Saame 78:1-72
-
Tokanga ʻa e ʻOtuá mo e taʻetui ʻa ʻIsilelí
Ko ha masikili* ʻa ʻĒsafe.+
78 ʻE hoku kakai, mou fanongo mai ki heʻeku laó;*Fokotuʻu telinga mai ki he ngaahi lea ʻa hoku ngutú.
2 Te u fakaava ʻa hoku ngutú ʻo leaʻaki ha palōveepi.
Te u ʻoatu ʻa e ngaahi tupuʻa ʻo e kuonga muʻá.+
3 ʻA e ngaahi meʻa kuo tau fanongo ai mo ʻiloʻí,ʻA ia kuo fakamatalaʻi mai ʻe heʻetau ngaahi tamaí kiate kitautolú,+
4 ʻE ʻikai te tau fufū ia mei hotau ngaahi fohá;Te tau fakamatalaʻi ia ki he toʻutangata ka hoko maí+ʻA e ngaahi ngāue ʻa Sihova ʻoku taau ke fakahīkihikiʻí mo hono mālohí,+ʻA e ngaahi meʻa fakaofo kuó ne faí.+
5 Naʻá ne fokotuʻu ha fakamanatu ʻia SēkopePea fokotuʻu ha lao ʻi ʻIsileli;Naʻá ne fekauʻi ʻa ʻetau fanga kuíKe nau ʻai ʻa e ngaahi meʻá ni ke ʻilo ʻe heʻenau fānaú,+
6 Koeʻuhí ko e toʻutangata hono hokó,ʻA e fānau ʻe toki fanauʻí, ke nau ʻiloʻi ia.+
Ko kinautolu leva te nau fakamatalaʻi ia ki heʻenau fānaú.+
7 ʻE falala leva ʻa e faʻahingá ni ki he ʻOtuá.
ʻE ʻikai ngalo ʻiate kinautolu ʻa e ngaahi ngāue ʻa e ʻOtuá+Ka te nau tauhi ʻa ʻene ngaahi fekaú.+
8 ʻE ʻikai leva ai ke nau hangē ko ʻenau fanga kuí,Ko ha toʻutangata loto-fefeka mo angatuʻu,+Ko ha toʻutangata naʻe ʻikai tuʻu maʻu* ʻa honau lotó+Pea naʻe ʻikai faitōnunga ʻa honau laumālié ki he ʻOtuá.
9 Ko e kau ʻIfalemí naʻa nau toʻo kaufana,Ka naʻa nau holomui ʻi he ʻaho ʻo e taú.
10 Naʻe ʻikai te nau tauhi ʻa e fuakava ʻa e ʻOtuá,+Pea naʻa nau fakafisi ke ʻaʻeva ʻi heʻene laó.+
11 Naʻe ngalo foki ʻiate kinautolu ʻa e meʻa naʻá ne faí,+ʻA e ngaahi ngāue fakaofo naʻá ne fakahāhā kiate kinautolú.+
12 Naʻá ne fai ʻa e ngaahi meʻa fakaofo ʻo mamata ki ai ʻa ʻenau fanga kuí,+ʻI he fonua ko ʻIsipité, ʻa e vahefonua ko Soaní.+
13 Naʻá ne fakamavaeua ʻa e tahí ke nau fou atu ai,Pea naʻá ne ʻai ʻa e ngaahi vaí ke tuʻu ʻo hangē ha holisi taʻofiʻanga vaí.*+
14 Naʻá ne taki kinautolu ʻaki ha ʻao ʻi he ʻahóPea ʻaki ʻa e maama ʻo ha afi ʻi he poó kotoa.+
15 Naʻá ne foa ʻa e ngaahi maka ʻi he toafá,Naʻá ne tuku ke nau inu ʻo fiu ʻo hangē ko haʻanau inu mei ha ngaahi vai lolotó.+
