PAXAGUENAXAT 4
Aso maye ỹoʼot ra machiguiñi so ltaʼa taq ñi Jehová
¿Négueʼt ca ỹanot lʼaqtac so Jefté ñi Jehová?
Aso llale so Jefté ipacchigui so lʼaqtac so ltaʼa, naiʼctaxa ra huoʼo ra lqalaic
¿ʼAlaʼa añi nogotole neʼena foto?... Añi maye llale so ỹale lʼenaxat Jefté. Aye la Biblia sa iaʼaxat ʼeetec ca lʼenaxat. Qalaxaye saỹatenaq ra ỹoʼot ra machiguiñi so ltaʼa taq ñi Jehová. Ñapaxaguenaxa aso maye taq so ltaʼa, Jefté.
So Jefté ỹale soxoraic. Ỹahuoʼo ra lraqaʼ ra ỹapaxagueetac aso llale ʼeetec ra lataxac ñi Jehová. So maye ʼañaxaic taq nataxalaʼ soxoraic. Ỹoqoʼoye so israelitapi iquiguiʼoʼt ra ratatalec so mayepi ra nloquiaxac so npaxaguenaxauapi.
So Jefté natamenot ñi Jehová ra itauan yaqtoʼ rauegaxan. So maye ỹanot ra lʼaqtac ñi Jehová. Ra rauegaxan, nache ỹañeʼ ca nʼautec icaʼatteguet ra ivireuo ye lmaʼ. Queʼeca shiỹaxaua nalec taq roʼonataxan ʼenauac ra nachaalataxac ye lauoʼ npeʼl ñi Dios. Coʼollaxa, seʼeso lauoʼ nacheso so naña ra qaỹiʼoxoren ñi Dios. So Jefté rauegaxan seʼeso loquiaxac. Qaq ¿négueʼt ca nʼautec icaʼatteguet ra ivireua ye lmaʼ?...
¡Nachaso aso llale! Aso maye ʼoonole llale. Qaq nagui so Jefté ỹasheetec ra jec. Reʼera iuet so maye. Qalaxaye, ʼauennataʼa so maye ỹan so lʼaqtac. Nache aso llale lhuotta ra ʼenapec: ‹ʼAm itaʼa, ra mashe ʼanot ra ʼarʼaqtac ñi Jehová, nache ʼaupacchigui›.
ʼEnauac so viʼiyel, ana nauochaxauapi qanamaqtega aso maye
Aso llale so Jefté iueteguet taqaʼen reʼera. Yeʼeye lauoʼ ñi Dios aso maye sa ishet ra huaron taq ra huoʼo ca llalaqpi. Qalaxaye aso maye nshetaique ra ipacchigui seʼeso lʼaqtac ỹan so ltaʼa taq ra ỹoʼot ra machiguiñi ñi Jehová. ʼEra ra ỹataqta ʼamaqtaqaic, napacalec ra huoʼo ca nhua qoʼ ñalaqpi. Nache aso maye jec caʼai ye lmaʼ, nache ʼenauac ra nachaalataxac netaʼa ye lauoʼ ñi Dios.
¿Petaʼa machiguiñi ñi Jehová qataq so Jefté souaxat so ỹoʼot aso maye?... ¡Ajaʼ, nache ʼeetec! Ỹoqoʼoye ra ʼaualaxaguet taq ʼauauotec ñi Jehová, nache ishet ra ʼaviʼinaxat aso llale so Jefté. ʼAm taqaʼen ishet ra ʼauʼot ra machiguiñi ñi Jehová taq ca ʼartaʼal.
