COʼOLLOXOCHE nquiguec na shiỹaxauapi nache taqaʼen nquigueec ra lasouaxasheʼt chaʼaye salaxaic ra ỹietaxaloxo. So Enoc, lamaxashec ñi Dios, qaỹamac ra ʼenapega na shiỹaxauapi ra qanlaxajñepi ʼqom sa ỹalat ye ñetaxaloxo. Qalaxaye saqanaxaỹaxana so maye nache ye lletaxaloxo na shiỹaxauapi iviroʼot na piguem. Taqaʼen coʼolloxoche huoʼo na lamaxashecpi ñi Jehová piguem lʼecpi npaxagueneʼ ñi maye, ỹoqoʼoye ỹalaq ye piguem nache ñigui ra shiỹaxaua, ỹacona ra salaxaic ana lhuapi. Nache nashiguem na llalacpi so mayepi ỹataqta loxoraicpi qataq salaxaic ra lquesaxanaxa lʼenaxat nefilim. Na mayepi ỹoʼot ra nlaxalec ana aʼlhua ra loquiaxac. Nache Ñi Dios salaxaic ra iuet ye lcouennataxa coʼolloxoche nlotaña ra lataxac na shiỹaxauapi.

Coʼollaq ileu so Enoc nache huoʼo so shiỹaxaua lỹa noʼon ra lataxac lʼenaxat Noé. So maye qataq so llalacpi ỹataqta ỹoʼot ra ʼeetapeguec ñi Dios. Ñi Jehová coʼollaxa huotaique namaxañe ca auot ltaʼa yaqto ileu ʼenauac na yiloxoicpi, qalaxaye huotaique ra ntelaʼa ra nachaalataxac so Noé. Nache ʼenapega so Noé ra ỹoʼot so arca, asaʼaso arca nache ʼenaʼamso ca noỹic ltaʼaraic. Inoxonoigui so llalacpi so maye qataq inoxonaqcheteuo so shiguiỹacpi yaqto ishet ra lcaltauec so mayepi. So Noé ỹalaxaguet ñi Dios. Qalaxaye qalota so viʼiye ra imat aso arca. Qaq coʼolloxoche ỹoʼotaq aso arca nache taqaʼen “so maye iʼaxattac ra achaalataxac maye quiʼitta” (2 Pedro 2:5 DNS). So maye ivitaqteetega so shiỹaxauapi ra huoʼo qomeʼ ca auot ltaʼa qalaxaye qaica ca nʼaxaỹaxana. So Noé qataq so llalacpi nache l-llaqchiguem so shiguiỹacpi ra inoxonoigui aso arca. Ñi Dios ỹapoi so lasom aso arca nache anac so auot.

So auot ltaʼa iviraxateec soua cuarenta naxate, ipaxalec ʼenauac ana aʼlhua, nache ileu so yiloxoicpi. Coʼollaq imñe so ʼetaxat ltaʼa nache asaʼaso arca neelec aso qoỹoqotcheguemec aʼlhua. Iviraxatec so viʼi ra netaigui aso arca so Noé nache npauec so maye qataq so llalacpi. Ỹaguec ra nachiquiaxac so Noé nache ỹoʼot so lachectactaxanaxat shiguiỹac qaỹavigaxat nache ỹanot ñi Dios. Ñi Dios ʼenapega so Noé ra sa ishet ra ỹoltaq ỹoʼot ca auot ltaʼa, nache Ñi Dios ỹoʼot so qomoxonalo na piguem naigui som ỹan lʼaqtac. Qaq ra ilaʼa na shiỹaxauapi so qomoxonalo nache icouenate so lʼaqtac ỹan ñi Dios.

Coʼolloxoche ime so auot ltaʼa nache Ñi Dios ỹan soua ralaxaic lamaxasoxonaxaco ʼeetaʼ. Qamiʼ sanema ra qolliqui na lapat na shiguiỹacpi qalaxaye sa ishet qomeʼ ra qolliqui na ltagoxoppi. Nataqaʼen ỹamaxalec na shiỹaxauapi ra sa ishet ra lapotaʼat cam huetaña. Qalaxaye qalota so saỹalaxalec so lʼaqtac ñi Dios nache laponat so shiỹaxauapi nache nʼoxoosheguem aso laue huaña so aʼlhua lʼenaxat Babel. So shiỹaxaua qaitalec coʼolloxoche lʼenaxat Nemrod. Qalaxaye Ñi Dios ỹoʼot ra ỹotaqpecache na lʼaqtac so shiỹaxauapi nache lagat so mayepi, ỹoqoʼoye qoỹaxañe ra qanoxoosheguem asaʼaso laue.

(Qaỹachigoxotaña ye Génesis capítulo 6 nache ivitaʼa ye capítulo 11; Judas 14, 15.)