Siope 20:1-29
20 Naʻe tali ʻe Sofaʻā+ mei Naʻamá ʻo pehē:
2 “Ko e ʻuhinga eni ʻoku ueʻi ai au ʻe heʻeku ngaahi fakakaukau puputuʻú ke u fai ha talíKoeʻuhí ko ʻeku ongoʻi hohaʻá.
3 Kuó u fanongo ki ha valoki ʻokú ne fakamamahiʻi au;Pea ʻoku ueʻi au ʻe heʻeku mahinó ke u fai ha tali.
4 Kuo pau naʻá ke ʻiloʻi maʻu pē eni,He kuo peheni talu mei hono tuku ʻa e tangatá* ʻi he māmaní,+
5 Ko e kalanga fiefia ʻa e kau fulikivanú ʻoku nounou pēPea ko e fiefia ʻa e tokotaha anga-taʻefakaʻotuá* ʻoku lau mōmeniti pē.+
6 Neongo ʻoku ʻalu hake ʻa hono lahí ki langiPea aʻu hono ʻulú ki he ngaahi ʻaó,
7 Te ne ʻauha ʻo taʻengata ʻo hangē ko hono kinohaʻa pē ʻoʻoná;Ko e faʻahinga naʻa nau faʻa sio kiate iá te nau pehē, ‘Ko fē ia?’
8 Te ne puna atu hangē ha misí, pea heʻikai te nau maʻu ia;Te ne mole atu ʻo hangē ha vīsone poʻulí.
9 Ko e mata naʻe sio kiate iá ʻe ʻikai ke toe mamata kiate ia,Pea ko hono feituʻú ʻe ʻikai te nau toe sio kiate ia.+
10 Ko ʻene fānaú tonu te nau feinga ke leleiʻia mai ʻa e masivá,Pea ʻe fakafoki ʻe hono nimá tonu ʻa ʻene koloá.+
11 Ko hono huí naʻe fonu ʻi he mālohi fakatalavoú,Ka te ne tokoto fakataha mo ia* ʻi he efú.
12 Kapau ko e koví ʻe ifo melie ʻi hono ngutú,Kapau te ne fufū ia ʻi hono lalo ʻeleló,
13 Kapau ʻokú ne ifoʻia ai ʻo ʻikai te ne tuku ange iaKa ne tuku maʻu pē ia ʻi hono ngutú,
14 Ko ʻene meʻakaí ʻe hoko ia ʻo tamala ʻi loto ʻiate ia;ʻE hoko ia ʻo hangē ko e kona* ʻo ha ngata ʻi loto ʻiate ia.
15 Kuó ne folofua ʻa koloa, ka te ne puʻaki mai ia;ʻE fakamaha ia ki tuʻa ʻe he ʻOtuá mei hono keté.
16 Te ne mimisi ʻa e huhuʻa kona ʻo ha ngata;ʻE tāmateʻi ia ʻe he ʻelelo ʻo ha ngata huhu kona.
17 ʻE ʻikai ʻaupito te ne toe sio ki ha vai ʻoku tafe,Ki he tafe mālohi ʻa e honé mo e patá.
18 Te ne fakafoki ʻene koloá ʻo ʻikai te ne fakaʻaongaʻi ia;*Heʻikai te ne fiefia ʻi he koloa mei heʻene fefakatauʻakí.+
19 He kuó ne laiki pea liʻaki ʻa e masivá;Kuó ne puke ʻa e fale naʻe ʻikai te ne langá.
20 Ka heʻikai te ne ongoʻi ha nonga ʻi loto ʻiate ia;Ko ʻene koloá ʻe ʻikai te ne tokoniʻi ia ke ne hao.
21 ʻOku ʻikai ha meʻa ʻe toe kiate ia ke ne hamu;Ko e ʻuhinga ia heʻikai ke tolonga ai ʻa ʻene tuʻumālié.
22 ʻI he aʻu ʻene tuʻumālié ki hono tumutumú, ʻe maʻu ia ʻe he loto-moʻuá;Ko e mālohi kakato ʻo malá te ne ʻohofi ia.
23 ʻI heʻene fakafonu hono keté,ʻE tuku atu ʻe he ʻOtuá ʻene houhau kakahá kiate ia,ʻO fakaʻuha hifo ia ki hono keté.
24 ʻI heʻene hola mei he ngaahi meʻatau ukameá,ʻE hokaʻi ia ʻe ha ngaahi ngahau ʻo ha kaufana kopa.
25 ʻOkú ne taʻaki ha ngahau mei hono tuʻá,Ha ngahau fetapaki mei hono ʻahú,Pea ʻoku maʻunimā ia ʻe he manavaheé.+
26 ʻOku tatali ha fakapoʻulilōlō ki heʻene ngaahi koloá;ʻE keina ia ʻe ha afi ʻoku ʻikai tapili ʻe ha taha;ʻOku tatali mai ʻa e fakamamahí ki ha taha pē ʻoku toe ʻi hono tēnití.
27 ʻE fakahaaʻi ʻe he langí ʻa ʻene faihalá;ʻE tuʻu hake ʻa e māmaní ʻo fakafepaki kiate ia.
28 ʻE tafiʻi atu ʻe ha tāfea ʻa hono falé;ʻE hoko ia ko ha tāfea lahi ʻi he ʻaho ʻo e houhau ʻa e ʻOtuá.
29 Ko e ʻinasi eni ʻo e tangata fulikivanú mei he ʻOtuá,Ko e tofiʻa kuo tuʻutuʻuni ʻe he ʻOtuá kiate ia.”
Fakamatala ‘i Lalo
^ Pe “faʻahinga ʻo e tangatá; ʻĀtama.”
^ Pe “tokotaha tafoki ʻo fakafepaki ki he moʻoní.”
^ ʻA ia, ko hono mālohí.
^ Pe “ʻahu.”
^ Fakafoʻilea, “pea ʻe ʻikai te ne folo ia.”
