Maika 1:1-16
1 Naʻe hoko mai ʻa e folofola ʻa Sihová kia Maika*+ ʻo Molesé, ʻi he ngaahi ʻaho ʻo Siotame,+ ʻĀhasi,+ mo Hesekaia,+ ko e ngaahi tuʻi ʻo Siutá,+ pea naʻá ne maʻu ʻi ha vīsone ʻo fekauʻaki mo Samēlia pea mo Selusalema:
2 “Mou fanongo mai, ʻa kimoutolu ngaahi kakai kotoa!
Tokanga mai, ʻa e māmaní mo e meʻa kotoa ʻoku ʻi aí,Pea tuku ki he ʻEiki Hau ko Sihová ke ne hoko ko homou talatalaakí+—ʻA Sihova mei hono temipale tapú.
3 He vakai, ʻoku ʻalu atu ʻa Sihova mei hono feituʻú;Te ne ʻalu hifo ʻo malaki ʻa e ngaahi potu māʻolunga ʻo e māmaní.
4 Ko e ngaahi moʻungá ʻe vaia ʻi lalo ʻiate ia,+Pea ʻe mavaeua ʻa e ngaahi teleʻá*Hangē ha ngako ʻi he afí,Hangē ha vai ʻoku huaʻi hifo ʻi ha foʻi tahifo māsilá.
5 ʻOku hoko kotoa ení koeʻuhí ko e angatuʻu ʻa Sēkopé,Koeʻuhí ko e ngaahi angahala ʻa e fale ʻo ʻIsilelí.+
Ko hai ʻe tukuakiʻi ki he angatuʻu ʻa Sēkopé?
ʻIkai ko Samēlia?+
Pea ko hai ʻe tukuakiʻi ki he ngaahi potu māʻolunga ʻo Siutá?+
ʻIkai ko Selusalema?
6 Te u ʻai ʻa Samēlia ke hoko ko ha kolo maumau,Ko ha feituʻu ke tō ai ha ngaahi ngoue kālepi;Te u laku* hifo hono ngaahi maká ki he teleʻá,Pea te u fakatekelei hono ngaahi fakavaʻé.
7 Ko e kotoa ʻo hono ngaahi ʻīmisi kuo tongí ʻe laiki ke kongokonga,+Pea ko e ngaahi meʻaʻofa kotoa naʻe totongiʻi ʻaki iá* ʻe tutu ʻi he afí.+
Te u fakaʻauha ʻa ʻene ngaahi ʻaitolí kotoa.
He naʻá ne tānaki ia mei he ngaahi totongi ʻo ʻene feʻauakí,Pea ʻe toe totongiʻaki ia ʻa e ngaahi faifeʻauaki.”
8 Koeʻuhi ko e meʻá ni te u tangilāulau mo ngala;+Te u luelue laʻivaʻe mo telefua.+
Ko ʻeku tangilāulaú ʻe hangē ko e tangi ʻa e fanga siakalí,Pea ko ʻeku mamahí ʻe hangē ko e mamahi ʻa e fanga ʻositalesí.
9 He ko hono kafó ʻe ʻikai lava ke faitoʻo;+Kuo aʻu atu ia ki Siuta.+
Ko e fakatamakí ni kuo mafola atu ia ki he matapā ʻo hoku kakaí, ki Selusalema.+
10 “ʻOua te mou talaki ia ʻi Kati;Kuo pau ke ʻoua ʻaupito naʻa mou tangi.
Teka ʻi he efú ʻi Pete-ʻāfala.*
11 Mou laka atu ʻi he telefua mo e ongoʻi mā, ʻa e kau nofo* ʻi Safilí.
Kuo ʻikai ke hū ki tuʻa ʻa e kau nofo* ʻi Sānaní.
ʻE ʻi ai ʻa e tangilāulau ʻi Pete-ʻesili, pea te ne toʻo ʻene poupoú meiate kimoutolu.
12 He ko e kau nofo* ʻi Malotí kuo nau tatali ki ha lelei,Ka ko e kovi pē kuo ʻalu hifo meia Sihova ki he matapā ʻo Selusalemá.
13 Teuteu ʻa e salioté ki he fanga hōsí, ʻe kimoutolu kau nofo* ʻi Lākisí.+
Ko koe naʻe tupu mei ai ʻa e angahala ʻa e ʻofefine ʻo Saioné,He naʻe ʻilo ʻiate koe, ʻe ʻofefine ʻo Saione, ʻa e ngaahi angatuʻu ʻa ʻIsilelí.+
14 Ko ia te ke foaki ha ngaahi meʻaʻofa fakamāvae ki Moleseti-kati.
Ko e ngaahi fale ʻo ʻAkesipí+ naʻe hoko ko ha meʻa fakahalahala ia ki he ngaahi tuʻi ʻo ʻIsilelí.
15 Ko e tokotaha ikuná* te u ʻomi ia kiate koe,+ ʻe kau nofo* ʻi Mālesá.+
ʻE aʻu atu ʻa e lāngilangi ʻo ʻIsilelí ki ʻAtulami.+
16 Kosi pea tele homou ʻulú koeʻuhi ko hoʻomou fānau ʻoku mou koloaʻakí.
ʻAi kimoutolu ke mou tula hangē ha ʻīkalé,He kuo ʻave fakamālohi kinautolu meiate koe.”+
Fakamatala ‘i Lalo
^ Ko ha faʻunga fakanounou ʻo e Maikelí (ʻoku ʻuhingá “Ko Hai ʻOku Tatau mo e ‘Otuá?”) pe Maikaia (‘oku ‘uhingá “Ko Hai ‘Oku Tatau mo Sihová?”).
^ Pe “ngaahi talaló.”
^ Fakafoʻilea, “huaʻi.”
^ Pe “ngaahi totongi kotoa ʻo ʻene feʻauakí.”
^ Pe “ʻi he fale ʻo ʻĀfalá.”
^ Fakafoʻilea, “kau fefine ʻoku nofo.”
^ Fakafoʻilea, “kau fefine ʻoku nofo.”
^ Fakafoʻilea, “kau fefine ʻoku nofo.”
^ Fakafoʻilea, “kau fefine ʻoku nofo.”
^ Pe “tokotaha faʻao fakamālohí.”
^ Fakafoʻilea, “kau fefine ʻoku nofo.”