16 Naʻá ne ʻai ʻa e vaí ke tafe mai mei he makatuʻúPea ʻai ʻa e ngaahi vaí ke tafe hifo ʻo hangē ha ngaahi vaitafé.+
17 Ka naʻe hokohoko atu ʻenau faiangahala kiate iáʻAki ʻenau angatuʻu ki he Fungani Māʻolungá ʻi he toafá;+
18 Naʻa nau poleʻi* ʻa e ʻOtuá ʻi honau lotó+ʻAki hono kounaʻi ʻa e meʻakai naʻa nau hoholi ki aí.
19 Ko ia naʻa nau lea fakafepaki ki he ʻOtuá,ʻO pehē: “ʻE lava koā ke fokotuʻu ʻe he ʻOtuá ha tēpile ʻi he toafá?”+
20 Vakai! Naʻá ne taaʻi ha makaKo ia naʻe tafe mai ai ʻa e vaí pea naʻe tāfea ʻa e ngaahi vaitafé.+
“ʻE lava koā ke ne toe ʻomai ha mā maʻatautolu,Pe ʻe lava koā ke ne ʻomi ha kakanoʻi-manu maʻa hono kakaí?”+
21 ʻI he fanongo ʻa Sihova kiate kinautolú, naʻá ne hoko ai ʻo houhau lahi;+Naʻe ʻalu hifo ha afi+ kia Sēkope,Pea naʻe kakaha ʻa ʻene houhaú ki ʻIsileli+
22 Koeʻuhí naʻe ʻikai te nau tui ki he ʻOtuá;+Naʻe ʻikai te nau falala ki heʻene malava ke fakahaofi kinautolú.
23 Ko ia naʻá ne faituʻutuʻuni ki he ngaahi langi ʻaoʻaofia ʻi ʻolungá,Pea naʻá ne fakaava ʻa e ngaahi matapā ʻo e langí.
24 Naʻá ne hanganaki fakaʻuha hifo ʻa e mana maʻanautolu ke nau kai;Naʻá ne ʻoange kiate kinautolu ʻa e uite ʻo e langí.+
25 Naʻe kai ʻe he kau tangatá ʻa e mā ʻa e faʻahinga mālohí;*+Naʻá ne tokonaki mai ʻa e meʻa feʻunga ke nau mākona ai.+
26 Naʻá ne ueʻi ʻa e matangi hahaké ʻi he langíPeá ne ʻai ke angi ʻa e matangi tongá ʻaki hono māfimafí.+
27 Pea naʻá ne fakaʻuha hifo kiate kinautolu ʻa e kakanoʻi-manu ʻo hangē ko e efú,ʻA e fanga manupuná ʻo hangē ko e ʻoneʻone ʻo e matātahí.
28 Naʻá ne ʻai ke nau tō hifo ʻi he lotolotonga ʻo hono ʻapitangá,ʻO takatakai ʻi hono ngaahi tēnití.
29 Pea naʻa nau kai ʻo fatufāʻia;Naʻá ne ʻoange kiate kinautolu ʻa e meʻa naʻa nau holi ki aí.+
30 Ka ki muʻa ke nau fakatōliʻa kakato ʻa ʻenau holí,Lolotonga naʻe kei ʻi honau ngutú ʻa e meʻakaí,
31 Naʻe kakaha ʻa e houhau ʻa e ʻOtuá kiate kinautolu.+
Naʻá ne tāmateʻi ʻa ʻenau kau tangata mālohi tahá;+Naʻá ne tuku hifo ʻa e kau talavou ʻo ʻIsilelí.
32 Neongo ʻa e meʻá ni naʻa nau faiangahala ʻo toe lahi ange+Pea naʻe ʻikai te nau tui ki heʻene ngaahi ngāue fakaofó.+
33 Ko ia naʻá ne fakangata ʻa honau ngaahi ʻahó ʻo hangē ko ha foʻi mānava peé,+Mo honau ngaahi taʻú ʻaki ʻa e ngaahi meʻa fakalilifu fakafokifā.
34 Ka ʻi heʻene tāmateʻi ha niʻihi ʻo kinautolú, naʻa nau kumi leva kiate ia;+Naʻa nau toe foki ʻo kumi ki he ʻOtuá,
35 ʻI heʻenau manatu ko e ʻOtuá ʻa honau Makatuʻú+Pea ko e ʻOtua Fungani Māʻolungá ʻa honau Huhuʻí.*+
36 Ka naʻa nau feinga ke kākaaʻi ia ʻaki honau ngutúPea loi kiate ia ʻaki honau ʻeleló.
37 Naʻe ʻikai ke tuʻu maʻu ʻa honau lotó ʻiate ia;+Pea naʻe ʻikai te nau faitōnunga ki heʻene fuakavá.+
38 Ka naʻá ne mohu meesi;+Naʻá ne fakamolemoleʻi* ʻa ʻenau faihalá pea ʻikai fakaʻauha kinautolu.+
Naʻá ne faʻa taʻotaʻofi ʻa ʻene houhaú+ʻO ʻikai ke ne langaʻi hake ʻa e kotoa ʻo ʻene houhaú.
