Ki he Kau Loma 5:1-21
5 Ko ia ai, ko eni kuo lau kitautolu ʻoku tau māʻoniʻoni tupu mei he tuí,+ tuku ke tau maʻu ʻa e melino mo e ʻOtuá fakafou ʻi hotau ʻEiki ko Sīsū Kalaisí,+
2 ʻa ia fakafou ʻi he tui kiate iá, kuo ʻatā mai ai ʻa e hala ke tau maʻu ʻa e ʻofa maʻataʻataá, ʻa ia ʻoku tau lolotonga maʻu ní,+ pea tuku ke tau fiefia koeʻuhi ko e ʻamanaki atu ki hono maʻu ʻa e lāngilangi ʻo e ʻOtuá.
3 ʻIkai ngata aí, kae tuku ke tau fiefia lolotonga ʻetau ʻi he ngaahi mamahí,+ koeʻuhí ʻoku tau ʻiloʻi ʻoku tupu mei he mamahí ʻa e kātaki;+
4 ʻoku mei he kātakí leva ʻa e tuʻunga fakahōifua;+ ʻoku mei he tuʻunga fakahōifuá leva ʻa e ʻamanaki,+
5 pea ko e ʻamanakí ʻoku ʻikai iku ia ki he loto-mamahi;+ koeʻuhi ko e ʻofa ʻa e ʻOtuá kuo lilingi mai ia ki hotau lotó fakafou ʻi he laumālie māʻoniʻoní, ʻa ia naʻe foaki mai kiate kitautolú.+
6 He ko e moʻoni, lolotonga ʻetau kei angahalaʻiá,*+ naʻe pekia ʻa Kalaisi maʻá e tangata anga-taʻefakaʻotuá ʻi he taimi ne kotofá.
7 He ʻoku faingataʻa ki ha taha ke mate maʻa ha tangata māʻoniʻoni; neongo ia, ʻe fakatoʻotoʻa nai ha taha ke mate maʻa ha tangata lelei.
8 Ka ko e ʻOtuá ʻokú ne fakahaaʻi lelei mai ʻene ʻofa ʻaʻaná kiate kitautolu ʻi he foungá ni: Naʻe pekia ʻa Kalaisi maʻatautolu lolotonga ʻetau kei hoko ko e kau angahalá.+
9 Ko ia ai, koeʻuhi ʻoku hanga ʻe he taʻataʻa ʻo Kalaisí ʻo ʻai ʻa e ʻOtuá ke ne lau kitautolu ʻoku tau māʻoniʻoni,+ ʻoku tau fakapapauʻi ai ko e meʻa naʻá ne faí te ne fakahaofi kitautolu mei he houhau ʻa e ʻOtuá.+
10 He kapau ko e ʻOtuá ē kuo tau fakalelei mo ia fakafou ʻi he pekia ʻa hono ʻAló+ lolotonga ʻetau hoko ko hono ngaahi filí, huanoa hake ai hono fakahaofi kitautolu ʻaki ʻene moʻuí, ʻa eni kuo fai ai hotau fakaleleí.
11 ʻIkai ngata aí, ka ʻoku tau toe fiefia foki ʻi he ʻOtuá fakafou ʻi hotau ʻEiki ko Sīsū Kalaisí, ʻa ia ʻoku fakafou mai ai ʻetau maʻu ko eni ʻa e fakaleleí.+
12 Ko e ʻuhinga ia, hangē tofu pē ko e fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá,+ pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē+—.
