Saame 140:1-13
Ki he pule hivá. Ko e hiva ʻa Tēvita.
140 Fakahaofi ange au, ʻe Sihova, mei he kau tangata koví;Maluʻi ange au mei he kau tangata fakamālohí,+
2 ʻA kinautolu ʻoku nau faʻufaʻu ʻa e kovi ʻi honau lotó+Pea fakalanga kē ʻi he ʻahó kotoa.
3 ʻOku nau fakamāsila honau ʻeleló ʻo hangē ko e ʻelelo ʻo ha ngatá;+Ko ʻenau leá ʻoku fakatupu maumau ʻo hangē ko e kona mei ha ngatá.+ (Sila)
4 Maluʻi au, ʻe Sihova, mei he nima ʻo e kau fulikivanú;+Leʻohi au mei he kau tangata fakamālohí,ʻA kinautolu ʻoku nau faʻufaʻu ke ʻai au ke u humú.
5 ʻOku fufū ʻe he kau hīkisiá ha tauhele kiate au;ʻOku nau fusi ha kupenga ʻaki ha maea ʻi he veʻehalá+ʻOku nau tau ha ngaahi tauhele kiate au.+ (Sila)
6 ʻOku ou pehē kia Sihova: “Ko koe ʻa hoku ʻOtuá.
Fanongo mai, ʻe Sihova, ki heʻeku tautapa ki ha tokoní.”+
7 ʻE Sihova ko e ʻEiki Hau, ʻa hoku Fakamoʻui mālohí,ʻOkú ke maluʻi ʻa hoku ʻulú ʻi he ʻaho ʻo e taú.+
8 ʻOua naʻá ke ʻoange, ʻe Sihova, ʻa e ngaahi holi ʻa e kau fulikivanú.
ʻOua naʻa tuku ke lavameʻa ʻenau ngaahi faʻufaʻú, koeʻuhí ke ʻoua naʻa hakeakiʻi ai kinautolu.+ (Sila)
9 ʻOfa ke hoko ʻa e ʻulu ʻo kinautolu ʻoku nau takatakaiʻi aúʻO ʻufiʻufi ʻe he kovi ʻoku leaʻaki ʻe honau loungutú.+
10 ʻOfa ke ʻuha hifo ʻa e ngaahi malala uloulo kiate kinautolu.+
ʻOfa ke laku kinautolu ki he afí,Ki ha ngaahi luo loloto,*+ ke ʻoua naʻa nau toe mālanga hake.
11 ʻOfa ke ʻoua naʻa maʻu ʻe he tokotaha laukovi loí hano ʻapi ʻi he māmaní.*+
ʻOfa ke tuli ʻe he koví ʻa e kau tangata fakamālohí ʻo taaʻi kinautolu.
12 ʻOku ou ʻiloʻi ʻe taukapoʻi ʻe Sihova ʻa e māʻulalóPea fai ʻa e fakamaau totonu ki he masivá.+
13 Ko e moʻoni ʻe ʻoatu ʻe he māʻoniʻoní ʻa e fakamālō ki ho huafá;ʻE nofo ʻa e faitotonú ʻi muʻa ʻi ho fofongá.*+
