Ra saʼaxataq ñi Jehová, huoʼo na ralemata qoʼ qomiʼ iʼen. Reʼera ỹoʼot ra qaica ca qaryaxa ra saʼaxataq ñi maye. ¿Petaʼa huoʼo ra ʼarhuennataxa reʼera?... Ana la Biblia iaʼaxat so nsoqolec ra ỹauotec ñi Jehová, qalaq huac ra ỹaxaañi ra iaʼaxat ñi maye. Lʼenaxat Jeremías. Ñapaxaguenaxa so maye.

So ñaq nsoqolec, ñi Jehová ʼenapega ra icoyiguen na shiỹaxauapi yaqtoʼ ỹalat na ỹoʼottac qauemsat. So Jeremías iqalanaʼa reʼera taq ñiʼi. Nache ʼenapega ñi Jehová: ‹Aỹem sa saỹaten ca shiitec ca iʼaqtac. Ñaq aỹem nsoqolec›. Qalaxaye ñi Jehová ʼenapega: ‹Sa ishet ra ʼañiʼi. Aỹem ʼam setauan›.

 Nache so Jeremías ʼenapega so shiỹaxauapi ra sa ỹalat na qauemsat, nache huoʼo ca nhuaxanaguec. ¿ʼApitaʼa ra qanʼaxaỹaxana so Jeremías?... Sa ishet. So mayepi iʼen taq ralemataỹa so maye. ¡Qataq huoʼoi soua nshetaique ra ỹalauat so maye! ¿Chaq ʼéetec ca lhuennataxac so Jeremías coʼollaxa?... So maye ñiʼi, nache ʼenac: ‹Aỹem salat ra saʼaxat ñi Jehová›. Qalaq, ¿ỹoʼot reʼera?... Sa ishet. Souaxat ra ỹataqta ỹauotec ñi Jehová, sa ishet ra ỹaxaañi ra iaʼaxat ñi maye. Ỹoqoʼoye ñi Jehová iloʼogue.

Huoʼo so naʼaq huoʼoi soua ỹaleʼt qauemaiqa, qaỹasaxangui aso pozo nlaqchigui na nshaxa. Qaica ca aloq taq laquip. Seʼesoua ỹaleʼt nshetaique ra ileu so maye. Qalaxaye ñi Jehová itauan, nache ncaʼaleec.

¿Négueʼt ca ʼam ỹapaxaguenec so ỹoʼot so Jeremías?... So maye huoʼo naxa ra ñiʼi, qalaxaye queta ra iaʼaxattac ñi Jehová. ʼAm taqaʼen ishet ra qaiʼen taq qaỹalemataỹa, ra ʼauʼaxat ñi Jehová. Qoʼ huoʼo ra ʼancoq taq ʼañiʼi. Qalaxaye qoqueta ra ʼauʼaxattac ñi Jehová. Nache ñi maye saxaỹet ra ʼam itauan, ʼenʼam so Jeremías.