Siona 4:1-11
4 Ka naʻe fuʻu loto-mamahi ʻa Siona ʻi he meʻá ni, pea naʻá ne ʻita lahi ʻaupito.
2 Ko ia naʻá ne lotu kia Sihova: “Ko eni, ʻe Sihova, ʻikai ko e meʻa eni naʻá ku hohaʻa ki ai ʻi he taimi naʻá ku ʻi hoku fonuá aí? Ko e ʻuhinga ia naʻá ku feinga ai ke u hola ki Tāsisi+ ʻi he ʻuluaki taimí; he naʻá ku ʻilo ko e ʻOtua manavaʻofa* mo mohu meesi koe, tuai ki he houhau pea fonu ʻi he ʻofa mateaki,+ pea ʻokú ke mateuteu ke liliu hoʻo fakakaukaú pea ʻikai fai ha tautea.
3 Ko eni, ʻe Sihova, toʻo ange ā muʻa ʻeku moʻuí, he ʻoku lelei ange kiate au ke u mate ʻi haʻaku moʻui.”+
4 Naʻe ʻeke ange ʻe Sihova: “ʻOku totonu koā ke ke ʻita lahi pehē?”
5 Naʻe ʻalu leva ʻa Siona ki tuʻa mei he koló ʻo ne tangutu hifo ʻi he tafaʻaki fakahahake ʻo e koló. Naʻá ne ngaohi ha fakamalumalu ʻi ai moʻona pea tangutu hifo ʻi hono malumalú ke sio pe ko e hā ʻa e meʻa ʻe hoko ki he koló.+
6 Naʻe tokonaki mai leva ʻe Sihova ko e ʻOtuá ha fuʻu ʻakau totolo* ke tupu ʻo māʻolunga hake ʻia Siona, ke fakamalumalu ʻaki ʻa hono ʻulú pea ke fakafiemālieʻi ʻa ʻene ongoʻi mamahí. Pea naʻe fiemālie ʻaupito ʻa Siona ʻi he fuʻu ʻakau totoló.
7 Ka naʻe ʻomi ʻe he ʻOtua moʻoní ha ʻunufe ʻi he mafoa hake ʻa e atá ʻi he ʻaho hono hokó ʻo ne kai ʻa e fuʻu ʻakau totoló, pea naʻe mae.
8 ʻI he kamata ke ulo mai ʻa e laʻaá, naʻe toe ʻomi ʻe he ʻOtuá ha matangi ʻaʻafu vevela mei he hahaké, pea naʻe taaʻi ʻe he laʻaá ʻa e ʻulu ʻo Sioná, ʻo ne meimei pongia. Naʻá ne hanganaki kole ke ne mate ā, ʻo ne hanganaki pehē, “ʻOku lelei ange kiate au ke u mate ʻi haʻaku moʻui.”+
9 Naʻe ʻeke ange ʻe he ʻOtuá kia Siona: “ʻOku totonu koā ke ke ʻita lahi pehē koeʻuhi ko e fuʻu ʻakau totoló?”+
ʻI he meʻá ni naʻá ne pehē: “ʻOku ʻi ai ʻeku totonu ke u ʻita, ke u ʻita lahi ʻo u loto ke u mate.”
10 Ka naʻe folofola ange ʻa Sihova: “Naʻá ke ongoʻi fakaʻofaʻia ʻi he fuʻu ʻakau totoló, ʻa ia naʻe ʻikai haʻo ngāue ʻe fai ki ai, pea naʻe ʻikai te ke ʻai ia ke tupu; naʻe tupu hake ia ʻi ha pō ʻe taha pea mate ʻi ha pō ʻe taha.
11 ʻIkai ʻoku totonu foki ke u ongoʻi fakaʻofaʻia ʻi he fuʻu kolo ko Ninivé,+ ʻa ia ʻoku ʻi ai ʻa e kau tangata ʻoku tokolahi ange ʻi he toko 120,000 ʻoku ʻikai te nau ʻilo ʻa e tonú mo e halá,* pea mo ʻenau fanga manú+ foki ʻa ia ʻoku tokolahí?”
Fakamatala ‘i Lalo
^ Pe “anga-ʻofa.”
^ Hangehangē ko ha fuʻu ʻakau failau ʻoku fua. Pe ngalingali, “fuʻu lepo.”
^ Pe “ʻilo honau nima toʻomataʻú mo honau nima toʻohemá.”