39 He naʻá ne manatuʻi ko e kakano pē kinautolu,+Ko ha matangi ʻoku fakalaka hake pea ʻikai ke toe foki mai.*
40 He tuʻo lahi ē ko ʻenau angatuʻu kiate ia ʻi he potu lalá+Pea ʻai ia ke ne ongoʻi mamahi ʻi he toafá!+
41 Naʻa nau toutou ʻahiʻahiʻi ʻa e ʻOtuá,+Pea naʻa nau fakalotomamahiʻi ʻa e Tokotaha Māʻoniʻoni ʻo ʻIsilelí.
42 Naʻe ʻikai te nau manatu ki hono iví,*ʻA e ʻaho naʻá ne fakahaofi* ai kinautolu mei he filí,+
43 ʻA e anga ʻo ʻene fakahāhā ʻa ʻene ngaahi fakaʻilongá ʻi ʻIsipité+Mo ʻene ngaahi mana ʻi he vahefonua ko Soaní,
44 Mo e anga ʻo ʻene liliu ko e toto ʻa e ngaahi mangaʻivai ʻo e Vaitafe Nailá+Ko ia naʻe ʻikai lava ai ke nau inu mei honau ngaahi vaitafé.
45 Naʻá ne tuku atu ha ngaahi fuʻu pupunga lango ke nau fakamamahiʻi kinautolu+Mo e fanga poto ke fakaʻauha honau fonuá.+
46 Naʻá ne tuku atu ʻa ʻenau ngaahi ngoué ki he fanga heʻe maumau,ʻA e fua ʻo ʻenau ngāue mālohí ki he ngaahi pupunga heʻe.+
47 Naʻá ne fakaʻauha ʻa ʻenau ʻulu kālepí ʻaki ʻa e ʻuha-ʻaisi+Mo ʻenau ʻulu sukaminó ʻaki ʻa e ngaahi ʻuha-ʻaisi.
48 Naʻá ne tuku atu ʻenau fanga monumanu ngāué ki he ʻuha-ʻaisí+Mo ʻenau fanga manú ki he tapa ʻa e ʻuhilá.*
49 Naʻá ne taaʻi kinautolu ʻaki ʻene houhau kakahá,ʻA e houhau lahí mo e tuputāmakí mo e faingataʻaʻiá,Naʻá ne fekauʻi mai ʻa e kau ʻāngelo ke nau ʻomi ʻa e mala.
50 Naʻá ne fakaʻataʻatā ha hala ki heʻene houhaú.
Naʻe ʻikai te ne fakahaofi kinautolu mei he maté;Pea naʻá ne tuku atu kinautolu* ki he mahaki fakaʻauhá.
51 Fakaʻosí naʻá ne taaʻi ʻa e ʻuluaki foha kotoa pē ʻi ʻIsipité,+ʻA e kamataʻanga ʻo honau ivi fakafanaú ʻi he ngaahi tēniti ʻo Hamí.
52 Pea naʻá ne ʻomi leva ʻa hono kakaí hangē ha tākangá+Pea tataki kinautolu hangē ha fuʻu tākanga ʻi he toafá.
53 Naʻá ne tataki kinautolu ʻi he malu,Pea naʻe ʻikai te nau ongoʻi manavahē;+Naʻe lōmekina ʻe he tahí ʻa honau ngaahi filí.+
54 Pea naʻá ne ʻave kinautolu ki hono feituʻu toputapú,+ʻA e feituʻu moʻungaʻia ko eni naʻe maʻu ʻe hono nima toʻomataʻú.+
55 Naʻá ne kapusi ʻa e ngaahi puleʻangá mei honau ʻaó;+Naʻá ne vaheʻi kiate kinautolu ha tofiʻa ʻaki ʻa e afo fua;+Naʻá ne fakanofonofo ʻa e ngaahi matakali ʻo ʻIsilelí ʻi honau ngaahi ʻapí.+
56 Ka naʻa nau hanganaki poleʻi* ʻa e ʻOtua Fungani Māʻolungá, pea angatuʻu kiate ia;+Naʻe ʻikai te nau tokanga ki heʻene ngaahi fakamanatú.+
57 Naʻa nau toe tafoki pea naʻa nau kākā ʻo hangē ko ʻenau fanga kuí.+
Naʻa nau taʻefalalaʻanga ʻo hangē ko ha kaufana naʻe ngalokú.+
58 Naʻa nau hanganaki fakahouhauʻi ia ʻaki ʻenau ngaahi potu māʻolungá,+Pea naʻa nau langaʻi ia ke ne houhau* ʻaki ʻenau ngaahi ʻīmisi kuo tongí.+
