COʼOLLOXOCHIYE huoʼo ntaʼapi so Israel qataq so Judá taqaʼen huoʼo raʼaqtaxanapec. ʼEnauac so mayepi iuen naʼañaxat qataq ltaraic lpiʼiỹaxac yaqto ỹanem nʼaqtaxanaxac Ñi Dios. Huoʼo na qalota reloxon iaʼaxat ʼeetaʼ:

1. Na nlaxajñe ye Jerusalén. So lʼaqtaxanaxanec ñi Dios huetangui so Isaías qataq so Jeremías, reloxon na nlaxajñe ye Jerusalén. So mayepi ỹachaxanapec chaʼaye aloic reʼera taqaʼen ỹachaxanapec chaʼaye nachaxana Ñi Dios lalemataic. Na shiỹaxauapi huetalec ye Jerusalén ỹiʼoxoren Ñi Jehová nroteec na alap, qalaq qauem nʼonataguec ra mayepi, ỹachaxanapec sa ishet ỹiʼoxoren Ñi Jehová. So mayepi yiloxoic qataq qauemaic (2 Reyes 21:10-15; Isaías 3:1-8, 16-26; Jeremías 2:1–3:13).

2. Na naralaxataxac ye nʼamqajnataxanaxac ʼeesa. Quera na setenta viʼiye ñi nhuaxanaguec huetalec ye Babilonia, so pueblo ñi Dios ỹiʼiguelaxague ye qarmaʼ, nache so maye ỹoltaq nʼoxoshiguem ye lauoʼ ñi Dios taqaʼen naralaxataxac ye nʼamqajnataxanaxac ʼeesa (Jeremías 46:27; Amós 9:13-15). Coʼollaxa so doscientos viʼi reʼera aloiq, so Isaías ỹiyiñe, na shiỹaxaua lʼenaxat Ciro naueguelaʼt ye Babilonia qataqaʼen ỹiltaxan ye Judíopi. Taqaʼen so maye iaʼaxat ra lataxac so Ciro naueguelaʼt reʼera aʼlhua (Isaías 44:24–45:3).

3. Na lviraxac so Mesías qataq na lataxac so maye. So Mesías ñiguiñe huetalec aʼlhua lʼenaxat Belén (Miqueas 5:2). So maye ỹataqta shiỹaxaua huesoxoic qataq lviraxaqui ye Jerusalén netashiguem ashena (Zacarías 9:9). So Mesías iuoten na shiỹaxauapi qalaq huoʼo sa iuoten so maye (Isaías 42:1-3; 53:1, 3). Ỹoqoʼoye auotaique ỹalauat so maye. Nache ¿reʼera naigui ca logaʼt so Mesías? Sa ishet, chaʼaye so maye ncaʼalaxateec yaqto ỹanem nañanaxac, nache reʼera ishetten na qarasouaxashet na shiỹaxauapi (Isaías 53:4, 5, 9-12).

4. Lʼonataxanaxac so Mesías. Na shiỹaxauapi sa nalaʼaʼt, sa ishet ỹataqta ʼonaxaic ntaʼa, qalaq so Mesías ajaʼ nache ʼeetec. Chaʼaye so maye qaỹamataʼac Ntaʼa Maye Ỹoʼot ra Nlagaxa (Isaías 9:6, 7; Jeremías 10:23). Nache qamaleʼ so maye lʼonataxanaxac huetalec ana aʼlhua, huoʼo nlagaxa taqaʼen na shiguiỹacpi saq lʼaxanataxanaxac (Isaías 11:3-7). Nache saq huoʼo lalolaxa (Isaías 33:24). Qataq mashere na l-leuaxa (Isaías 25:8). Qalota na shiỹaxauapi na nleuaxa ncalaxatec (Daniel 12:13).

(Qaỹachigoxotaña ye nerecpi Isaías, Jeremías, Daniel, Amós, Miqueas qataq Zacarías.)