Siope 7:1-21
7 “ʻIkai ko e moʻui ʻa e tangata ko e meʻa noa pē ʻi he māmaní, ʻoku hangē ia ko ha ngāue kuo fakamālohiʻi ke faí,Pea ʻikai ko hono ngaahi ʻahó ʻoku hangē ko e ngaahi ʻaho ʻo ha tokotaha ngāue totongí?+
2 ʻI he hangē ko ha pōpulá, ʻokú ne fakaʻamu ki he malumalú,Pea ʻi he hangē ko ha tokotaha ngāue totongí, ʻokú ne tatali ki heʻene vahé.+
3 Ko ia kuo vaheʻi mai kiate au ʻa e ngaahi māhina ʻo e nofo muna pē,Pea kuo fakalau mai kiate au ʻa e ngaahi pō ʻo e mamahi.+
4 ʻI heʻeku tokoto hifó ʻoku ou ʻeke, ‘Ko ʻafē nai te u tuʻu hake aí?’+
Ka ʻi he faai atu ʻa e poó, ʻoku ou fetafokifokiʻaki ʻi he taʻemanonga ʻo aʻu ki he mafoa ʻa e atá.*
5 Ko hoku kakanó ʻoku ʻufiʻufi ʻe he ʻuangá mo e fetefete fakafoʻikelekele;+Ko hoku kilí ʻoku fonu ʻi he mongumangu mo e pela.+
6 Ko hoku ngaahi ʻahó ʻoku mole vave ange ia ʻi he vilo ʻa e takaiʻanga filo ʻa ha tokotaha lālanga,+Pea ʻoku nau hoko ʻo ngata taʻeʻiai ha ʻamanaki.+
7 Manatuʻi ko ʻeku moʻuí ko e matangi,+Ko hoku matá ʻe ʻikai ʻaupito ke toe sio ki he fiefiá.*
8 Ko e mata ko ia ʻoku sio kiate au he taimi ní ʻe ʻikai ke toe sio kiate au;Ko ho matá te ne fakasio kiate au, ka te u puli atu.+
9 Hangē ko ha ʻao ʻoku mole mo puli atú;Ko e tokotaha ʻoku ʻalu hifo ki he Faʻitoká* ʻoku ʻikai ke toe ʻalu hake.+
10 ʻE ʻikai te ne toe foki ki hono falé,Pea ʻe ʻikai ke toe ʻiloʻi ia ʻe hono feituʻú.+
11 Ko ia ai, ʻe ʻikai te u taʻotaʻofi ʻa hoku ngutú.
Te u lea ʻi he mamahi ʻa hoku laumālié;Te u lāunga ʻi heʻeku mamahi lahí!+
12 Ko e tahí au pe ko ha fuʻu manu ʻo e tahí,Ke ke fokotuʻu ai ha leʻo kiate au?
13 ʻI heʻeku pehē, ‘Ko hoku tokotoʻangá te ne fakafiemālieʻi aú;Ko hoku mohengá ʻe tokoni ki hono fakanonga ʻeku mamahí,’
14 ʻOkú ke fakailifiaʻi leva au ʻaki ʻa e ngaahi misiPea fakamanavaheeʻi au ʻaki ʻa e ngaahi vīsone,
15 Ko ia te u fili ai ke u mate fulutāmakia,ʻIo, ke u mate kae ʻikai ko e moʻui mo e sino ko ení.*+
16 ʻOku ou fehiʻa ʻi heʻeku moʻuí;+ ʻoku ʻikai te u loto ke u kei moʻui atu.
Tukunoaʻi ange au, he ko hoku ngaahi ʻahó ʻoku hangē ha mānavá.+
17 Ko e hā ʻa e tangata ko e meʻa noa peé ke ke tokanga ai kiate ia,Pea tuku taha ai hoʻo tokangá* kiate ia?+
18 Ko e hā ʻokú ke sivisiviʻi ai ia ʻi he pongipongi kotoa pēPea ʻahiʻahiʻi ia ʻi he mōmeniti kotoa peé?+
19 ʻE ʻikai koā te ke hanga kehe meiate auPea tukunoaʻi ange au ʻi ha kiʻi mōmeniti ke u folo ʻa hoku fāvaí?+
20 Kapau kuó u faiangahala, ʻe lava fēfē ke u fai ha maumau kiate koe, ʻa e Tokotaha ʻokú ne siofi ʻa e faʻahinga ʻo e tangatá?+
Ko e hā kuó ke hanga taha mai ai pē kiate aú?
Kuó u hoko koā ko ha kavenga kiate koe?
21 Ko e hā ʻoku ʻikai te ke fakamolemoleʻi ai ʻeku laka haláPea kātakiʻi ʻeku faihalá?
He kuo vavé ni ke u tokoto hifo ʻi he efú,+Pea te ke fakasio kiate au, ka te u puli atu.”
Fakamatala ‘i Lalo
^ Pe “ʻo aʻu ki he aata ʻa e ʻahó.”
^ Fakafoʻilea, “sio ki he leleí.”
^ Pe “ki Seolí,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Fakafoʻilea, “ko hoku ngaahi huí.”
^ Fakafoʻilea, “tuku ai ho lotó.”
