“ÑI ỸOʼOTAPECNA, nache ỹoʼot na piguem qataq ana aʼlhua” (Génesis 1:1 LÑI). Yeua huaʼuchiguiñe lʼaqtaqa aye la Biblia ỹachaxatape Ñi Jehová ra nachaqñita Ỹoʼotapecna. Nataqaʼen iaʼaxattape ra salaxaiqa coʼollaxa soua viʼiye iviʼt ra qaỹoʼotac ana aʼlhua qataq na huetalecpi ana maye, aye la Biblia iỹaxanalo “naʼaxaʼte” so vi’isatpi iviʼ coʼolloxochiye qaỹoʼotac ana aʼlhua.

So shiỹaxaua saq chocharetto ra lʼonatac ñi Jehová neʼena aʼlhua. Coʼolloxoche qaỹoxon so shiỹaxaua nache qaỹachixotaigui ana aʼlhua. So shiỹaxaua ishet ra iʼenaxat ra lauotaxanactaic qataq ra laỹajnaxanaxac ñi Dios, chaʼaye coʼolloxochiye qaỹoʼot so maye nache qaỹenaxatchigui ra ʼeetaʼam ñi Dios. So shiỹaxaua qoỹanem ra lʼenaxat Adán nache qoỹanalec ye nmataqaʼ, lʼenaxat Edén. Seʼeso mataqaʼ lʼonatac ñi Dios nache huoʼo ana nanguishepi, qataq huaña anam ỹottaʼaʼt ʼepaq ala ỹataqta salaxaic ra lamaic.

Huoʼo so naʼaq Ñi Dios ỹoʼot aso ntaunaxaua so shiỹaxaua. Qaỹoʼonataxana so lchishet so Adán coʼolloxoche qaỹoʼot aso Eva, aso huaʼuchiguiñe ʼalo, qoỹanem ra lhua so Adán. Salaxaic ra ntonaxac so Adán nache ʼenapecoʼ: “¡Araʼara maiche ỹapachiyaxaua qataq maiche ipiʼinecyaxaua!”. Ỹoqoʼoye la Biblia ʼeetaʼ: “Ca shiỹaxaua caʼai ca ltaʼa qataq aca lateʼe, yaqtoʼ lauodeua aca lhua, nache caa maye ʼeetaʼam ra ʼonolec shiỹaxaua” (Génesis 2:22-24; 3:20 LÑI).

So Adán qataq aso Eva qaipataxaleguete ra ipaquejleguete soua dos lamaxasonaco ñi Dios. So huaʼuchiguiñe qaipataxaleguete ra iloguelo qataq ra ronataxaleguete ana aʼlhua, qataq qoỹanema ra rcoʼoi. Nataqaʼen qaipataxaleguete ra sa ishet ra cheʼec ana ala aso ʼonolec qoʼipaq netangui so nanaxanqaʼ: “[Aso] qoʼipaq maye [...] qaỹauatton ca noʼon qataq qauem” (Génesis 2:17 LÑI). Ra saỹalaʼq nache ileʼu. ʼEso taxa so laloxoqui ra ỹachaxaʼn ra ỹalaxagueta Ñi Dios, qataq ra ỹataqta ʼeesa ra ỹauotrec ñi maye. Soo maye ỹataqta nalochiyiñe, ỹoqoʼoye ishettaxa ra ỹoʼoʼt camachaqca ca ỹamaxalguete Ñi Dios. Ỹoqoʼoye aye la Biblia ʼenapec: “Qaq coʼollaq imat ñi maye ʼenauac na lʼonatacpi, nache ilaʼa ra ỹataqta ỹaỹamachiguiñe” (Génesis 1:31 LÑI).

(Qaỹachigoxotaña ye Génesis capítulo 1 qataq ye capítulo 2.)