¿TAENʼCO coʼollaxa so Jesús taỹa ana aʼlhua? So Jesús ʼenapec: “Chaʼaye iuen nataqaʼen ra saʼaxatem na laỹipi pueblopi ra noʼon lʼaxaỹaxac maye iaʼaxat ra ñi Dios nachiñi ñi iloʼogue ʼenauacna, chaʼaye nachera ra huoʼo mshi aỹem qanamaq” (Lucas 4:43 DNS). Nache qomiʼ ỹaỹaten ye cuatro napaxaguenaxapi na Lʼonataxanaxac ñi Dios.

1. So Jesús ntaʼa. So Jesús ỹataqta ỹachaxanapec so maye Mesías (Juan 4:25, 26). Taqaʼen, iaʼaxat so maye ntaʼa na lauanaqtaguishec so Daniel. So Jesús iaʼaxat na lamaxashecpi (ra mayepi qanayictegueñiʼ) ca huoʼo naʼaq ra “nsoʼoongui aca nsoʼonaxaqui maye qaica ca ʼenaʼam ra lliʼoxoyic ra ntaʼa” so maye. Taqaʼen na mayepi lapole, nache na mayepi ntaʼapi (Mateo 19:28 DNS). Reʼera lapole, so Jesús, qaỹamataʼac “ỹalamaqte qagueta maye selotagueʼ”. Taqaʼen iaʼaxat huetalec “añi laỹi ana qaguetapi”, reʼera mayepi sa ishet ra ntaʼa (Lucas 12:32; Juan 10:16 DNS).

2. Lʼonataxanaxac ñi Dios naparen ñiʼitaxaloxo. So Jesús ỹachaxanapec na Lʼonataxanaxac ñi Dios naparen na ltaraic ñiʼitaxaloxo: so Satanás ỹasaxalec ca sa ỹaỹamaxañe ye lʼenaxat ñi Dios. ¿Cam ʼeetec ỹoʼot reʼera? Chaʼaye qaỹoʼoxoren ra arenaxat qataq qomeʼ lapalaqtaxanaxa na nashipegaxanaxac, coʼollaxa iaʼaxat ye Edén (Mateo 6:9, 10). Taqaʼen so Cristo ỹachaxanapec huetalec ye Lʼonataxanaxac ñi Dios, saq huoʼo ỹotaxac huetaigui na shiỹaxauapi. Nache na choxoraic ỹataqta ʼenaʼam na nsallaxa. Coʼollaxa so Jesús iaʼaxateec ye Judíopi, qalaq taqaʼen itauan na samaritanopi qataq pueblopi lỹa. So maye ỹottaʼaʼt na nataxalapi nʼamqajnataxanaxac, so mayepi ỹamataxalen ye nsallaxaic qataq ye ʼañaxaic.

3. Lʼonataxanaxac ñi Dios qaỹoqtachi na shiỹaxauapi huetalec ana aʼlhua sa ỹapinʼa so Satanás. Na naʼaxaʼte so Jesús, na Judíopi, huoʼo ra lauel chaʼaye sa ỹauotec na ntaʼalpi romano lʼec. Ỹoqoʼoye so maye naỹauoctaq ca illioxoraʼt ye política (Juan 6:14, 15). Nache quenaxa iaʼaxat na nataxala ʼenapec: “Ra iʼonataxanaxac ra aỹem ntaʼa, ra maye sa ishet ra nachana ana aʼlhua” (Juan 18:36 DNS). Qataq iaʼaxat ye lapaxaguenatac, ʼeetaʼ: “Qamiʼ sachigoxolloiguilo nam huetalec ana aʼlhua” (Juan 15:19 DNS). Nataqaʼen coʼollaxa iquiyoqtapeeguet rogoxona lʼogoxonaxat yaqto napaxatalec so maye (Mateo 26:51, 52).

4. So Cristo ntaʼa huotaxanaqtaqaic. Coʼollaxa so Jesús iaʼaxat na qomeʼ so maye ỹashiirot ye lapaxaguenatac (Mateo 11:28-30). Qataq ỹataqta ipacchigui. So maye ỹanoigui noʼon lennataxanaxac, iaʼaxat huetalec na lhuogoqchic, añi alom, na lataxac nhuojnaiʼ qataq na ntonaxac (Mateo, capítulopi 5-7). So Jesús huotaxanaqtaqaic qataq nlochigui na shiỹaxauapi lỹa. ʼEnauac na shiỹaxauapi, ra auotaique iloʼogue nache ỹaỹaten qataq huoʼo naquitaxac ra so maye loỹoxot. ¿ʼAm auotaique ntaʼa reʼera lataxac?

So maye ỹachaxanapec qomeʼ ỹoʼot na Lʼonataxanaxac ñi Dios, qalaq taqaʼen coʼollaxa ỹoʼot lʼonatac na ʼenec. ¿Taenʼco ỹoʼot reʼera? Qomiʼ aloʼogue.

(Qaỹachigoxotaña ye nerecpi Mateo, Marcos, Lucas qataq Juan.)