakakoloa lahi* ki he faʻahinga kotoa ʻoku ui kiate iá.
13 He “ko e tokotaha kotoa pē ʻoku ui ki he huafa ʻo Sihová* ʻe fakahaofi.”+
14 Kae kehe, ʻe anga-fēfē haʻanau ui kiate ia kapau kuo teʻeki ai ke nau tui kiate ia? ʻE anga-fēfē leva haʻanau tui kiate ia kuo teʻeki ai ke nau fanongo fekauʻaki mo ia? ʻE anga-fēfē leva haʻanau fanongo ʻo ka ʻikai ha taha ʻe malanga?
15 ʻE anga-fēfē leva haʻanau malanga ʻo ka ʻikai fekauʻi atu kinautolu?+ Hangē tofu pē ko ia kuo tohí: “He fakaʻofoʻofa ē ko e vaʻe ʻo kinautolu ʻoku nau talaki ʻa e ongoongo lelei ʻo e ngaahi meʻa leleí!”+
16 Ka neongo ia, naʻe ʻikai te nau talangofua kotoa ki he ongoongo leleí. He ʻoku pehē ʻe ʻAisea: “ʻE Sihova,* ko hai ia kuo tui ki he meʻa kuo nau fanongo ai meiate kimautolú?”*+
17 Ko ia ʻoku toki tui pē ha tangata ʻi he hili ʻene fanongo ki he folofolá.+ Pea ʻoku fanongoa ʻa e folofolá ʻi he malanga ʻa ha taha fekauʻaki mo Kalaisi.
18 Ka ʻoku ou ʻeke ʻo peheni: Naʻe ʻikai koā te nau fanongo ki he ngaahi pōpoakí? ʻIkai ʻaupito, ko hono moʻoní, “naʻe aʻu atu honau leʻó ki he kotoa ʻo e māmaní, pea mo ʻenau pōpoakí ki he ngaahi ngataʻanga ʻo e māmani kuo nofoʻí.”+
19 Ko ia ʻoku ʻuhinga ení ʻoku ʻikai ʻiloʻi ia ʻe ʻIsileli?+ ʻIkai ʻaupito. ʻUluakí ʻoku pehē ʻe Mōsese: “Te u langaʻi kimoutolu ke mou fuaʻa tupu ʻi ha ngaahi puleʻanga kehe; te u ʻai kimoutolu ke mou ʻita fakamālohi tupu ʻi ha puleʻanga vale.”+
20 Ka ʻoku hoko ʻa ʻAisea ʻo mātuʻaki loto-toʻa ʻo ne pehē: “Naʻe maʻu au ʻe he faʻahinga naʻe ʻikai te nau kumi kiate aú;+ naʻe ʻilo au ʻe he faʻahinga naʻe ʻikai te nau ʻeke aú.”+
21 Ka ʻokú ne pehē ʻo fekauʻaki mo ʻIsileli: “ʻI he ʻahó kotoa kuó u folahi atu hoku nimá mo kōlenga ki ha kakai talangataʻa mo loto-fefeka.”+
Fakamatala ‘i Lalo
^ Pe “ʻokú ne foaki nima-homo.”
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Pe “ki heʻemau fakamatalá?”
