MASHE lcopaʼague soua trescientos cincuenta viʼiye coʼolloxoche ra huoʼo so auot ltaʼa. So Abrahán lmaʼ so aʼlhua lʼenaxat Ur, nagui qaỹamataʼac Irak. Ye Ur netaña na sallaxanecpi. So Abrahán piʼiỹaxaic qalaxaye Ñi Dios ỹiʼiguen ra lpiʼiỹaxac so maye. ¿Chaxan ʼeeteco seʼeso ñiʼiguenataguec ra lpiʼiỹaxac so Abrahán?

Ñi Jehová ʼenapega ra qaʼai ye netaña nache taỹa ye aʼlhua lʼenaxat Canaán. Ỹasat so maye qaica ca ỹictega. Nache jec so Abrahán l-llataq aso lhua lʼenaxat Sara qataq so lasoshec lʼenaxat Lot qataq imata so lamaxashecpi. Coʼollaq ivira ye Canaán nache lachaxaic so Abrahán chochaq netaigui na npeʼl. Nache Ñi Jehová naỹamaxate so Abrahán: nache ʼenapega ra ʼenauac na shiỹaxauapi qaỹauo qomeʼ ra nachiquiaxac chaʼaye ỹalaq so maye, qaq na llalacpi so maye ỹataqta salaxaic qomeʼ nache qoỹanem ra lmaʼ ye Canaán.

So Abrahán qataq so Lot qalota aso lalopi qaguetapi qataq huacapi. So Abrahán ʼenapega so lasoshec Lot ra maiche lcaua ca ncopitega aʼlhua yaqto ỹanalec aso lalopi. So Lot lcaʼateua ye ỹataqta ʼonaxaic aʼlhua hueteua ye río Jordán, nache ỹanaña so lmaʼ, lauoreua ye Sodoma. So shiỹaxauapi lmaʼ ye Sodoma salaxaic ra lletaxaloxo, chaʼaye ỹoʼotaq ye qauem ʼonataguec sa ỹaỹamaxaren Ñi Jehová.

So Abrahán coʼolloxoche qaʼai so Lot, nache Ñi Jehová ʼenapega so Abrahán ra ỹoʼot qome ra qalota naqaʼen ca llalacpi ʼeetaʼam ana huaqajñipi . So Abrahán piỹalo so lʼaqtaqa ñi Jehová qalaxaye aso Sara saq arcoʼo. So Abrahán mashe iviʼ soua 99 viʼiye qataq aso Sara yaqtaʼa iviʼ soua 90 viʼiye nache Ñi Dios ỹataxanem ra huoʼo qome ca llalec. Nache ʼeesa reʼera lʼaqtac Ñi Dios chaʼaye ñiguiñe so Isaac. Nache queʼeca ncalaxaqui qaỹaxataguet chigoqaigui qomeʼ nam llalacpi so Isaac.

Qaq so Lot ñaq netaña coʼolloxoche ye aʼlhua sa qaỹapeque ye Sodoma. So Lot sa ishet ra iʼenaxat ra nʼonataguet so shiỹaxauapi lmaʼ yeʼeye netaña, chaʼaye so maye ỹataqta noʼon ra lataxac. Nache ivira Ñi Dios ra huotaique nlaxajñe ye Sodoma, qalaxaye huauñe ra namaxañe so ra lamaxashec piguem lʼec nache ỹactaxanem so Lot ra ʼeetapeguec Ñi Jehová. Qaỹamaxalec ra ỹaqoʼosop aso lhua qataq soua llalec nache iỹalapigui qome ra qaʼai ye netaña qataq qaỹamaxaleguete ra nache sa ishet ra ncoileguete ra huotaique imeten yem aʼlhua. Nache Ñi Dios ỹoʼot ra anac so noreq qataq so icoʼ quiquiaxaraic chigocoʼot na piguem nache nlaxajñe ye Sodoma qataq so Gomorra. So Lot qataq soua llalec ishet ra ncaalrec, qalaxaye aso lhua ỹamataʼague ra chigaqaʼague, chaʼaye yoʼoqta ra salaxaic ra ỹauotec so ỹalat, nache ileu.

(Qaỹachigoxotaña ye Génesis 11:10–19:38.)