59 Naʻe fanongo mai ʻa e ʻOtuá peá ne hoko ʻo houhau lahi,+Ko ia naʻá ne mātuʻaki siʻaki ʻa ʻIsileli.
60 Naʻe faifai pē peá ne liʻaki ʻa e tāpanekale ʻo Sailó,+ʻA e tēniti ʻa ia naʻá ne ʻafio ai ʻi he lotolotonga ʻo e tangatá.+
61 Naʻá ne tuku ʻa e fakaʻilonga ʻo hono mālohí ke taki pōpula;ʻA hono ngeiá ki he nima ʻo e filí.+
62 Naʻá ne tuku ʻa hono kakaí ki he heletaá+Peá ne hoko ʻo houhau lahi ki hono tofiʻá.
63 Naʻe keina ʻe he afí ʻa ʻene kau talavoú,Pea naʻe ʻikai ke hivaʻi ki heʻene kau finemuí* ʻa e ngaahi hiva malí.
64 Ko ʻene kau taulaʻeikí naʻa nau tō ʻi he heletaá,+Pea ko honau kau uitoú naʻe ʻikai te nau tangi.+
65 Naʻe ofo hake leva ʻa Sihova ʻo hangē naʻá ne mohé,+Hangē ha tangata toʻa+ naʻá ne ʻā hake hili ʻene inu uainé.
66 Pea naʻá ne kapusi ʻa hono ngaahi filí mei honau tuʻá;+Naʻá ne ʻai kinautolu ke nau ngalivale tuʻuloa.
67 Naʻá ne siʻaki ʻa e tēniti ʻo Siosifá;Naʻe ʻikai te ne fili ʻa e matakali ʻo ʻIfalemí.
68 Ka naʻá ne fili ʻa e matakali ʻo Siutá,+ʻA Moʻunga Saione, ʻa ia ʻokú ne ʻofa aí.+
69 Naʻá ne ʻai ʻa hono feituʻu toputapú ke tolonga ʻo hangē ko e langí,*+ʻO hangē ko e māmaní ʻa ia kuó ne fokotuʻu ʻo taʻengatá.+
70 Naʻá ne fili ʻa Tēvita+ ko ʻene sevānitiPea toʻo ia mei he ngaahi ʻā sipí,+
71 Mei hono tokangaʻi ʻo e fanga sipi fefiné;Naʻá ne ʻai ia ko e tauhi-sipi kia Sēkope, ko hono kakaí,+Pea ki ʻIsileli, ko hono tofiʻá.+
72 Naʻá ne tauhi kinautolu ʻaki ʻa e anga-tonu ʻi hono lotó,+Pea naʻá ne tataki kinautolu ʻaki ʻa e nima pōtoʻi.+
Fakamatala ‘i Lalo
^ Sio ki he Lea mo Hono ʻUhinga.
^ Pe “fakahinohinó.”
^ Fakafoʻilea, “taʻemateuteu.”
^ Pe “ʻaá.”
^ Fakafoʻilea, “ʻahiʻahiʻi.”
^ Pe “kau ʻāngeló.”
^ Pe “Tokotaha Faisāuní.”
^ Fakafoʻilea, “ʻufiʻufi.”
^ Pe ngalingali, “Ko e laumālié ʻoku ʻalu atu pea ʻikai ke toe foki mai.”
^ Fakafoʻilea, “nimá.”
^ Fakafoʻilea, “huhuʻi.”
^ Pe ngalingali, “mofi lahi.”
^ Fakafoʻilea, “ʻenau moʻuí.”
^ Fakafoʻilea, “ʻahiʻahiʻi.”
^ Pe “fuaʻa.”
^ Fakafoʻilea, “Pea ko ʻene kau finemuí naʻe ʻikai ke fakahīkihikiʻi ʻaki.”
^ Fakafoʻilea, “Naʻá ne langa hono feituʻu toputapú ʻo hangē ko e taukakapá.”
