COʼOLLAXA so Jesús rapaxaguenataxan queuoigui lta viʼiye tres qataq ỹaỹaten nqoʼoneuʼa logaʼt ye lcaalaxa so maye. Na nataxalapi nʼamqajnataxanaxac ỹauotaique ỹalauat so Jesús qalaq na mayepi huoʼo lcolanaxa chaʼaye so pueblo iʼamaqten so maye raʼaqtaxanapec. Nache so Satanás taigui añi lquiyaqte ye lamaxashec lʼenaxat Judas, yaqto nʼaxat na so napaxaguenaxalaʼ. Nache so nataxalapi nʼamqajnataxanaxac ishetten treinta lcaʼchole añi plata so Judas.

Reʼera peʼ ye Pascua qataq so Jesús qalaponaxat na lamaxashec yaqto ntounec ye Pascua. Quera so Cristo iʼorauec ye Judas, nache so maye ỹoʼot na ralaxaic shigotaxanataxanaxaic: ra nquiʼaxac maye naigui ra qaiuennate so qarataxalaʼ. Nache so Jesús natamen, nache ỹacona aso pan qataq aso ỹomaxaqui taq ʼenapec: “Anaʼana pan nache naigui ra iʼoquiaxac maye qoỹanguet ra nalaataguec, souaxat ra qoñiita. Qaq qauʼoche qomeʼ ra maye, yaqtoʼ sa ishet ra aỹem qaucouaỹaʼai [...] anaʼana ỹomaxaqui nachana ana naigui ra ralaxaic aỹamaxataxac maye ỹataqta ʼitchiyiñe naqaʼen naua itagoq maye qaicolreec ra qaitaunec ra qoñiita” (Lucas 22:19, 20 DNS).

Reʼera peʼ so Jesús ỹanem ra ralaxaic namaxasoxonaxac: ỹataqta ỹauotec ca lỹa. Chaʼaye so maye ʼenapec: “Ỹataqta ỹauotec ca lỹa, nache ʼenauac qomeʼ na huetalec ana aʼlhua ỹaỹaten ra ỹataqta ʼeesa ra qamiʼ ỹapaxaguenataqa” (Juan 13:34, 35 DNS). Taqaʼen iaʼaxat na sa ishet na nlaiñe qataq lta natameelec na mayepi. Chaxan lagui lʼonaxanaxac ñi Dios qataq mashe jec nanaxanqaʼ lʼenaxat Getsemaní.

Nache so Jesús iʼaryiñe naua l-llicte qataq natamen ra imata lquiyaqte Ñi Jehová. Qalaq nvita na allipi qataq nataxalapi nʼamqajnataxanaxac yaqto icoñiʼ so maye. Nache so Judas yaqto ỹachaxanapec cam so Jesús napigoqot so maye. Nache so allipi icoñiʼ ye Jesús qataq na lamaxashecpi naneltaxan.

Nache so Jesús iaʼaxat naloteuʼa qaỹauegueuʼa so ntaʼapi maye loicnatac na lataxacpi, so maye ỹachaxanapec llalec ñi Dios. Ye nataxala nhuennataʼaʼt reʼera nshiunaguec ñi Dios. Na mayepi auotaique ỹaatapigui na l-leuaxa so Jesús. Nache iuoxon ye nataxala romano lʼenaxat Poncio Pilato. Ye maye ỹaỹaten so Jesús huoʼo qaica ca nasouaxashet , qalaq so pueblo iỹaxaatacoto na l-leuaxa so Jesús nache ye maye ỹalaxaguet so pueblo.

So Cristo iuoxon na aʼlhua qaỹamataʼac Gólgota, nache na allipi romanopi iʼarelec ye ʼepaq. Nache lloxochi napalñi. Reʼera avit, quenaxa so Jesús ileu, taqaʼen huoʼo ltaraic nacholaxanaxa. Na lʼocguiaxac ilayiña ye qasoxonaxa qataq so lỹa naʼaq, nataxala nʼamqajnataxanaxac ỹapolec na lasom taqaʼen nhuataguishi reʼera. Nache so Jesús ¿qomeʼ raqapiỹagui? Sa ishet, chaʼaye quenaxa huoʼo na lʼonatac lta.

(Qaỹachigoxotaña ye Mateo capítulopi 26 qataq 27; Marcos capítulopi 14 qataq 15; Lucas capítulopi 22 qataq 23; Juan capítulopi 12-19.)