Coʼollaxa aso ʼalo lʼenaxat Rebeca ỹauotec ñi Jehová. So lhua lʼenaxat Isaac. So maye taqaʼen ỹauotec ñi Jehová. Aso Rebeca, ¿ʼéetec ra ỹauatton so Isaac? ¿ʼÉetec ra ỹachaxan aso maye ra huotaique machiguiñi ñi Jehová? Huaʼ, sauattonaq soua maye.

Soua ltaʼal so Isaac lʼenaxaʼt Abrahán taq Sara. Coʼollaxa so mayepi lmaʼ ye ʼalhua Canaán, qaq na shiỹaxauapi sa ishet ra ỹiʼoxoreʼn ñi Jehová. Qalaxaye so Abrahán nshetaique ra so llalec huaroneʼ aca ʼalo ỹiʼoxoren ñi Jehová. Ỹoqoʼoye ỹamaq so lamaxashec, qaipetaʼa so Eliezer, naña ye ʼalhua Harán ra ilaque aca lhua so Isaac. Ye Harán huetaʼa so lauoʼ lʼecpi so Abrahán.

So Eliezer lỹataʼpe so lamaxasheʼc lỹaʼt so Abrahán. Seʼeso lliquiaxac iviraʼague ra qalota naʼaxaʼte. Soua maye nachetaʼpe soua diez camellopi ỹachetac na nallec taq nachetaqtaxanaxac. So Eliezer, ¿ʼéetec ra ỹaỹaten négueʼt acaʼaca ʼalo lcaʼaguishe lhua so Isaac? So Eliezer taq so lỹaʼt namaxashecpi ivilreuo ye Harán. Huaʼa nache ivittalo aso pozo. So Eliezer ỹaỹaten ra yactaʼa ra nviʼ ana ʼalpi ʼetaxat lʼo. Nache natamenot ñi Jehová ʼeetaʼ: ‹Ra sashela aca qaʼañole qome ra aỹem nqouaguec ỹahuoʼo ca ỹaquip, nache aca maye aỹem ỹañeʼ ca ʼetaxat taqaʼen naua  incamellopi, nache saỹaten ra nachaca aca ʼalo ʼalcaʼaguishe›.

Aso qaʼañole Rebeca ivireuga aso pozo. Ana la Biblia iaʼaxat aso maye ra ỹataqta ʼonaxai. So Eliezer ỹashela ʼetaxat, nache aso maye ʼenac: ‹Ajaʼ, ʼanỹom ʼetaxat, taqaʼen sahuoʼo ca laquip na ʼancamellopi›. ʼAcuennataʼa, na camellopi ra huoʼo na laquip nache ỹataqta ltaʼaraic na nỹomgui ʼetaxat. Ỹoqoʼoye aso Rebeca ỹiʼiguelaqtaxaama aso pozo ra ilaique na ʼetaxat. ¿ʼAmeten ra qalota ra lʼonataxanaxac ara Rebeca neʼena foto?... So Eliezer ltaʼaraic ra lʼaalaxa chaʼaye ñi Jehová ỹasateguet so natamnaxac.

So Eliezer ỹanem aso Rebeca qalota lachetaqtaxanaxac ʼonaxaic. Aso maye iỹaxanalo so Eliezer taq so lỹaʼt namaxashecpi ra nareua ye lmaʼ so ltaʼa. So Eliezer iaʼaxat táinec so Abrahán ra ỹamaq, taq ʼeetec ñi Jehová ra ỹasateguet. Ye lauoʼ lʼecpi aso Rebeca ỹataqta machiguiñi ra aso maye huaroneʼ so Isaac.

¿ʼApetaʼa aso Rebeca nshetaique ra huaroneʼ so Isaac?... Aso maye ỹaỹateeta ra nachiñi ñi Jehová namaq so Eliezer. So lauoʼ lʼecpi inat ra nasheeta ra jec ra Canaán yaqtoʼ huaroneʼ ca Isaac. Aso maye ỹasat: ‹Ajaʼ, ñasheeta›. Nache lhuotta ra quegue so Eliezer. Qaq ca mashe iviraʼalo ye Canaán, nache huaroneʼ so Isaac.

Aso Rebeca ỹoʼot so ỹaỹamaxareeta ñi Jehová, nache ñi maye ỹataqta iloʼogue. Ỹoqoʼoye aso maye huaʼau lauoʼ lashe so Jesús. Qaq ra ʼaviʼinaxat aso maye taq ʼauʼot ra machiguiñi ñi Jehová, nache ỹataqta ʼam iloʼogue taqaʼen.