MASHE lcopaʼague ra netaña aʼlhua ye Egipto so israelitapi nache ỹataqta salaxaic ra nachiquiaxac qataq qalota so mayepi. Qalaq huoʼo so ntaʼa ralaxaic ye Egipto, qaỹamaxataʼac faraón, ramaxasoxoolec so israelitapi ra caỹoʼot nlataqpi qataq ramaxasoxoolec ra qaỹalauat ca cheʼetague ñiguiñe. Qalaxaye aso ʼalo israelita ỹachangui so llalec aso loxona nache ỹanañigui aso río lʼenaxat Nilo, nache aso faraón llalec ilalec so noxotolec nache ỹanai lʼenaxat Moisés.

Coʼolloxoche so Moisés mashe ivira so 40 viʼiye nache iueelec so lauoleʼec nache ỹalauat so egipto ilotague na nlataqpi. Ỹoqoʼoye ratauec taỹa ye aʼlhua lỹa. Qaq coʼollaq iviʼ so 80 viʼiye Ñi Dios taq ỹamaxa ñi faraón yaqto ỹiltaxanaxan na israelitapi.

Chaʼaye so faraón ỹataqta qaranchigui añi lquiyaqte, sa ishet ra ỹauaqtaʼa ra jec na israelitapi. Nache Ñi Dios iuanec diez napaxaco. So Moisés ʼenapega ra ỹalaxaguet ra lʼaqtac Ñi Dios qalaq, so faraón saỹalaxac. Ỹoqoʼoye so na napaxa paʼatec Ñi Dios ỹamaq so lamaxashec ñi Dios piguem lʼec ỹalauat ʼenauac lʼauaxanec llalecpi na egipciopi. Qalaq so namaxashec piguem lʼec, napactalec ʼenauac na lasomi huetalec na ntagoq. Ỹoqoʼoye coʼolloxoche na ntounec so nʼaʼq lʼenaxat Pascua.

Nache lʼauaxanec llalec so faraón ileu, so maye ỹauaqtaʼa jec so israelitapi. Ỹoqoʼoye so mayepi caʼai ye Egipto. Nache quera so faraón icaalec so israelitapi. Coʼolloxochiye so egipciopi nayiitalec na israelitapi, Ñi Jehová icolaxachigui na ʼetaxat, nache aso auaxai raqaqchiguingui. Nache so israelitapi iʼaxasoxoota aso auaxai raqaqattague so llic. Qaq coʼolloxochiye qaltaq ipactegue na ʼetaxat aso auaxai, nache ipaʼaxaañe aso naigonapi qataq ʼenauac nallipi so faraón taqaʼen ʼenauac na caipi.

Mashe qaỹoqtegue, na israelitapi, ra netaña ye aʼlhua lʼenaxat Sinaí, nache ñi Jehová naỹamaxate so mayepi. Coʼolloxoche Ñi Jehová ỹanem na nqataxacpi. Ra ỹataqta qaỹoʼot ra nʼaqtac, nache Ñi Jehová ỹataqta ltaʼa na mayepi. Nataqaʼen rogoxona na mayepi yaqto ỹanem lqouagaxanaqtaic na shiỹaxauapi.

Qalaq, qalota so mayepi saq huoʼo lpiʼiỹaxac. Ỹoqoʼoye Ñi Jehová iuaxanec ra lachaxac ye aʼlhua tojlec queuogoigui so 40 viʼi. Coʼollaxa so Moisés ileu nache nmenguet so Josué. Chaxan lagui na israelitapi naueguelaʼt aye aʼlhua coʼolloxoche Ñi Dios iʼaxatta ra llalacpi so Abrahán.

(Qaỹachigoxotaña ye nerecpi Éxodo; Levítico; Números; Deuteronomio; Salmo 136:10-15; Hechos 7:17-36.)