13 He naʻe ʻi he māmaní ʻa e angahalá ia ki muʻa ʻi he Laó, ka ʻoku ʻikai ke tukuakiʻi ha angahala ki ha taha ʻi he ʻikai ke ʻi ai ha laó.+
14 Ka neongo ia, naʻe pule ʻa e maté ko e tuʻi meia ʻĀtama ʻo aʻu kia Mōsese, pea aʻu foki ki he faʻahinga naʻe ʻikai te nau fai ʻa e angahala tatau mo ia naʻe fai ʻe ʻĀtamá, ʻa ia ko ʻĀtamá ko ha tatau ia ʻo e tokotaha naʻe teu ke hoko maí.+
15 Ka ko e meʻaʻofa ʻa e ʻOtuá ʻoku ʻikai ke tatau ia mo e angahalá.* He kapau ko e faihala ē ʻa e tangata ʻe toko tahá ʻoku mate ai ʻa e tokolahi, huanoa hake ai ʻa e mahulu ange* ki he tokolahi+ ʻa e ʻofa maʻataʻatā ʻa e ʻOtuá mo ʻene meʻaʻofa taʻetotongí fakafou ʻi he ʻofa maʻataʻatā ʻa e tangata ʻe toko taha+ ko Sīsū Kalaisí!
16 ʻIkai ko ia pē, ʻoku kehekehe ʻa e ola ʻo e meʻaʻofa taʻetotongí pea mo e angahala naʻe fai ʻe he tangata ʻe toko tahá.+ He ko e faihala ʻa e tokotahá naʻe taki atu ia ki hono lau ʻoku halaia ʻa e kakai kotoa pē,+ ka ko e meʻaʻofa taʻetotongi naʻe hoko mai koeʻuhi ko e faihala ʻa e tokolahi naʻe taki atu ia ki hono lau ʻoku māʻoniʻoni ʻa e kakai tokolahi.+
17 ʻI he angahala ʻa e tangata ʻe toko tahá ʻoku pule ai ʻa e maté ko ha tuʻi.+ Ka ko e ʻofa maʻataʻatā ʻa e ʻOtuá mo ʻene meʻaʻofa taʻetotongi kiate kitautolu ke tau hoko ʻo māʻoniʻoní+ ʻoku lahi ange ia mo lelei ange. Ko e faʻahinga ʻoku nau maʻu ʻa e ngaahi meʻá ni te nau moʻui ʻo fakamālō kia Sīsū Kalaisi,+ pea te nau pule ko e ngaahi tuʻi!+
18 Ko ia leva, hangē pē ko e maʻu ʻe he faʻahinga kotoa pē ʻo e tangatá fakafou ʻi he foʻi faihala ʻe taha ʻa e ikuʻanga ko e fakahalaiá,+ ʻoku pehē pē foki ʻa e maʻu ʻe he faʻahinga kotoa pē ʻo e tangatá fakafou ʻi he foʻi ngāue ʻe taha ʻo e fakatonuhiá+ ʻa e ikuʻanga ko hono lau kinautolu ʻoku nau māʻoniʻoni ki he moʻuí.+
19 He hangē tofu pē ko e fou mai ʻi he talangataʻa ʻa e tangata ʻe toko taha ʻo hoko ai ʻa e tokolahi ko e kau angahalá,+ ʻoku pehē pē ʻa e fou mai ʻi he talangofua ʻa e foʻi toko taha ʻa e hoko ʻa e tokolahi ʻo māʻoniʻoni.+
20 Naʻe hoko mai ʻa e Laó ke fakahaaʻi naʻe mātuʻaki angahalaʻia ʻa e kakaí,+ ka ʻi he lahi fau ʻa e angahalá ʻoku fakahaaʻi ai ʻe he ʻOtuá ia ʻene ʻofa maʻataʻatā ʻo toe lahi ange.
21 Ki he taumuʻa ko e hā? Koeʻuhi hangē tofu pē ko e pule ʻa e angahalá mo e maté ʻo hangē ha tuʻí,+ ke pehē pē foki ʻa e pule ʻa e ʻofa maʻataʻataá ʻo hangē ha tuʻí fakafou ʻi he māʻoniʻoní ʻo taki atu ki he moʻui taʻengata fakafou ʻia Sīsū Kalaisi ko hotau ʻEikí.+
