COʼOLLOXOCHE na israelitapi inoxoneuo qataq naueguelaʼt ye Canaán, Ñi Jehová ỹachaxanapeguem ra ỹanem seʼeso aʼlhua naq llalacpi so Abrahán. Nagui so Josué iraxaama na israelitapi inoxoneua na seʼeso nachaxanaxat aʼlhua.

Ñi Jehová iuen ra nlaxajñe na shiỹaxaua lʼecpi ye Canaán, chaʼaye yiloxoicpi taqaʼen qauem ye nʼonataguet. Laʼaxatem na israelitapi ra nlaxajñe ʼenauac na pueblopi ye Canaán.

Nache so Josué ỹamaq so dos npiʼitaxanaxaica ye aʼlhua. Soo maye lanataqaʼ ye lmaʼ aso ʼalo lʼenaxat Rahab. Aso ʼalo ỹaỹaten ra israelitapi, so npiʼitaxanaxaica, qalaxaye nache ỹiʼoxoriñe ye lmaʼ. ¿Taenʼcoʼ reʼera ỹoʼot? Chaʼaye ỹaỹaten lʼonatac Ñi Jehová qataq ỹataqta ra huoʼo na lpiʼiỹaxac. Nache aso Rahab ʼenapega so npiʼitaxanaxaicpi ra sa ishet ra qaỹalauat ra huoʼo laataxac.

Quera na israelitapi inoxoneua ye Canaán qataq nlaxajñe aye ciudad lʼenaxat Jericó. Nache Ñi Jehová ỹataqta nasaxañe so lapoxonaxat, nache nam israelitapi nlaxajñe aye aʼlhua. Qalaq aso Rahab qataq so ltaʼa ncaʼalrec. Queuoigui na seis viʼiye ra huoʼo na laataxac nache so Josué taqaʼen naueguelaʼt ye aʼlhua laỹipi. Chaxan lagui so doce llalacpi so Israel ncalaxachigui ye aʼlhua.

Coʼollaxa so Josué yaqtaʼa ra ileu nache qalaponat so israelitapi. Nache iaʼaxat na lʼonatac Ñi Jehová coʼolloxoche iueelec so ltaʼalpi nache ʼenapega so israelitapi ra iuen ra ỹoʼot ye lpiʼiỹaxac. Quera na l-leuaxa so Josué qataq so nauochaxauapi, nache na israelitapi ỹaxaanec Ñi Jehová nache iʼoxoren na dios laỹipi. Queuoigui na trecientos viʼi sa qalota ra sa ỹalaxaguet ra lʼaqtac Ñi Dios. Nache naxa na israelitapi ra sa ỹalaxaguet Ñi Jehová nache ñi maye ỹauaqtaʼa ra ỹoʼot nquejnaxac na filisteopi huoʼotaq camachaqca na ntaʼa lỹa. Qalaq ra nachoxorenot ñi maye nache ỹahuoʼo na lataxala. Nache huoʼo so doce nataxalapi.

Aye nerec na iaʼaxat ra huetalec so nataxalapi, nache iaʼaxat huaʼuchiguiñe nataxala lʼenaxat Otniel qaq so paʼatec nataxala lʼenaxat Sansón, ỹataqta salaxaic ra laʼañaxac so maye. Ayeʼaye nerec qomiʼ ỹapaxaguenec ca ỹataqta noʼon: qaỹalaxaguet Ñi Jehová nache ncaʼaleec qalaq ca sa ỹalaxaguet na lʼaqtac Ñi Jehová nache huoʼo ra nquejnaxac.

(Qaỹachigoxotaña ye Josué; Jueces; Levítico 18:24, 25 LÑI.)