SO Daniel coʼolloxochiye nsoqolec huetaña ye Israel. Coʼollaxa na nlaxajñe ye Jerusalén, so maye icoñiʼ huetaña ye Babilonia. So Daniel qataq na Israelitapi lỹa lʼotaguishec qalaq huoʼo na qapiolec leltaxac. Nalʼena so Daniel huetaña ye Babilonia, Ñi Dios icoỹareuo so maye. Taqaʼen Ñi Dios isouec so maye na shiguiỹacpi requiʼiỹapecpi, ʼenaʼam icoʼ sauaxaic, huetaigui añi llimaxañe. Nache Ñi Dios ỹataqta ỹachaxanapec na qomchiye so maye. Na reloxon ỹataqta saq chochi reto, iaʼaxat huetalec so Mesías qataq Lʼonataxanaxac ñi Dios.

Quenaxa yoʼoq so Mesías. Nache so pueblo ñi Dios. ¿Lagui ilaʼa so Mesías na nataxala? Ñi Dios iʼaxattegue so Daniel ʼeetaʼ: so Mesías nache yoʼoq mashe ra iviʼ siete ỹiviʼiguelaxalec na sesenta qataq nueve viʼiye, ʼenaʼam viʼi 483, quera na lamaxasoxonaxac ca ltaq nʼoxoshiguem ye lpaqtaxat ñi Jerusalén. Huoʼo ỹanem reʼera lamaxasoxonaxac, ỹaloqta ra ileu so Daniel, reʼera ipacchigui ca 455 a.E.C. Ra qomiʼ naloqten viʼi 483 chigoqchi yiʼi 455 a.E.C. qomiʼ nvita 29 viʼiye. Quenaxa qomiʼ ỹaỹaten ra huoʼo aloic reʼera viʼi. Nache ye Daniel taqaʼen iaʼaxat na ileu so Mesías yaqto na ishetten ca nasouaxashet ñi ʼenauac shiỹaxauapi (Daniel 9:24-26).

So Mesías ntaʼa na piguem. Coʼollaxa so Daniel iloʼogue na ỹataqta ltaraic reloxon ʼeetaʼ, ‘huoʼo ʼenaʼam icoʼ na llalec na ỹale’ —seʼeso ye Mesías— maye jec nʼsonaxaqui ñi Dios huetaña ye piguem. Nache Ñi Jehová ỹanem “so maye ra laʼañaxac, lliʼoxoyic qataq ra ntaʼa”, reʼera naigui seʼeso lʼonataxanaxac qaica ca logaʼt. Quenaxa so Daniel taqaʼen ỹaỹaten na Lʼonataxanaxac ñi Dios huoʼo qalota ntaʼapi, seʼeso shiỹaxauapi qaỹamataʼac “na lalamaxatpi ñi Ỹoʼotapecna maye netoʼot na piguem” (Daniel 7:13, 14, 27 LÑI).

Lʼonataxanaxac ñi Dios nlaxajñe ntaʼapi lỹa huetalec ana aʼlhua. Ñi Dios ỹoʼot na Daniel ishet ỹaỹaten ra naigui na l-loxoc ye Nabucodonosor, ntaʼa ye Babilonia. So ntaʼa ilaʼa ltaraic lqolac. Reʼera lqolac huoʼo na lqaic ñi oro, ana ltogue ñi plata, ana raʼam loʼoq qataq naua lteltaye ñi cobre taqaʼen huoʼo naua lachilelte ñi hierro qataqaʼen naua lapiateʼ ñi nshaxa qataq hierro. Nache añi qoma huetaña ye qasoxonaxa iuaxaalec qataq nlaxajñe naua lapiateʼ aye lqolac. Nache, so Daniel iaʼaxat ye ntaʼa, ʼeetaʼ, na lqaic añi oro naigui aye Babilonia, qataq naua logoxoshet na lqolac lỹa, reʼera naigui lʼonataxanaxac ñi ntaʼa lỹa, na qomchiye. Na Lʼonataxanaxac ñi Dios, lapaxauo na lʼonatac huetoigui naʼaq ye naua lapiateʼ ñi nshaxa qataq hierro. Nache nlaxajñe ʼenauac na lʼonataxanaxac ñi aʼlhua, qataq huoʼo ntaʼa qaica logaʼt (Daniel, capítulo 2).

So Daniel coʼollaxa na ileu, ilaʼa na naueguelaʼt ye Babilonia. Nache ỹataqta ilaʼa, ntaʼa lʼenaxat Ciro naueguelaʼt aye ciudad. Quera mashe na setenta viʼi ñi lʼotaguishec, na Judíopi ỹiʼiguelaxague aye qarmaʼ. Nache na nataxala, ñi ltaxaỹaxanaxanec na shiỹaxauapi ra qaitaxaỹapegueʼ ñi Dios qataq raʼaqtaxanapec icoỹaʼ na ltaq nʼoxoshiguem ye lauoʼ ñi Dios qataq na Jerusalén. Qalaq ¿negueʼt aloic na mashe 483 viʼiye?

(Qaỹachigoxotaña ye nere Daniel.)