Siope 22:1-30
22 Naʻe tali ʻe ʻElifasi+ mei Tīmaní ʻo pehē:
2 “ʻE lava ke ʻaonga ha tangata ki he ʻOtuá?
ʻE ʻaonga kiate ia ha taha ʻokú ne maʻu ha vavanga fakaefakakaukau?+
3 ʻOku tokanga koā ʻa e Māfimafi-Aoniú ki* hoʻo māʻoniʻoní,Pe ʻoku maʻu haʻane meʻa ʻi hoʻo muimui ki he ʻalunga ʻo e anga-tonú?+
4 Te ne tautea koePea fakamāuʻi koe koeʻuhí ko hoʻo ʻapasia ki he ʻOtuá?
5 ʻIkai koeʻuhí ʻoku fuʻu lahi ʻa hoʻo anga-fulikivanúPea heʻikai toe ngata ʻa hoʻo faihalá?+
6 He ʻokú ke faʻao tuʻungaʻa pē ha meʻa maluʻi mei ho fanga tokouá,Pea ʻokú ke toʻo ʻa e ngaahi kofu ʻo e kakaí, ʻo tuku telefua kinautolu.*+
7 ʻOku ʻikai te ke ʻoange ha vai ke inu ʻe he tokotaha ʻoku ongosiá,Pea ʻokú ke mamaeʻi ʻa e meʻakaí mei he kau fiekaiá.+
8 ʻOku maʻu ʻa e fonuá ʻe he tangata ivi lahí,+Pea ʻoku nofo ai ʻa e tokotaha ʻoku fakahaaʻi ki ai ʻa e leleiʻiá.
9 Ka ʻokú ke tuku ange atu ʻa e uitoú ʻo ʻikai ʻoange ha meʻa,Pea ʻokú ke laiki ʻa e nima ʻo e fānau tamai-maté.*
10 Ko e ʻuhinga ia ʻoku takatakaiʻi ai koe ʻe he ngaahi tauhelé,*+Pea fakailifiaʻi koe ʻe he ngaahi meʻa fakamanavahē ʻoku hoko fakatuʻupakeé;
11 Ko e ʻuhinga ia ʻoku fakapoʻulituʻu ai ʻo ʻikai lava ke ke sió,Pea ʻufiʻufi koe ʻe ha lōmaki vaí.
12 ʻIkai ko e ʻOtuá ʻokú ne ʻi he ngaahi feituʻu māʻolunga ʻo e langí?
Pea vakai ange ki he māʻolunga fau ʻa e ngaahi fetuʻú kotoa.
13 Ka kuó ke pehē: ‘Ko e hā koā ʻoku ʻiloʻi ʻe he ʻOtuá?
ʻE lava ke ne faifakamaau ʻi he fakapoʻuli matolú?
14 ʻOku puipuiʻi ia ʻe he ngaahi ʻaó ʻo ʻikai lava ke ne sioʻI heʻene hāʻele holo ʻi he ngaahi ngataʻanga* ʻo e langí.’
15 Te ke muimui ʻi he ʻalunga motuʻáʻA ē naʻe ʻaʻeva ai ʻa e kau tangata fulikivanú,
16 ʻA e kau tangata kuo hamusi* ki muʻa ke hoko honau taimí,ʻA ia ko honau fakavaʻé naʻe tafiʻi atu ʻe ha tāfeá?*+
17 Naʻa nau pehē ki he ʻOtua moʻoní: ‘Tukunoaʻi ange kimautolu!’
Pea ‘Ko e hā ʻe lava ke fai ʻe he Māfimafi-Aoniú kiate kimautolú?’
18 Lolotonga ia, ko ia ʻa e Tokotaha naʻá ne fakafonu honau falé ʻaki ʻa e ngaahi meʻa leleí.
(ʻOku ʻikai ha fakakaukau kovi pehē ʻiate au.)
19 ʻE vakai ʻa e māʻoniʻoní ki he meʻá ni ʻo nau fiefia,Pea ko e tonuhiá te ne manuki kiate kinautolu ʻo pehē:
20 ‘Kuo fakaʻauha ʻa e kau fakafili maí,Pea ko ʻenau meʻa ʻoku toé ʻe keina ia ʻe ha afi.’
21 Feinga ke ʻilo kiate Ia, pea te ke maʻu ha nonga;ʻE hoko mai leva kiate koe ʻa e ngaahi meʻa leleí.
22 Tali ʻa e laó mei hono fofongá,Pea tauhi ʻa ʻene ngaahi leá ʻi ho lotó.+
23 Kapau te ke foki ki he Māfimafi-Aoniú, ʻe toe fakafoki mai hoʻo ngaahi meʻá;+Kapau te ke tuku ange ʻa e taʻemāʻoniʻoní mei ho tēnití,
24 Kapau te ke laku hoʻo koulá* ki he efúPea mo e koula ʻo ʻŌfelí+ ki he ngaahi teleʻa* makaʻiá,
25 ʻE hoko leva ʻa e Māfimafi-Aoniú ko hoʻo koulá* ia,Pea ko ia ʻa hoʻo siliva lelei tahá.
26 He ʻe toki hoko ai ʻa e Māfimafi-Aoniú ko ho fiefiaʻangá ia,Pea ʻe hanga hake ho matá ki he ʻOtuá.
27 Te ke tautapa kiate ia, pea te ne fanongo atu;Pea te ke fakaai hoʻo ngaahi fuakavá.
28 ʻIlonga ha meʻa te ke fili ke fai ʻe lavameʻa ia,Pea ʻe ulo atu ha maama ki ho halá.
29 He ʻe tuku hifo koe ʻi hoʻo lea hīkisiá,Ka te ne fakahaofi ʻa e anga-fakatōkilaló.
30 Te ne fakahaofi ʻa e faʻahinga ʻoku tonuhiá;Ko ia kapau ʻoku maʻa ho nimá, ko e moʻoni ʻe fakahaofi koe.”
Fakamatala ‘i Lalo
^ Pe “ʻOku fiefia ʻa e Māfimafi-Aoniú ʻi.”
^ Fakafoʻilea, “toʻo ʻa e ngaahi kofu ʻo e faʻahinga ʻoku telefuá.”
^ Pe “kau paeá.”
^ Fakafoʻilea, “ngaahi tauhele manupuná.”
^ Pe “ʻi he seakale.”
^ Pe “kuo tuʻusi ke nounou ʻenau moʻuí.”
^ Fakafoʻilea, “vaitafe.”
^ Pe “ngaahi konga koulá.”
^ Sio ki he Lea mo Hono ʻUhinga.
^ Pe “ngaahi konga koulá.”
