¿CHAXAN ʼeeteco ca lmariaxac ca pueblo ra ỹalaxaguet Ñi Dios qataq ca ltaʼa? ʼEnauac na nʼtonaguec qataq nalactapiguiñe na maye. So lʼonataxanaxac so Salomón nache qaỹaloqnaxana.

Coʼollaxa yaqtaʼ ra ileu so David nache ỹaneuo ra ntaʼa so llalec lʼenaxat Salomón. Quera so Salomón huoʼo so lchoxonaxac nache Ñi Jehová ỹami ra lʼcaʼaua ca iaʼaxataque so maye. So ntaʼa lʼcaʼa ra laỹajnec yaqto ishet ra iloʼogue so lauoʼ. Ñi Jehová ỹaỹamaxareeta reʼera lataxac so Salomón, nache ỹanem na laỹajnec so maye. Qataqaʼen ỹachaxanapec ra ỹalaxaguet na lʼaqtac Ñi Maye taqaʼen ỹanem nsallaxa, na ʼenec, qataq qoỹoqtegue ra nachaalataxac.

Ra laỹajnec huetoʼot so Salomón lʼaxaỹaxac ʼenauac na shiỹaxauapi so coʼolloxochiye. Huoʼo so naʼaq, nqoʼooreuʼa so ntaʼa soua dos ʼalo. Soo maye iaʼaxat ra lateʼe so noxotolec qanqotapigui. Nache ¿cam ʼeeteco so Salomón? ¡So maye ʼenapec ra qauquesoqoigue na laiñe ram noxotolec! Aso ỹataqta lateʼe so noxotolec, lʼaqtac ra sa ishet ra ʼaualauat ra noxotolec ʼaỹami ara maye. Nache ʼenapec so ntaʼa , ara maye nachara ara yoqta lateʼe. Nache lʼaxaỹaxac ʼenauac so pueblo, Ñi Dios ỹanem ra laỹajnec yaqto ỹaỹaten ra lataxac ca nasouaxashet.

So Salomón lʼonatac so lauoʼ Ñi Dios ye Jerusalén. Aso ñiʼioxonnataxanaxaqui qaica ʼenaʼam lyaq. Nache so Salomón so natamnaxac ʼeetaʼ: “Na piguem naicʼtoxoʼ ra huoʼotaq ỹataqta qalochigui, qalaq sa ishet ra ỹanoxot ra ʼam nllañi ¡qaq ỹapagueecoʼ nam na noỹic maye ñiʼoxoshiguem, ra yaqto ʼarma!” (1 Reyes 8:27 LÑI).

Na lataxac so Salomón ỹimteuo na aʼlhuapi qataqaʼen iviraʼa ye aʼlhua lʼenaxat Seba (Saba), yeʼeye Arabia. Aso nateʼe lmaʼ netaña ye Seba nache nqoʼona ye Jerusalén chaʼaye lʼaxaỹaxac ra nsallaxa qataq ra laỹajnec so Salomón. Nataqaʼen ra ỹauotaique rnataxalec ca maye ỹataqta huoʼo ra lqalaic. Qaq aso maye coʼollaq ilaʼa ra laỹajnec so Salomón nache ỹiʼoxoren Ñi Jehová. Chaxanaq ʼeesa Ñi Dios ỹanem ra lqouagaxanaqtaic so israelitapi nache so mayepi ỹataqta ỹamaqchiguiñe.

Qaq Salomón ỹalat so lʼaqtac ñi Dios. Ỹoqoʼoye so maye nquinaxatec ana lhuapi qataq quegue ana ʼalpi ỹaqaʼa lauoʼlashepi. Nache ra ỹashaxañec añi lquiyaqte huaʼa nache natamnot naqaʼen na lqolacpi. Reʼera ỹoʼot so Salomón sa ỹaỹamaxaren Ñi Jehová. Nache Ñi Maye iaʼaxatem ra nqat ra ntaʼa, qalaxaye ñi Jehová saquai so lʼaqtac ʼenapega so David.

(Qaỹachigoxotaña ye 1 Reyes, capítulopi 1-11; 2 Crónicas, capítulopi 1-9; Deuteronomio 17:17.)