¿Petaʼa saq alaq ra qaỹoʼot ra ỹaỹamaqchiguiñi?... Qalota na shiỹaxauapi ỹasat ra sa ishet. Qalaxaye ana la Biblia iaʼaxat huoʼo so nogotolec nʼañaxat ra ỹoʼot ra ỹaỹamaqchiguiñi. Lʼenaxat Josías. Qalaq huoʼoi so noʼon nauochaxaʼu qaitauan. Ñapaxaguenaxa so Josías taq soua nauochaxaʼu.

So ltaʼa so Josías lʼenaxat Amón, ntaʼa ye Judá. So maye ỹataqta qauemaic taq ỹiʼoxoren na nqolacpi. Qaq so ileu so Amón, nache talec so Josías ra ntaʼa ye Judá. ¡Qalaxaye so maye ndotec ocho so nʼaño! Qalaq so maye, ¿qauemaic ʼenʼam so ltaʼa?... ¡Sa ishet!

So ñaq nsoqolec, so Josías nshetaique ra ỹalaxaguet ñi Jehová. Ỹoqoʼoye ndotec ra lcaʼagui na nauochaxaʼu na ỹauoteʼc ñi Jehová. Soua maye itauaʼn so Josías ra ỹoʼot ra ỹaỹamaqchiguiñi. ¿Négueʼt soua maye?

So profeta Sofonías nauochaxaua so maye. Icoyiguen na Judá lʼecpi négueʼt ca  aloic ra queta ra ỹiʼoxoreetac na nqolacpi. So Josías nʼaxaỹaxana so Sofonías. Nache ỹiʼoxoren ñi Jehová, sa ishet na nqolacpi.

So nauochaxaua lỹa so Josías lʼenaxat Jeremías. Huac ra naloteʼ ra lañoxoua. Qaq ca ñaq nsoʼq, nauoreʼu soua maye. Ntaunaʼt ra roʼonataxanot ñi Jehová. Soua maye ỹataqta noʼon nauochaxaʼu. Ỹoqoʼoye ca ileu so Josías so Jeremías ỹiriñi so nʼonec iaʼaxat ra ỹataqta itoxoñi so maye.

¿Négueʼt ca ʼam ỹapaxaguenec ra lataxac so Josías?... So ñaq nogotolec so Josías nshetaique ra ỹoʼot ra ỹaỹamaqchiguiñi. Ỹoqoʼoye lcaʼagui na nauochaxaʼu ra ỹauoteʼc ñi Jehová. ¿ʼAm taqaʼen ʼanshetaique ra ʼauʼonataxanot ñi Jehová? Ra nache ʼeetec reʼera, ʼauen ra ʼalcaʼagui ca ʼanauochaxauapi ra ỹauoteʼc ñi Jehová. Nache na mayepi ʼam itauan ra ʼauʼot ra ỹaỹamaqchiguiñi.