Saame 44:1-26
Ki he pule hivá. Ko ha saame ʻa e ngaahi foha ʻo Kolá.+ Masikili.*
44 ʻE ʻOtua, kuo mau fanongo ʻaki homau telingá tonu,Kuo fakamatala mai ʻe heʻemau fanga kuí kiate kimautolu,+ʻA e ngaahi ngāue naʻá ke fakahoko ʻi honau ngaahi ʻahó,ʻI he ngaahi ʻaho ʻo e kuohilí.
2 Naʻá ke kapusi ʻaki ho nimá ha ngaahi puleʻanga+Pea ʻai ʻemau fanga kuí ke nau nofo ai.+
Naʻá ke laiki ha ngaahi puleʻanga pea kapusi kinautolu.+
3 Naʻe ʻikai tupu mei heʻenau heletaá tonu ʻa ʻenau maʻu ʻa e fonuá,+Pea naʻe ʻikai ʻomi ʻe honau nimá kiate kinautolu ʻa e ikuná.+
Ka naʻe faiʻaki ia ho nima toʻomataʻú mo ho mālohí+ pea mo e maama ʻo ho fofongá,He naʻá ke leleiʻia ʻiate kinautolu.+
4 Ko koe ʻa hoku Tuʻí, ʻe ʻOtua;+Tuʻutuʻuni* ha ikuna kakato* maʻa Sēkope.
5 ʻI ho mālohí te mau seʻe atu ai homau ngaahi filí;+ʻI ho huafá te mau tāmoloki ai ʻa e faʻahinga ʻoku nau mālanga hake ʻo fakafepaki maí.+
6 He ʻoku ʻikai te u falala ki heʻeku kaufaná,Pea heʻikai lava ke fakahaofi au ʻe heʻeku heletaá.+
7 Ko koe ia naʻá ke fakahaofi kimautolu mei homau ngaahi filí,+Ko koe kuó ke fakamaaʻi ʻa e faʻahinga ʻoku fehiʻa ʻiate kimautolú.
8 Te mau ʻoatu ʻa e fakahīkihiki ki he ʻOtuá ʻi he ʻahó kotoa,Pea te mau ʻoatu ʻa e fakamālō ki ho huafá ʻo taʻengata. (Sila)
9 Ka ko eni kuó ke siʻaki kimautolu mo fakamaaʻi,Pea ʻoku ʻikai te ke ʻalu atu mo ʻemau kau taú.
10 ʻOkú ke hanganaki ʻai kimautolu ke mau holomui mei homau filí;+Ko e faʻahinga ʻoku nau fehiʻa ʻiate kimautolú ʻoku nau ʻave ha meʻa pē ʻoku nau fiemaʻú.
11 ʻOkú ke tuku atu kimautolu ke keina hangē ha fanga sipí;Kuó ke fakamovetevete atu kimautolu ki he ngaahi puleʻangá.+
12 ʻOkú ke fakatau atu ho kakaí ki ha kiʻi totongi siʻisiʻi pē;+ʻOku ʻikai te ke ʻai ke maʻu ha tupu mei hono fakatau atú.*
13 ʻOkú ke ʻai kimautolu ko ha meʻa fakamā ki homau ngaahi kaungāʻapí,Ko ha manukiaʻanga mo ha fakakataʻanga ʻo e faʻahinga kotoa ʻoku takatakai kiate kimautolú.
14 ʻOkú ke ʻai kimautolu ko ha lumaʻanga* ʻi he lotolotonga ʻo e ngaahi puleʻangá,+Ko ha meʻa ke kalokalo ʻulu ki ai ʻa e ngaahi kakaí.
15 ʻOku ou ongoʻi fakamāʻia ʻi he ʻahó kotoa,Pea ʻoku lōmekina au ʻe heʻeku maá,
16 Koeʻuhi ko e ongo mai ʻa ʻenau lumá mo e laukoví,Koeʻuhi ko e faisāuni mai ʻa homau filí.
17 Ko e kotoa ʻo e meʻá ni kuo hoko mai ia kiate kimautolu, ka kuo ʻikai te mau fakangaloʻi koe,Pea kuo ʻikai te mau maumauʻi hoʻo fuakavá.+
18 Kuo ʻikai afe ʻa homau lotó;ʻOku ʻikai hē ʻa ʻemau ngaahi laká mei ho halá.
19 Ka kuó ke laiki kimautolu ʻi he potu ʻoku nofo ai ʻa e fanga siakalí;*Kuó ke ʻufiʻufi kimautolu ʻaki ha poʻuli matolu.
20 Kapau kuo mau fakangaloʻi ʻa e huafa ʻo homau ʻOtuáPe kapau ʻoku mau fola nima atu ʻi he lotu ki ha ʻotua muli,
21 ʻIkai ʻe ʻafioʻi eni ʻe he ʻOtuá?
He ʻokú ne lāuʻilo ki he ngaahi meʻa fakapulipuli ʻo e lotó.+
22 Koeʻuhi ko e ʻAfioná kuo tāmateʻi ai kimautolu ʻi he ʻahó kotoa;Kuo lau kimautolu ko e fanga sipi ke tāmateʻi.+
23 Ofo hake ā. Ko e hā ʻokú ke kei mohe aí, ʻe Sihova?+
ʻĀ hake! ʻOua te ke hanganaki siʻaki kimautolu ʻo taʻengata.+
24 Ko e hā ʻokú ke fufū ai ho fofongá?
Ko e hā ʻokú ke fakangaloʻi ai ʻemau faingataʻaʻiá mo homau fakafeʻātungiá?
25 He kuo ʻohifo kimautolu ki he efú;ʻOku lolomi hifo homau sinó ki he kelekelé.+
26 Mālanga hake ʻo hoko ko homau tokoni!+
Fakahaofi* kimautolu koeʻuhi ko hoʻo ʻofa mateakí.+
Fakamatala ‘i Lalo
^ Sio ki he Lea mo Hono ʻUhinga.
^ Pe “Foaki.”
^ Pe “fuʻu fakamoʻui.”
^ Pe “ʻi honau totongí.”
^ Fakafoʻilea, “ko ha palōveepi.”
^ Ko ha faʻahinga kulī kaivao.
^ Fakafoʻilea, “Huhuʻi.”
