Siope 19:1-29
19 Naʻe tali ʻe Siope ʻo pehē:
2 “Ko e hā hono fuoloa hoʻomou hanganaki fakaʻitaʻi aú,+ʻO laiki au ʻaki hoʻomou ngaahi leá?+
3 Kuo tuʻo hongofulu eni hoʻomou valokiʻi* aú;ʻO ʻikai te mou mā ʻi hoʻomou anga-fakamamahi kiate aú.+
4 Pea kapau moʻoni kuó u fai ha fehālaaki,Ko ʻeku faihalá ʻe nofo pē mo au.
5 Kapau te mou tuʻukāivi ʻi hono ʻai kimoutolu ke mou māʻolunga ange ʻiate aú,ʻO taukaveʻi ʻoku totonu ʻa e ngaahi tukuakiʻi ʻoku fai kiate aú,
6 Mou ʻiloʻi leva ko e ʻOtuá ia kuó ne takihalaʻi aú,Pea kuó ne maʻu au ʻi heʻene kupenga tulimanú.
7 Vakai! ʻOku ou toutou kaila, ‘Ko e fakamālohi!’ Ka ʻoku ʻikai ha tali;+ʻOku ou toutou kaila ki ha tokoni, ka ʻoku ʻikai ha fakamaau totonu.+
8 Kuó ne tāpuni hoku halá ʻaki ha ʻā maka, pea ʻoku ʻikai lava ke u fakalaka atu;Kuó ne ʻufiʻufi hoku ngaahi ʻalungá ʻaki ʻa e fakapoʻuli.+
9 Kuó ne toʻo meiate au ʻa hoku lāngilangíPea ʻave ʻa e kalauní mei hoku ʻulú.
10 ʻOkú ne maumauʻi au mei he tafaʻaki kotoa kae ʻoua ke u ʻauha;ʻOkú ne taʻaki mo e aka ʻa ʻeku ʻamanakí hangē ha fuʻu ʻakaú.
11 ʻOku kakaha ʻene ʻitá kiate au,Pea ʻokú ne vakai kiate au ko hono fili.+
12 Ko ʻene kau taú ʻoku nau tuʻu fakataha ʻo ʻākoloʻi au,Pea ʻoku nau ʻapitanga takatakai ki hoku tēnití.
13 Kuó ne tuli hoku fanga tokouá tonu ke mamaʻo meiate au,Pea ko e faʻahinga ʻoku nau ʻiloʻi aú kuo nau mahuʻi meiate au.+
14 ʻOku mole atu ʻa hoku ngaahi kaungāmeʻa ofí,*Pea ko e faʻahinga naʻá ku ʻilo leleí kuo ʻikai te nau toe manatuʻi au.+
15 ʻOku lau au ko e sola ʻe he kau fakaafe ʻi hoku falé+ mo ʻeku kau kaunangá;Ko e muli au ʻi heʻenau vakaí.
16 ʻOku ou ui ki heʻeku sevānití, ka ʻoku ʻikai te ne tali mai;Ko hoku ngutú ʻoku kōlenga kiate ia ki ha manavaʻofa.
17 Ko ʻeku mānavá tonu kuo fakaliliʻa ai hoku uaifí,+Pea ʻoku ou hoko ko ha meʻa namukū ki hoku fanga tokouá tonu.*
18 Naʻa mo e fānau īkí ʻoku nau taʻetokaʻi au;ʻI heʻeku tuʻu haké, ʻoku nau kamata fakakataʻaki au.
19 Ko e kotoa ʻo hoku ngaahi kaungāmeʻa ofí ʻoku nau fakaliliʻa ʻiate au,+Pea ko e faʻahinga naʻá ku ʻofaʻí kuo nau fakafepaki kiate au.+
20 ʻOku pipiki ʻa hoku huí ki hoku kilí mo hoku kakanó,+Pea ko e mālō pē ʻeku hao mei he maté.
21 Fakahaaʻi mai ha meesi kiate au, siʻoku ngaahi kaungāmeʻa, fakahaaʻi muʻa ha meesi kiate au,He ko e nima tonu ʻo e ʻOtuá kuó ne ala kiate au.+
22 Ko e hā ʻoku mou toutou fakatangaʻi ai au ʻo hangē ko ia ʻoku fai ʻe he ʻOtuá,+ʻO ʻohofi taʻetuku aú?*+
23 Kapau pē ā naʻe tohi ʻeku ngaahi leá,Kapau pē ā naʻe lava ke hiki ʻi ha tohi!
24 Taumaiā ke tongi ia ʻi ha maka ʻo taʻengata,ʻAki ha tutuʻu ukamea pea fakafonu ʻaki ʻa e pulu!
25 He ʻoku ou ʻilo pau ko hoku tokotaha huhuʻí*+ ʻoku moʻui;Te ne toki haʻu ʻamui ʻo ne tuʻu ʻi he māmaní.*
26 Hili ia hono fakaʻauha peheni hoku kilí,Lolotonga ʻeku kei kakanó, te u mamata ki he ʻOtuá,
27 ʻA e tokotaha te u mātā tonú,ʻA e tokotaha ʻe sio tonu ki ai ʻa hoku matá, ʻo ʻikai ko ha taha kehe.+
Ka ʻi loto ʻiate aú ʻoku ou ongoʻi lōmekina!*
28 He ʻoku mou pehē, ‘ʻOku anga-fēfē ʻemau fakatangaʻi iá?’+
He ko au ʻa e tefito ʻo e palopalemá.
29 Mou manavahē telia ʻa e heletaá,+He ko e heletaá ʻokú ne ʻomi tautea ki he faihalá;ʻOku totonu ke mou ʻilo ʻoku ʻi ai ha fakamaau.”+
Fakamatala ‘i Lalo
^ Pe “leakoviʻi.”
^ Pe “ngaahi kāingá.”
^ Fakafoʻilea, “ki he ngaahi foha ʻo hoku manavá,” ʻa ia, ko e manava naʻá ne fanauʻi aú (manava ʻo ʻeku faʻeé).
^ Fakafoʻilea, “Pea ʻikai fiemālie ʻi hoku kakanó?”
^ Pe “tokotaha totongi huhuʻí.”
^ Fakafoʻilea, “ʻi he efú.”
^ Pe “Kuo ʻikai toe ngāue ʻa hoku kofuuá.”
