Saame 30:1-12
-
Liliu ʻa e mamahí ki he fiefia
-
Hōifua ʻa e ʻOtuá ʻoku aʻu ki he ngataʻanga ʻo e moʻuí (5)
-
Ko ha hiva ʻo e fakatapui ʻo e falé. Saame ʻa Tēvita.
30 Te u hakeakiʻi koe, ʻe Sihova, he kuó ke hiki* hake au;Naʻe ʻikai te ke tuku ʻa hoku ngaahi filí ke nau fiefia ʻiate au.+
2 ʻE Sihova ko hoku ʻOtua, naʻá ku tangi kiate koe ki ha tokoni, pea naʻá ke fakamoʻui au.+
3 ʻE Sihova, kuó ke hiki hake au mei he Faʻitoká.*+
Kuó ke tauhi au ke u moʻui; kuó ke fakahaofi au mei heʻeku ʻalu hifo ki he luó.*+
4 Hiva fakahīkihiki* kia Sihova, ʻa kimoutolu ko ʻene kau mateakí,+Fai ha fakamālō ki hono huafa* māʻoniʻoní;+
5 Koeʻuhi ko hono hokosia ʻa ʻene houhaú ʻoku lau mōmeniti pē,+Ka ko hono hokosia ʻa ʻene hōifuá ʻoku aʻu ia ki he ngataʻanga ʻo ʻete moʻuí.+
ʻE hoko mai nai ʻa e tangi ʻi he efiafí, ka ʻi he pongipongí, ʻoku ʻi ai ha kalanga fiefia.+
6 ʻI he taimi naʻe ʻikai ai te u faingataʻaʻiá, naʻá ku pehē:
“ʻE ʻikai ʻaupito ke ueʻia au.”*
7 ʻE Sihova, ʻi he lolotonga ʻa ʻeku maʻu hoʻo hōifuá, naʻá ke ʻai au ke u mālohi hangē ha moʻungá.+
Ka ʻi he taimi naʻá ke fufū ai ho fofongá, naʻá ku hoko ai ʻo mate he ilifiá.+
8 Naʻá ku hanganaki ui+ kiate koe, ʻe Sihova;Pea naʻá ku hanganaki kōlenga kia Sihova ki ha hōifua.
9 Ko e hā ha tupu ʻe maʻu ʻi heʻeku maté,* ʻi heʻeku ʻalu hifo ki he luó?*+
ʻE fakahīkihikiʻi koe ʻe he efú?+ Te ne fakahaaʻi ʻa hoʻo faitōnungá?+
10 Fanongo mai, ʻe Sihova, pea fakahaaʻi mai hoʻo hōifuá.+
ʻE Sihova, hoko muʻa ko hoku tokoni.+
11 Kuó ke liliu ʻeku mamahí ki he meʻe;Kuó ke toʻo atu ʻa hoku tauangaʻá, peá ke fakakofu au ʻaki ʻa e fiefia,
12 Koeʻuhí ke u* hivaʻaki ho fakahīkihikí ʻo ʻikai te u fakalongolongo ai pē.
ʻE Sihova ko hoku ʻOtua, te u fakahīkihikiʻi koe ʻo taʻengata.
Fakamatala ‘i Lalo
^ Pe “fusi.”
^ Pe “mei Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe “faʻitoká.”
^ Pe “Tā fasi.”
^ Fakafoʻilea, “fakamanatu.”
^ Pe “ke u tāsipa (sēlue).”
^ Fakafoʻilea, “ʻi hoku totó.”
^ Pe “faʻitoká.”
^ Pe “ko hoku lāngilangí te ne.”
