COʼOLLAXA diez viʼiye so Jesús taỹa ra piguem, huetoigui naua naʼaxaʼte naponaxaquiʼ qaỹamataʼac Pentecostés, huetaña ye viʼi 33, huoʼo na ciento veinte lapaxaguenatacpi laponaxat ye Jerusalén. Nache, na mayepi nʼaxaỹaxaañe ʼenaʼam icoʼ na lʼat, qataq na lapaxaguenatacpi ishet ra iaʼaxat ye nʼaqtac ra sa ỹaỹaten. ¿Negueʼt reʼera? Ñi Dios ỹataqta ỹanem so espíritu santo na mayepi.

Ye Jerusalén huoʼo na qalota shiỹaxauapi huetaña ye ỹottaʼaʼt aʼlhuapi. Na mayepi coʼollaxa mashe jec yaqto naʼaxaʼte naponaxaquiʼ qaq iaʼaxat ỹottaʼaʼt nʼaqtac. Ỹoqoʼoye reʼelaqtaxan, chaʼaye so lapaxaguenatacpi ishet ra iaʼaxat na qaraqtac na mayepi. Nache so Pedro iaʼaxatem na lʼaqtac ñi raʼaqtaxanapec Joel. Ñi maye iaʼaxat Ñi Dios ỹanem espíritu santo na lapaxaguenatacpi, yaqto na mayepi ỹoʼot ca lʼonatac na ʼenec (Joel 2:28, 29). Reʼera lʼonatac na ʼenec ỹachaxanapec na lapoxot cristiana, sa ishet Israel, huoʼo na lqouagaxanaqtaic ñi Dios. Nache ra huoʼo auotaique ỹiʼoxoren Ñi Dios iuen naralaqtaguec ye cristiano.

Qalaq na npaʼaguenaxaua ñi Jesús, icaata na lapaxaguenatacpi. Nache huoʼo naʼaq ra icoñiʼ na qalota lapaxaguenatacpi. Qalaq reʼera peʼ, na lamaxashec piguem lʼec ñi Dios, iʼorauec na mayepi qataq namaxasoxonaxac na iaʼaxatem ra nʼaqtac. Quera chiʼiguejra na mayepi inoxoneuo ye lauoʼ ñi Dios qataq iaʼaxat ñi Jesús. Nache na nqolamgaxan npaʼaguenaxaua qataq lamaxasoxonaxac na sa ishet iaʼaxat ñi Jesús. Qalaq na lamaxashecpi ỹataqta saqaramchigui, nache ʼenapec: “Qomiʼ iuen ra huaʼañi ra ỹataqta salaxasoxoguet ñi Dios, ime, qataq jec na yiʼoqchigui shiỹaxauapi” (Hechos 5:28, 29 DNS).

Qalaq na npaʼaguenaxaua ñaq ʼeetalec lcogaxanataxanaxac. Huoʼo na Judíopi lỹa lashiquiaqtaxanaxac ye Esteban qataq ỹalauat ye maye. Neʼena huaña na nsoqolec lʼenaxat Saulo ñi Tarso, na maye taqaʼen nquiỹaxanaqchin ye cristianopi. Quera so Saulo taỹa ye aʼlhua lʼenaxat Damasco, yaqto icoñiʼ ye mayepi. Quera so maye nʼemgue, nache huoʼo lcoỹaraxat sa nauaañe, qataq ʼenapec: “Saulo, Saulo, ¿taenʼco ye aỹem ʼaucaatac?”. So Saulo ʼenapec: “¿Negueʼt ʼam?”. Qataq ʼenapecoʼ: “Qomiʼ nachaỹem Jesús” (Hechos 9:3-5 DNS).

Nache so Jesús quera na tres naʼaxaʼte namaxasaguec ye lapaxaguenatac lʼenaxat Ananías yaqto naparen na So Saulo. Ỹoqoʼoye so maye nachilaxanataguec qataq nashiguem ra iaʼaxatem. Quenaxa ra ỹaỹaten so maye qaỹamataʼac lamaxashec lʼenaxat Pablo.

Na huaʼauchiguiñi, so lapaxaguenatacpi iaʼaxatem na Lʼonataxanaxac ñi Dios ye Judíopi qataq ye samaritanopi. Qalaq huoʼo naʼaq lỹa, na lamaxashec piguem lʼec ñi Dios yoʼoq ye romano lʼenaxat Cornelio. So Cornelio ỹalaxaguet ñi Dios, nache iỹaxanaxanaxan ye Pedro. Ye maye iaʼaxatem na Cornelio qataq na lauolʼecpi. Ỹatemaq, na mayepi ỹaconguet espíritu santo, nache so Pedro ramaxasoxon nachilaxanataguec qomeʼ ra lʼenaxat ñi Jesús. Nache nagui ʼenauac na shiỹaxauapi ra auotaique ncaalaxa chochaq tateec, ishettaxa huetoʼot. Ỹoqoʼoye, ra noʼon qarʼaxaỹaxac na iaʼaxatem ye ʼenauac ana aʼlhua.

(Qaỹachigoxotaña ye Hechos 1:1–11:21.)