Siope 32:1-22
32 Ko ia naʻe tuku ʻe he kau tangata ʻe toko tolú ni ʻenau feinga ke fai ha tali kia Siopé, koeʻuhí he naʻá ne tuipau ʻiate ia ʻokú ne māʻoniʻoni pē.*+
2 Ka naʻe ʻita lahi ʻaupito ʻa ʻIlaiū ko e foha ʻo Palakela ko e hako ʻo Pusa+ mei he fāmili ʻo Lamé. Naʻe kakaha ʻa ʻene ʻitá kia Siope ʻi heʻene feinga ke fakamoʻoniʻi ʻokú ne tonu ange ʻi he ʻOtuá.+
3 Naʻá ne toe ʻita lahi ʻaupito ki he ngaahi kaungāmeʻa ʻe toko tolu ʻo Siopé koeʻuhi ko e ʻikai te nau maʻu ha tali ka nau fakahaaʻi ʻoku fulikivanu ʻa e ʻOtuá.+
4 Naʻe tatali ʻa ʻIlaiū ke ne fai ha tali kia Siope, koeʻuhí naʻa nau taʻumotuʻa ange ʻiate ia.+
5 ʻI he vakai ʻa ʻIlaiū kuo ʻikai ha toe tali ʻa e kau tangata ʻe toko tolú, naʻe toe mapuna hake ʻene ʻitá.
6 Ko ia naʻe kamata ke lea ʻa ʻIlaiū ko e foha ʻo Palakela ko e hako ʻo Pusá ʻo pehē:
“ʻOku ou kei siʻi*Pea ko e kau tangata taʻumotuʻa kimoutolu.+
Ko ia naʻá ku fakaʻapaʻapa pē ʻo tatali,+Pea naʻe ʻikai te u fakatoʻotoʻa ke tala atu ʻa e meʻa ʻoku ou ʻiloʻí.
7 Naʻá ku fakakaukau, ‘Ke lea ʻa e taʻumotuʻá,*Pea tuku ki he laui taʻú ke ne fakahā ʻa e potó.’
8 Ka ko e laumālie ia ʻoku ʻi he kakaí,ʻA e mānava ʻa e Māfimafi-Aoniú, ʻokú ne ʻoange kiate kinautolu ʻa e mahinó.+
9 Ko e taʻumotuʻá ʻataʻatā pē* ʻoku ʻikai te ne ʻai ha taha ke poto,Pea ʻoku ʻikai ko e kau tangata taʻumotuʻá pē ʻoku nau mahinoʻi ʻa e meʻa ʻoku totonú.+
10 Ko ia ʻoku ou pehē, ‘Fanongo mai kiate au,Pea te u tala atu foki ʻa e meʻa ʻoku ou ʻiló.’
11 Vakai! Naʻá ku tatali ki hoʻomou ngaahi leá;Naʻá ku hanganaki fanongo ki hoʻomou fakaʻuhingá+ʻI hoʻomou kumi ki he ngaahi meʻa ke leaʻakí.+
12 Naʻá ku fanongo tokanga kiate kimoutolu,Ka naʻe ʻikai ha taha ʻo kimoutolu te ne fakamoʻoniʻi ʻoku hala ʻa Siope*Pe fai ha tali ki heʻene ngaahi fakaʻuhingá.
13 Ko ia ʻoua te mou pehē, ‘Kuo mau maʻu ʻa e potó;Ko e ʻOtuá ʻokú ne fakamoʻoniʻi ia ʻoku halá, ʻo ʻikai ko e tangatá.’
14 Naʻe ʻikai ke ne fakahanga ʻene ngaahi leá kiate au,Ko ia ʻe ʻikai te u tali kiate ia ʻaki hoʻomou ngaahi fakaʻuhingá.
15 ʻOku nau manavasiʻi, ʻoku ʻikai haʻanau toe tali;Kuo ʻikai ha meʻa ke nau toe leaʻaki.
16 Kuó u tatali, ka ʻoku ʻikai ke toe hoko atu ʻenau leá;ʻOku nau tuʻu pē, ʻo ʻikai ha toe lea.
17 Ko ia te u ʻoatu foki ʻe au ha tali;Te u fakahā foki ʻe au ʻa e meʻa ʻoku ou ʻiló,
18 He ʻoku lahi ʻa e ngaahi meʻa ke u leaʻakí;Ko e laumālie ʻoku ʻiate aú ʻokú ne ueʻi aú.
19 ʻI loto ʻiate aú ʻoku hangē ia ha uaine ʻoku ʻikai hano kiʻi fakamanavá,Hangē ha hina kiliʻimanu ʻaiʻanga uaine foʻou ʻoku meimei pā.+
20 Tuku muʻa ke u lea kae lava ke u maʻu ha fiemālie!
Te u fakaava hoku ngutú pea ʻoatu ha tali.
21 Heʻikai te u filifilimānako ki ha taha pē;+Pe te u fakahekeheke* ki ha faʻahinga taha pē,
22 He ʻoku ʻikai ke u ʻilo ʻa e meʻa ko e fakahekeheke;Kapau naʻá ku ʻilo, ne vave hano tafiʻi atu au ʻe hoku Tokotaha-Ngaohí.
Fakamatala ‘i Lalo
^ Pe “koeʻuhí naʻá ne māʻoniʻoni ʻi heʻene vakai ʻaʻaná.”
^ Fakafoʻilea, “ʻOku siʻi ʻa hoku ngaahi ʻahó.”
^ Fakafoʻilea, “ngaahi ʻahó.”
^ Pe “Ko e lahi ʻo e ngaahi ʻahó ʻataʻatā pē.”
^ Pe “valokiʻi ʻa Siope.”
^ Pe “ʻoange ha hingoa fakalāngilangi.”
