Siope 40:1-24
40 Naʻe hoko atu ʻa Sihova ʻo ne tali kia Siope:
2 “ʻOku totonu koā ke fakakikihi ha tokotaha fakasio hala mo e Māfimafi-Aoniú?+
Tuku ke fai mai ha tali ʻe he tokotaha ʻoku loto ke ne valokiʻi ʻa e ʻOtuá.”+
3 Naʻe pehē ʻe Siope ʻi heʻene tali kia Sihová:
4 “Vakai! ʻOku ou taʻetaau.+
Ko e hā ʻe lava ke u tali atu ʻaki kiate koé?
ʻOku ou ʻai ʻa hoku nimá ki hoku ngutú.+
5 Naʻá ku lea tuʻo taha, ka heʻikai te u toe fai ha tali;ʻO tuʻo ua, ka heʻikai te u toe lea.”
6 Naʻe fai leva ʻe Sihova ha tali kia Siope mei he loto taufá:+
7 “Ke ke tuʻu mateuteu muʻa ke ngali tangata;Te u fehuʻi atu, peá ke fakamatala mai kiate au.+
8 Te ke fehuʻia* koā ʻa ʻeku fakamaau totonú?
Te ke fakahalaiaʻi koā au koeʻuhí ka ke tonu koe?+
9 ʻOkú ke maʻu ha nima ʻoku mālohi tatau mo e nima ʻo e ʻOtua moʻoní,+Pe ʻe lava ke ongo mai ho leʻó ko e mana ʻo hangē ko hoʻoná?+
10 Fakateunga muʻa koe ʻaki ʻa e lāngilangi mo e nāunau;Fakakofu koe ʻaki ʻa e ngeia mo e fakaʻofoʻofa.
11 Tuku ange atu ʻa e kakaha ʻo hoʻo ʻitá;Sio ki he tokotaha kotoa ʻoku hīkisiá, pea tuku hifo ia.
12 Sio ki he tokotaha kotoa ʻoku hīkisiá, pea fakatōkilaloʻi ia,Pea tāmalaki ʻa e kau fulikivanú ʻi he potu ʻoku nau tuʻu aí.
13 Fufū kinautolu kotoa ʻi he efú;Haʻi kinautolu* ʻi he potu fufuú,
14 Pea naʻa mo au te u fakamoʻoni atu kiate koe*Ko ho nima toʻomataʻú ʻe lava ke ne fakahaofi koe.
15 Pea ko eni ʻa Piʻimoti,* ʻa ia naʻá ku ngaohi ʻi heʻeku ngaohi koé.
ʻOku kai musie ia ʻo hangē ha pulú.
16 Sio atu ki he mālohinga ʻoku ʻi hono kongalotóPea mo e mālohi ʻi he ngaahi uoua ʻo hono keté!
17 ʻOkú ne fakafefeka ʻa hono hikú hangē ha sitá;Ko e ngaahi uoua ʻo hono alangá ʻoku fīfī fakataha.
18 Ko hono ngaahi huí ko e paipa kopa;Ko hono ngaahi vaʻé ʻoku hangē ha ngaahi vaʻa ukamea kuo tukí.
19 ʻOkú ne kau ʻi he muʻaki* ngaahi ngāue ʻa e ʻOtuá;Ko hono Tokotaha-Ngaohí pē ʻe lava ke fakaofiofi ki ai mo ʻene heletaá.
20 He ʻoku ʻomi meʻakai ki ai ʻa e ngaahi moʻungá,ʻA e feituʻu ʻoku vaʻinga ai ʻa e kotoa ʻo e fanga manu kaivaó.
21 ʻOku tokoto ia ʻi he lalo ʻakau vaó,ʻI he malu ʻo e kaho ʻo e anó.
22 Ko e ʻuluʻakau vaó ʻoku nau fakamalumalu ia,Pea ʻoku takatakaiʻi ia ʻe he ngaahi ʻuluʻakau* ʻo e teleʻá.*
23 Kapau ʻoku hou ʻa e vaitafé, ʻoku ʻikai te ne ilifia.
ʻOku loto-maʻu ia, neongo ʻa e tafe mālohi atu ʻa Sioatani+ ki hono ngutú.
24 ʻE lava ke puke ia ʻe ha taha lolotonga ʻene sio atú,Pe tui ʻa hono ihú ʻaki ha mātaʻu?*
Fakamatala ‘i Lalo
^ Pe “fakataʻeʻaongaʻi.”
^ Fakafoʻilea, “honau matá.”
^ Pe “fakaongoongoleleiʻi koe.”
^ Ngalingali ko e hipopotamá.
^ Fakafoʻilea, “Ko e kamataʻanga ia ʻo e.”
^ ʻOku ʻiloa ko e uilou ʻo ʻIufaletesi.
^ Sio ki he Lea mo Hono ʻUhinga.
^ Fakafoʻilea, “tauhele.”
